ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ ފަޒީލް ރަޝީދަށް ނުހައްގުން ގޯއްޗެއް ދީފައިވާ ކަން ތިލަވީ ބުދަ ދުވަހު މީސްމީޑިއާ އަށް ލީކްކޮށްލި ލިޔުންތަކަކާއި އެކުގައެވެ.
މިކަމާ ގުޅޭ ނޫސްވެރިންގެ ބައްދަލުވުމެއް ބުރާސްފަތި ދުވަހުގެ ރޭ ފުލުހުން ބާއްވާފައި ވާއިރު، އެ ބައްދަލުވުމުގައި ފުލުހުން ދެއްކި ވާހަކަތަކުން ލިބުނު ޖަވާބަށް ވުރެ އުފެދުނު ސުވާލު ގިނަ އެވެ.
އެއްފަހަރު ވިދާޅުވަނީ މިހާތަނަށް ބެލި ބެލުމުން ކުރީ ސަރުކާރުން ލިޔުން ދިންކަމަށް އެނގޭ ކަަމަށެވެ. ކުރީ ސަރުކާރުން ދިން ލިޔުމެއް ކަމަށް ފުލުހުން ނިންމި ކަމަށް ވިދާޅުވަނީ އެ ލިޔުމުގެ ތާރީޚަށް ބަލާފައި ކަމަށް ވިދާޅުވިއެވެ. ކުރީ ސަރުކާރުން ދިން ލިޔުމެއް ކަމަށް ދެން ދެއްކެވި އަނެއް ހުއްޖަތަކީ ފަޒުލްގެ ބޭބެ ކުރީ ސަރުކާރުގެ ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން އާ ބައްދަލު ކުރި ކަމަށް ބުނެއެވެ. އަނެއް ފަހަރު ވިދާޅުވަނީ އެ ނޫން އެހެން ބޭފުޅުންނާއި ވެސް ތުހުމަތު ކުރެވޭ މީހުން ބައްދަލުކުރި ކަމަށެވެ. ދެން އެއާ އެކު ވިދާޅުވީ ވަކި ފަރާތަކުން ވަކި ކަމެއް ކުރި ކަމަށް ނިންމީ އަކީ ނޫން ކަމަށެވެ. އަދި ލިޔުން ތަކުގެ ސައްހަކަން ކަށަވަރު ކުރުމުގެ މަސައްކަތް ކުރަމުންދާ ކަމަށެވެ. ދެއްވަން އުޅޭ ސްޓޭޓްމެންޓެއް ޚުދު އެ ބޭފުޅުންނަކަށް ވެސް ސާފުވާހެން ހިޔެއް ނުވެއެވެ.
ފަޒީލުގެ ބަހުގެ މައްޗަށް އެކަނި ފުލުހުން އަކްރަމް ގެ ނަން ހާމަ ކުރި އިރު، އަކްރަމް އާ ފުލުހުން ސުވާލު ކުރި ކަމަަކަށް ނުބުނެއެވެ. އަކްރަމް ގެ ބަހެއް ނުލިބި ނުވަތަ އެހެން ހެކި ނޫސްވެރިންނަށް ބުނެ ނުދީ ބައްދަލު ކުރި ކަމަށް ފުލުހުން ނިންމުމުން އަނެއްކާވެސް އުފެދީ ސުވާލެވެ. މައްސަލަ ރައްދުވާ ފަރާތުގެ ބަހަށް އެކަން އެއޮތީ ގޮތަކަށް ނިންމާފައި ކަމަށް ފެނެއެވެ. އަނެއް ކޮޅުން އޭރުގެ ސްޓޭޓް މިނިސްޓަރަކާ އެ މިނިސްޓްރީގެ މަސައްކަތަކާ ގުޅޭ ގޮތުން މީހަކު ބައްދަލު ކުރުމަކީ ވެސް އެކަށީގެންވާ ކަމެކެވެ. އެތައް ބަޔަކު އެ ގޮތައް ކޮންމެ އޮފީހެއްގެ ވެރިންނާވެސް ބައްދަލު ކުރައްވާނެތާއެވެ. އެހެން ނަމަވެސް މައްސަލަ އަކަށް ވާނީ ގަވައިދާ ޚިލާފަށް ކަމެއް ކޮށްދިނުމުން ނުވަތަ ކުރިކަން އެނގޭނެ ހެކިތަކެއް ލިބިގެން ނޫން ބާވައެވެ؟ ފުހުލުން ހަމަ އެކަނި ބުނި އެއްޗަކީ އޭނާ ޝަރުތު ފުރިހަމަ ނުވުމުން ސްޓޭޓް މިނިސްޓަރާ ބައްދަލު ކުރި ކަމަށެވެ. ނޫސް ކޮންފަރެންސް ބަލަން ތިބި މީހުންގެ ހިތުގައި އިތުރު ޝައްކު އުފައްދާ އެހިސާބުން އެވާހަކަ ކުރުކޮށްލެއްވީއެވެ.
އަނެއްކޮޅުން ފުލުހުން ކުރީ ސަރުކާރުން ދިން ލިޔުމެއް ކަމަށް ނިންމި އިރު އެއީ ސައްހަ ލިޔުމެއް ކަމެއް އަދި ކަށަވަރު ނުވާ ކަމަށްވެސް ބުނެފައިވެއެވެ. އެހެން ކަމަށް ވާ ނަމަ އެ ލިޔުން އެއީ ސަރުކާރަކުން ދިން އެއްޗެއް ކަމަށް ބަލަނީ ކިހިނެއްތޯ ވެސް ސުވާލު އުފެދެއެވެ. ސަރުކާރަކުން ފޯޖު ކޯށްފައި އޮތް ލިޔުމެއް ނުދޭނެ އެވެ. އެއީ ފޯޖު ކޮށްފައި އޮތް ލިޔުމެއް ނަމަ އެއީ ސަރުކާރުން ދިން ކަމަށް ދައްކަން ހެދި ބޮޑު މަކަރު ހީލަތުގެ އަމަލެކެވެ. އެއީ މުޅިން ދެ ކަމެކެވެ. އަނެއްކޮޅުން އެ ގޯއްޗަކީ "ބިންވެރިޔާ" ސްކީމުގެ ދަށުން ދިން ގޯއްޗެއް ކަމަށް އުޅޭ ފަރާތަކުން ގެންނާނީ ކުރީ ސަަރުކާރުން ދިން ލިޔުމެއް ކަމަށް ގަބޫލު ކުރުވަން ކުރެވޭނެ ހުރިހާ ކަމެއް ކޮށްގެން ނޫންބާވައެވެ؟ ހުރިހާ ކަމެއް އޭގައި ހިމަނައިގެން ނޫންތޯއެވެ؟ މިނިސްޓްރީގެ ނަމާއި ތާރީޚް ތައް ވެސް ހުންނާނީ ހަމަ އެގޮތައް ދޭހަވާ ގޮތައް ނޫންބާވައެވެ؟
ނޫސްވެރިންގެ ބައްދަލުވުމުގައި އަދި ބައްދަލުވުން ނިންމާފައި ވެސް ނޫސްވެރިން މިކަމާ މެދު އެތައް ސުވާލެއް ފުލުހުންނާ ކުރިމަތިކުރުވިއެވެ. ތުހުމަތު ކުރެވޭ މީހާ އަށް ވުރެ ކުރިން ކުރީ ސަރުކާރުގެ ސްޓޭޓް މިނިސްޓަރެއްގެ ނަން ގެނައުމުން އެއީ އާއްމު އުސޫލުން ކަން ކުރާ ގޮތްތޯ ވެސް ނޫސްވެރިން ސުވާލުކުރިއެވެ. އެ ވާހަކަ އަށް ފުލުހުންގެ ސާފު ޖަވާބެއް ނެތެވެ. އާއްމު އުސޫލުން ފުލުހުން ތަހުގީގު ނިމެންދެން ތަހުގީގައި ހިމެނޭ މީހުންގެ މައުލޫމާތުތައް ހާމަ ނުކުރެއެވެ. ވަކި މީހެއްގެ ނަން އެކަނި ހާމަކުރި ސަބަބެއް ވެސް ސާފުކޮށެއް ނުދެވުނެވެ.
