ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަގަށްނެގި ލެޕްޓޮޕްތައް މިހާރު ފެނިފައިވާކަމަށް ފުލުހުން ބުނެފިއެވެ.

ހޯމަ ދުވަހުގެ ރޭ 09:43 ހާއިރު މީޑިއާތަކަށް ފޮނުވި މެސެޖެއްގައި ފުލުހުން ބުނެފައިވަނީ އެޗްޑީސީއިން ފަސް ލެޕްޓޮޕް ވަގަށްނެގި މައްސަލަ ފުލުހުންނަށް ހޯމަ ދުވަހު ރިޕޯޓުކުރިކަމަށާއި ތަހުގީގު ކުރަމުން އަންނަ ކަމަށެވެ.

އެއަށްފަހު ފުލުހުންގެ ތަރުޖަމާނު އޭސީޕީ އަހްމަދު ޝިފާން ވިދާޅުވީ ލެޕްޓޮޕްތައް ގެއްލުނު ކަމަށް ބުނާ މައްސަލަ ހުށަހެޅީ އެޗްޑީސީއިން ކަމަށާއި އެ ފަސް ލެޕްޓޮޕަކީ ފަރުކޮޅުފުށީގައި ހުންނަ އެޗްޑީސީގެ ޕްރޮޖެކްޓް އޮފީހުގައި ހުރި ފަސް ލެޕްޓޮޕް ކަމަށެވެ. އަދި އެކަމުގައި ތުހުމަތުކުރެވޭ މީހާ ހުރީ މަސްތުވާތަކެތީގެ މައްސަލައެއްގައި ހައްޔަރުކޮށްފައިކަމަށްވެސް ސީޕީ ޝިފާން ވިދާޅުވިއެވެ.

ތުހުމަތުކުރެވޭ މީހާ ފުލުހުންނަށް އެއްބާރުލުން ދެމުން އަންނަކަން ޝިފާން ހޯމަ ދުވަހުގެ ރޭ ހާމަކުރެއްވުމަށްފަހު އޭގެ ކުޑަ ވަގުތުކޮޅެއް ފަހުން ވިދާޅުވީ މިހާރު އެ ފަސް ލެޕްޓޮޕް ރިކަވަރ ކުރެވިފައިވާކަމަށެވެ.

ހައުސިންގ ޑިވޮލަޕްމަންޓް ކޯޕަރޭޝަން (އެޗްޓީޑީސީ)ން ވަގަށް ގޯތިތަކެއް ދިން މައްސަލައެއް ފެންމަތިވެ އެ މައްސަލަ ބަލަމުންދަނިކޮށް، އެ ކުންފުނިން ލެޕްޓޮޕްތަކެއް ވަގަށް ނެގިކަން ފުލުހުން ހާމަކުރީ ހޯމަ ދުވަހުގައެވެ.

ހުޅުމާލެއިން ވަގަށް ގޯތިތަކެއް ދޫކޮށްގެން އުޅޭ މައްސަލައިގެ ތަހުގީގު ފުލުހުން އަންނަނީ ހިންގަމުންނެވެ. ގޯތިތައް ދޫކޮށްފައިވަނީ ބިންވެރިޔާ ސްކީމްގެ ދަށުން ގޯތި ލިބުނު ކަމަށް ހަދައިގެން ކަމަށް ހާމަވެފައިވާ ލިޔެކިޔުންތަކުންނެވެ. ލިޔެކިޔުންތަކުން އެނގޭ ގޮތުގައި އެޗްޑީސީ އިން ވަގަށް ދޫކުރި ގޮތިތަކަށް ދީފައިވަނީ ފޯޖުކޮށްފައިވާ ލިޔުންތަކެކެވެ.

ވަގަށް ގޯތި ދިން ފަރާތްތަކުގެ ތެރޭގައި އެޗްޑީސީގެ ކުރީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދު ހިމެނެއެވެ. އޭނާ އަށް ބިންވެރިޔާ ސްކީމްގެ ދަށުން ނުލިބޭ ބިމެއް ހޯދައިދިނުމަށް މަސައްކަތްކޮށްފައިވާ ކަން ފަޅާއަރާފައިވާއިރު، ހައުސިން މިނިސްޓްރީ އިން އާއްމުކޮށްފައިވާ ލިސްޓުގައި ފަޒީލް ރަޝީދު ބިންވެރިޔާ ސްކީމުގެ ދަށުން ގޯއްޗަށް ޝަރުތުހަމަނުވާކަން ހާމަވެއެވެ.

ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި މި ސަރުކާރުގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ހަދައިދިންކަންވަނީ ކަށަވަރުވެފައެވެ.

ހުޅުމާލެއިން "ބިންވެރިޔާ" ސްކީމް ގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ދަނީ ފެންމަތިވަމުންނެވެ.