ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މަސައްކަތް ކުރަމުންދިއަ 14 މުވައްޒަފެއް އަވަސް އަރުވާލައިގެން ވަކިކޮށްފި ކަމަށް ބުނެ ލިިޔުންތަކެއް ދައުރުވާން ފަށައިފިއެވެ.

ހަސަން ކުރުސީ ނަމަކަށް ކިޔާ އެކްސް އެކައުންޓަކުން އާއްމުކޮށްފައިވާ މައުލޫމާތުތަކަށް ބަލާއިރު، އެޗްޑީސީގައި މަސައްކަތް ކުރަމުންދާ 14 މުވައްޒަފަކު ކުއްލި ގޮތަކަށް ވަކިކޮށްފައިވާ ކަމަށް އަންގާފައިވަނީ އާދިއްތަ ދުވަހު އެވެ. އެ މުވައްޒަފުންގެ ވަޒީފާގެ އެއްބަސްވުން އުވާލި ކަމަށް ބުނާ ލިޔުމެއް ވެސް ވަނީ އާއްމުކޮށްފައެވެ.

އެޗްޑީސީގެ ޗެއަރޕާސަން އަޙުމަދު ނާސިފް ސޮއިކުރައްވާފައިވާ އެ ސިޓީގައި ބުނެފައިވަނީ، ވަޒީފާއާއި ބެހޭ ޤާނޫނުގެ 23 ވަނަ މާއްދާގެ (ހ) އަދި (ށ) އަށް ހަވާލާދީ، ވަޒީފާއާއި ބެހޭ އެއްބަސްވުން ނިމުމަކަށް ގެނެސްފައިވާ ކަމަށެވެ. ނާސިފް އެ ސިޓީގައި ސޮއި ކުރައްވާފައިވަނީ، އެޗްއާރު ހެޑް ސޮއިކުރަން ދެކޮޅު ހެދުމާ ގުޅިގެން ކަމަށްވެސް ބުނެފައިވެއެވެ.

ހުޅުމާލެއިން "ބިންވެރިޔާ" ސްކީމްގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ދަނީ ފެންމަތިވަމުންނެވެ.

އެޗްޑީސީގެ އާ މެނޭޖިން ޑިރެކްޓަރ މައުރޫފް ޖަމީލު މިއަދު އައްޔަނު ކުރި ނަމަވެސް، މި ސިޓީތަކުގައި އަވަސް އަރުވާލައިގެން ސޮއި ކޮށްފައިވަނީ، މައުރޫފް ވަޑައިގަތުމުގެ ކުރިން ކަމަށް ސޯޝަލް މީޑިއާގެ މަސްދަރުތަކުން ބުނެފައިވެއެވެ. އެކްސްގައި ދައުރުވާ މައުލޫމާތުތަކުން އިނގޭ ގޮތުގައި، ޗެއަރމަން ބޭނުންފުޅުވަނީ މި މަޤާމުތަކަށް އޭނާގެ އަމިއްލަ މީހުން ލެއްވުމަށް ޖާގަ ހުސްކުރުމަށް ކަމަށާއި، އަދި މިހާ އަވަސް އަރުވާލައިގެން ނާސިފް މި ސިޓީތަކުގައި ސޮއިކުރެއްވީ ކަމެއް ފޮރުވަންތޯއާއި، އޭނާގެ މަޤްޞަދަކީ ކޮބައިތޯ ވަނީ ސުވާލު އުފައްދާފައެވެ.

ނާސީފް މި ސިޓީތަކުގައި ސޮއިކުރައްވާފައިވަނީ، ކޮމްޕެނީ ސެކްރެޓަރީ، ކޯޕަރޭޓް ލީގަލް ހެޑް އަދި ޗީފް އިންޓަރނަލް އޮޑިޓަރު އޭނާއަށް އެއްވެސް ސިޓީއެއްގައި ސޮއިނުކުރުމަށް ލަފާދެއްވާފައި ވަނިކޮށް ކަމަށް ދައުރުވާ މައުލޫމާތު ތަކުގައި ބުނެފައިވެއެވެ.

ނާސިފަކީ ނޮން-އެގްޒެކެޓިވް ޑިރެކްޓަރެއް ކަމަށާއި، މިފަދަ ސިޓީތަކުގައި ސޮއިކުރުމުގެ ބާރު އޭނާ އަށް ލިބިގެން ނުވާ ކަމަށް ވެސް ބުނެފައި ވެއެވެ.

