އެމެރިކާގެ ދަނޑުވެރިއަކު 1200 ކިލޯއަށްވުރެ ބަރު ބަރަބޮލެއް ހައްދައިފި
ބަރަބޯ ހެއްދި މީހާއަށް ވަނީ އިނާމަކަށް 30 ހާސް އެމެރިކާ ޑޮލަރު ލިބިފައި
މިނެސޯޓާގެ ދަނޑުވެރިޔާ ހެއްދި ބަރަބޯ
އެމެރިކާގެ މިނެސޯޓާގެ ދަނޑުވެރިއަކު 1،247 ކިލޯގެ ބަލަބޮލެއް ހައްދައި، ރިކޯޑެއް ގާއިމްކޮށްފިއެވެ. ހޯޓިކަލްޗަރ (ނުވަތަ ޚާއްސަ ގޮތްގޮތަށް ގަސްހެއްދުމުގެ އިލްމުގެ) ޓީޗަރެއް ކަމަށްވާ ޓްރެވިސް ގިއެންގަރ ބުނިގޮތުގައި އޭނަހެއްދި ބަރަބޯ އެހާ ބޮޑުވެފައިވަނީ ވެޔޮގަޑަށް ޚާއްސަ ފަރުވާއެއް ދީ، އަދި ދުވާލަކު 12 ވަރަކަށް ފަހަރު ފެންދީ، ކާނާއަޅައި ބެލެހެއްޓުމުގެ ސަބަބުންނެވެ. ކެލިފޯނިޔާގައި އޮންނަ ޕަމްކިން ވޭއޯފް ވަރލްޑް ޗެމްޕިއަންޝިޕަށް ބަރަބޯ ގެންދިއުމުން އިނާމަކަށް އޭނާއަށް ވަނީ 30 ހާސް އެމެރިކާ ޑޮލަރު ލިބިފައެވެ.
ގިއެންގަރ ހެއްދި ބަރަބޮލަށް އޭނާ ދީފައިވާ ނަމަކީ މައިކަލް ޖޯޑަންއެވެ. އޭނާ ބުނިގޮތުގައި އެނަން ބަރަބޮލަށް ދިނީ، މައިކަލް ޖޯޑަންއަކީ ބާސްކެޓްބޯޅާގައި އެންމެ "ބޮޑު" ކުޅުންތެރިޔާއަށް ވާއިރު، އޭނާ ހެއްދި ބަރަބޮލަކީވެސް އެންމެ ބޮޑު ބަރަބޮލަށް ވާތީއެވެ.
މި ބަރަބޮލުގެ ބަރުދަން، މީގެކުރިން ރިކޯޑް ލިބުނު ބަރަބޮލަށްވުރެ 21.31 ކިލޯ ބަރެވެ.
ދަނޑުވެރިޔާ މި ބަރަބޯ ވެޔޮ އިންދާފައިވަނީ އެޕްރިލް 10 ވަނަ ދުވަހު ކަމަށް ވެއެވެ. އަދި މިދިޔަ ހަފުތާގައި ބަރަބޯ ކެނޑުމާ ހަމަޔަށް، ގަސްކާނާއާއި ފެނާއި އަދި އެހެނިހެންވެސް ފަރުވާއަށް 15ހާސް ޑޮލަރު، ވެޔޮގަނޑަށް ޚަރަދުކޮށްފައި ވާކަމަށް ވެއެވެ.
އުމުރުން 43 އަހަރުގެ ގިއެންގަރއަކީ ބަރަބޯ ހައްދައި، އެޔަށް ބަދަލުތައް ގެނައުމަށް ޚާއްސަ ޝައުގުވެރިކަމެއް ހުންނަ މީހެކެވެ. "ޓީނޭޖް" އުމުރުން ފެށިގެން އޭނާ މިކަން ކުރާކަމަށްވެއެވެ. އަދި ތިން ފަހަރު އިނާމު ހޯދާފައި ވާކަމަށް ވެއެވެ.
އެންމެ ބަރު ބަރަބޮލެއް ކިރުމުގެ މުބާރާތް ފަށާފައިވަނީ 1974 ވަނަ އެމެރިކާގެ ކެލިފޯނިޔާގެ ދެ ސިޓީއެއްގެ ދެމެދުގައި މިކަމުގައި އުފެދުނު ވާދަވެރި ކަމެއްގެ ތެރެއިން، މަޖަލަކަށް ކަމަށްވެއެވެ. ނަމަވެސް މިހާރު މިކަން މި ވަނީ ވަރަށް ސީރިއަސްކޮށް ކުރިއަށްގެންދާ ކަމަކަށް ބަދަލުވެފައެވެ.
ގިއެންގަރ ބުނިގޮތުގައި އޭނާ ހެއްދި ބަރަބޯ ގެނައީ 23 ނަމްބަރު ޖަހާފައިވާ ޖަރޒީއެއްވެސް ލައްވައިގެންނެވެ. އެއީ 2023 ވަނަ އަހަރާ ގުޅުވާލާފައެވެ. އަދި އެއީ މީހުން ހެއްވައިލުމަށް ކުރި ކަމެއް ކަމަށް އޭނާ ބުނެފައި ވެއެވެ. (:
