ގެދޮރުވެރިޔާ ސްކީމްގެ މައްސަލައިގައި ދައުވާ ކުރުމާމެދު މަޝްވަރާ ފަށައިފި
ދައުވާ ކުރެވޭނެ ފަރާތްތަކުގެ މައްޗަށް ދައުވާ ކޮށްދިނުމަށް އެދެން ކުރަންޖެހޭ މަސައްކަތްތައް ވަރަށް އަވަހަށް ކުރާނެ
ފްލެޓުތައް ދޫނުކޮށް ހިފަހައްޓަމުންދާތީ އާއްމުން އޭސީސީ އަށް އެއްވެ ނުރުހުން ފާޅުކުރަނީ
ކުރީ ސަރުކާރުން ހިންގި ގެދޮރުވެރިޔާ ސްކީމްގެ މަސައްކަތް ކުރި ފަރާތްތަކުގެ މައްޗަށް ދައުވާ ކުރުމާ މެދު މަޝްވަރާ ފަށާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފިއެވެ.
ބުދަ ދުވަހުގެ ރޭ އޭސީސީން ނެރުނު ބަޔާނެއްގައި ބުނީ، އެ ކޮމިޝަނުންަ ތަހުގީގު ކުރަމުން އަންނަ ގެދޮރުވެރިޔާ ސްކީމުގެ ދަށުން ފްލެޓު ދޫކުރުމުގެ މައްސަލައިގައި ހިމެނޭ ފަރާތްތަކުގެ މައްޗަށް ދައުވާ ކުރުމާ މެދު ގޮތެއް ނިންމުމަށް ޕްރޮސެކިއުޓަރ ޖެނެރަލް (ޕީޖީ) އޮފީހާއެކު ރަސްމީކޮށް އެ ކޮމިޝަނުން ޑިއުޓީ ޕްރޮސިކިއުޝަން ފަށާފައިވާ ކަމަށެވެ.
އާއްމު މަސްލަހަތު ބޮޑު މި މައްސަލައިގެ ޑިއުޓީ ޕްރޮސިކިއުޝަންގެ މަރުހަލާ ނިންމައި ދައުވާ ކުރެވޭނެ ފަރާތްތަކުގެ މައްޗަށް ދައުވާ ކޮށްދިނުމަށް އެދެން ކުރަންޖެހޭ މަސައްކަތްތައް ކޮމިޝަނުން ވީ އެންމެ އަވަހަކަށް ކުރަމުން ގެންދާނެ ކަމަށް ވެސް އޭސީސީ ގެ ބަޔާނުގައި ބުނެއެވެ.
ގެދޮރުވެރިޔާ ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު ކުރީ ސަރުކާރުން އެގްރީމެންޓް ވެސް ވަނީ ހަދާފައެވެ. ނަމަވެސް ކުރީ ސަރުކާރުން އެކުލަވާލި ފްލެޓު ލިސްޓުގެ ބޮޑު ޕަސެންޓެއް ޝަރުތު ހަމަ ނުވާ ކަމަށް އޭސީސީ އިން އިއުލާން ކުރީ 5 ފެބްރުއަރީ 2024 ގައެވެ. އަނެއް ކޮޅުން މައްސަލައެއް ނެތް ފަރާތްތަކަށް ފްލެޓުތައް ދޫކުރުމުގެ މަސައްކަތްތައް ކުރިއަށް ގެންދިއުމަށް ހައުސިންގ މިނިސްޓްރީ އަށް އޭސީސީ އިން ލަފާދީފައިވާއިރު، މިހާތަނަށް އެމަސައްކަތް ވެސް ހައުސިންގ މިނިސްޓްރީ އިން ކޮށްފައެއް ނުވެއެވެ. އަދި ސަރުކާރުން ވަނީ ފްލެޓް ލިސްޓުގެ މައްސަލަ ބަލާ ދެ ކޮމިޓީއެއް ވެސް އުފައްދާފައެވެ. ނަމަވެސް އެ ކޮމިޓީތަކުގެ މަސައްކަތުގެ އެއްވެސް ތަފްސީލެއް ސަރުކާރުން ހާމަކޮށްފައި ނުވާއިރު، ސޯޝަލް މީޑިއާ ގައި ދައުރުވާ ވާހަކަތަކަށް ބަލާއިރު ސަރުކާރުން މިހާރު މަސައްކަތް ކުރަނީ ސަރުކާރަށް ނިސްބަތްވާ މަޖިލިސް މެމްބަރުންނާއި ސަރުކާރުގެ ބޮޑުން ރުހޭ ބަޔަކަށް ފްލެޓް ތައް "ބަހާލުމުގެ" މަސައްކަތް ކުރަމުންނެވެ.
ކުރީ ސަރުކާރުން ދޫކުރި ފްލެޓްތަކަށް މުއިއްޒުގެ ސަރުކާރުން ހަދާ ނުހަދާ އެއް ނޭނގޭތީ އާއި ފްލެޓުތައް ދޫކުރާނެ ދުވަހެއް ވެސް ނޭނގޭތީ ގިނަ އަދަދެއްގެ އާއްމު ރައްޔިތުން އަންނަނީ ހައުސިން މިނިސްޓަރު ޑރ. އަލީ ހައިދަރުގެ އިސްތިއުފާއަށް ގޮވާ ސިލްސިލާ މުޒާހަރާތައް ކުރަމުންނެވެ.
ފްލެޓް ގެ މަސައްކަތުގައި ކުރީ ސަރުކާރުން ޝާމިލުވި ފާރާތްތައް އެންމެ ފަހުން ކުށްވެރިންނަށް ހަދަން މުއިއްޒު ސަރުކާރުން މަސައްކަތް ފަށާފައިވާއިރު، މުއިއްޒު ރިޔާސީ އިންތިޚާބުގެ ކެމްޕޭންގައި ވައުދުވެވަޑައިގެންފައިވަނީ ކުރީ ސަރުކާރުން ފްލެޓާއި ގޯތި ދީފައިވާ ފަރާތްތަކަށް އެއްވެސް ބަދަލެއް ގެނައުމެއްނެތި އެ ތަކެތި އެމަނިކުފާނުގެ ވެރިކަމެއްގައި ހަވާލު ކުރައްވާނެ ކަމަށެވެ.