ސޯޝަލް މީޑިއާގެ މަސްދަރުތަކުގައި، އެޗްޑީސީގެ ބައެއް މުވައްޒަފުންގެ ލިސްޓެއް ފުލުހުން ދީފައިވާ ކަމަށް ތުހުމަތު ކޮށްފައިވެއެވެ.

މުވައްޒަފުންތަކެއް ވަކި ކުރި މައްސަލަ އާއި ގުޅިގެން ޤާނޫނީ ވަކީލު އަހުމަދު މައުރޫފް އެކްސްގައި ލިޔުއްވާފައިވަނީ، އެޗްޑީސީ މިހާރުވެސް އެ ދަނީ ޤާނޫނާ ހިލާފުވަމުން ކަމަށެވެ.

ދައުރުވަމުންދާ ލިޔުމަށް އިޝާރާތްކުރައްވާ މައުރޫފް ވިދާޅުވެފައިވަނީ، ޗެއަރމަން އަކީ ބޯޑުގެ ނަން-އެކްޒެކެޓިވް މެންބަރެއް ކަމަށާއި، ކުންފުނީގެ އެތެރޭގެ ހިންގުމުގެ ކަންކަމުގައި ގޮތް ނިންމައި، ލިޔެކިޔުމުގައި ސޮއިކޮށް ނުހެދޭނެ ކަމަށެވެ.

ވަޒީފާއާބެހޭ ޤާނޫނުގެ 23 ވަނަ މާއްދާގެ (ހ) އާއި (ށ) އަށް ހަވާލާދީ ޓާރމިނޭޓް ކުރި ކަމަށް ބުނާއިރު، އެ މައްދާތަކުގައި އޮތީ، ނޯޓިހެއް ދިނުމަކާނުލައި ވަޒީފާއިން ވަކިކުރެވޭނީ، އޭނާގެ މަސައްކަތުގެ އަޚްލާޤު އެކަށީގެން ނުވުމާއި، އޭނާ ވަޒީފާގައި އިތުރަށް ބެހެއްޓުމަކީ، އެކަށީގެންވާ ހަމަތަކަށް ބަލާއިރު، ކުރެވޭނެ ކަމެއްކަމަށް ވަޒީފާދޭ ފަރާތަށް ނުފެންނަ ޙާލަތުތަކުގައި ކަމަށެވެ. މި 2 ހާލަތުން ކުރެ ހާލަތެއް މެދުވެރިވެއްޖެ ކަން އަންގައި، އެ މުވައްޒަފަކު ވަޒިކުރާ ސަބަބު ސާފުކޮށް ބަޔަންކޮށްދޭންޖެހޭނެ ކަމަށެވެ. 2 މާއްދާއަކަށް ހަވާލާދިނަކަސް، އެއީ ކޮން ކަމެއްކަން މުވައްޒަފުންނަށް ސާފެއްނުވާނެ ކަމަށާއި، ޖާވާބުދާރީވުމަށް އެކަށީގެންވާ ފުރުސަތު ނުދީ އިދާރީ ފިޔަވަޅެއް ނޭޅޭނޭ ކަމަށް މައުރޫފް ވިދާޅުވެފައިވެއެވެ.

ވަޒީފާއިން ވަކިކުރުމުގައި މައުލޫއީ އަދުލުވެރިކަން (substantive fairness) އަދި އިޖުރާއީ އަދުލުވެރިކަން (procedural fairness) ގާއިމުކުރުމަކީ ޤާނޫނީގޮތުން ލާޒިމުކަމެއް ކަމަށް ފާހަގަކުރައްވާ މައުރޫފް ވިދާޅުވީ، އެ ބަޔަކު މަގާމުތަކުގައި ތިބުމުގެ ސަބަބުން، ހިނގަމުންދާ ތަހުގީގަކަށް ހުރަސްއެޅޭނެ ކަމަށް ބެލެވެންޏާ އެ މުއްދަތައް މަސްއޫލިއްޔަތުން އެކަހެރި ކުރެވިދާނެ ކަމަށެވެ. ތަހުގީގު ނިމުމުން، އެމީހަކު ހިޔާނާތްވީކަން ނުވަތަ އެފަދަ ކަމެއްގައި ބައިވެރިވީކަން ނުވަތަ އިތުރަށް މަގާމުގައި ބަހައްޓައިފިނަމަ ތަނުގެ ހިންގުމަށް ދަތިވެދާނެކަމަށް ތަހުގީގުން ފާހަގަކުރެވިއްޖެ ނަމަ، ސަބަބު އަންގައިދިނުމާއެކު ވަޒީފާއިން ވަކިކުރެވިދާނެ ކަމަށެވެ.

މި ލިޔުމުގައި މި އޮތީ، ވަޒީފާގެ އެއްބަސްވުން ނިމުމަކަށް ގެންނަން "މި ކޯޕަރޭޝަނުން ނިންމައިފައި" ވާ ކަމަށް ކަމަށާއި، އެހެން ކަމަށްވާނަމަ ބޯޑު ރެޒޮލިޔުޝަނެއް އޮންނަންވާނެ ކަމަށެވެ. އަދި ކޯޕަރޭޝަނުގެ ނިންމުމެއް ކަމަށްވާނަމަ ނިންމޭނީ، ޑިރެކްޓަރުންގެ ބޯޑުގެ ރެޒޮލިޔުޝަނަކުން ކަމަށްވާއިރު، ވަޒީފާއިން ވަކިކުރި މީހުން ޓްރައިބިއުނަލަށް މައްސަލަ ހުށަހަޅައި، ކޯޕަރޭޝަނުގެ ނިންމުން" ނިންމި ބޯޑު ރެޒޮލިޔުޝަން ކޮބައިތޯ ސުވާލުކުރެވިދާނެ ކަމަށެވެ. އޭރުން ދައްކާނެ އެއްޗެއް ނޯންނާނެ ކަަމަށް މައުރޫފް ވިދާޅުވިއެވެ.

ވަޒީފާއާބެހޭ ޤާނޫނުގެ 23 ވަނަ މާއްދާގެ (ހ) އާއި (ށ) އަށް ހަވާލާދިނަސް، އެފަދަ ހާލަތެއް މެދުވެރިވިކަން ބަޔާންކޮށްދިނުން އެޗްޑީސީގެ މައްޗަށް ލާޒިމުވާނެ ކަމަށް މައުރޫފް އިތުރަށް ފާހަގަކޮށްފައިވެއެވެ. ވަޒީފާއާބެހޭ ޤާނޫނުގައި ބަޔާންކުރަނީ، މުވައްޒަފަކު ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެއް ކަމަށެވެ. އަދި، އެ މުވައްޒަފަކު ވަޒީފާއިން ވަކިކުރި ސަބަބަކީ، އެކަށީގެންވާ ސަބަބެއް ކަމުގައި ވަޒީފާދޭ ފަރާތަށް ސާބިތުކޮށް ނުދެވިއްޖެނަމަ، އޭނާ ވަޒީފާއިން ވަކިކުރީ އެކަށީގެންވާ ސަބަބެއްނެތި ކަމުގައި ބެލެވޭނެކަމަށެވެ.

ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި މި ސަރުކާރުގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ހަދައިދިންކަން ކަށަވަރުވެ، އެޗްޑީސީ އަށް ކޮރަޕްޝަންގެ ގިނަ ތުހުމަތުތަކެއް ކުރެވިފައި ވަނިކޮށް އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު ވަނީ އިސްތިއުފާދެއްވައިފައެވެ.

ހުޅުމާލެއިން ގޯތި ވިއްކުމުގެ ބޮޑު ވައްކަން ފަޅާ އަރާ އެކަމާ ގުޅުންހުރި އެކި ވާހަކަތައް ތިލަވަމުން ދަނިކޮށް މީގެ 2 ހަފްތާ ކުރިން ވެސް ކުރީ ސަރުކާރުގެ ނަމުގައި ވަގު ޑޮކިއުމެންޓް ހަދައިދީގެން ހައުސިންގ ޑިވެލޮމަންޓް ކޯޕަރޭޝަން (އެޗްޑީސީ) އިން ގޯތި ވިއްކި ކަން ރާއްޖެއެމްވީ އަށް ވަނީ ކަށަވަރުވެފައެވެ.