ނޫސް ކޮންފަރެންސް ނިމުމުން ވިސްނާލިއިރު ފުލުހުން މިހާރު މި ބަލަނީ ކޮން މައްސަލައެއްތޯ ވެސް ސުވާލު އުފެދިއްޖެއެވެ. ބަލަމުންދަނީ ޑޮކިއުމެންޓްތައް ފޯޖްކުރިތޯ ނުވަތަ ނޫންތޯ ދެނެގަތުމުގެ މައްސަލަ ކަމަށް ވާނަމަ އަސްލު ކަށަވަރު ނުވާ ލިޔުމެއްގެ މައްޗަށް ބިނާކޮށް ތަހުގީގުގެ ފުރަތަމަ 24 ގަޑީއިރު ތެރޭ ކުރީ ސަރުކާރު މަންޒަރުގެ ތެރެއަށް ގެނެސް ތަހުގީގު ގެ މިސްރާބު މިގެންދަނީ ކޮން ދިމާލަކަށް ކަމާ މެދުވެސް ސުވާލު އުފެދެއެވެ.
ތަހުގީގަށް ލިބިފައިވާ ލިޔުންތަކާ ގުޅިގެން، ލިޔުން ލިބުނު ފަރާތްތަކާ ސުވާލު ކުރުމުން އެ ލިޔުންތަކަކީ ކުރީ ސަރުކާރުން ދީފައިވާ ލިޔުންތަކެއް ކަމަށް ބުނާ ކަމަށް ތަކުރާރުކޮށް ފުލުހުން އައީ ބުނަމުންނެވެ. އެހެންނަމަވެސް ތުހުމަތު ކުރެވޭ ފަރާތްތަކުގެ ބަހަށް ކަން ނިންމުން ފިޔަވާ ފުލުހުންނަށް އެއީ ކުރީ ސަރުކާރުން ދިން ލިޔުންތަކެއް ކަމަށް ނިންމާ، އިއުލާނު ކުރި އިތުރު ގަބޫލު ކުރެވޭ ސަބަބެއް ނުދެއްކުނެވެ.
ނުވިތާކަށް އެ ލިޔުންތަކާއި ކުރީ ސަރުކާރުގެ ބިންވެރިޔާ އަދި ގެދޮރުވެރިޔާ ސްކީމްގެ ލިޔުންތަކާއި ލިޔެފައިވާ ގޮތާއި ތައްގަނޑު ޖެހުންފަދަ ކަންކަމުގެ ތަފާތު އެބަ ހުރި ނޫންތޯ ސުވާލުކުރުމުން އެކަމަށް ވެސް ފުލުހުންގެ ޖަވާބެއް ނެތެވެ. އެކަން ދަނީ ބަަލަމުންކަމަށް ވިދާޅުވިއެވެ. ސުވާލަކީ ބަލާ ނުނިމެނީސް ފޯޖަރީގެ ތުހުމަތުކުރެވޭ މީހާގެ ބަހަށް އެކަނި ބެލުމަށް ފަހު އާއްމުންނާ ގުޅުން ހުރި މިފަދަ މުހިންމު މައްސަލަ އެއްގައި ފުލުހުން ބަސް ބުނަންޖެހުނީ ކީއްވެތޯއެވެ؟
ކޮންމެއަކަސް ބުރާސްފަތި ދުވަހުގެ ރޭގެ ފުލުހުންގެ ނޫސްވެރިންގެ ބައްދަލުވުން ނިމުނު އިރު ލައްކަ ގިނަ ސުވާލު އުފެދިއްޖެއެވެ.
ނޫސްވެރިންގެ ބައްދަލުވުމަށް ބަލާލުމުން ފެނުނީ ވަކި މިސްރާބަކަށް ތަހުގީގުގެ ހުންގާނު ހިފާފައިވާ މަންޒަރުކަމަށް ބުނާ މީހުން މަދެއް ނޫނެވެ. ޕްރޮފެޝަނަލް މަސައްކަތް ކުރާނެ ކަމުގެ ޔަގީންކަން ދަމަހައްޓަން ހުރިހާ ގޮތަކުން ވެސް ވާޖިބު ފުލުހުންގެ އިދާރާ އިން މިފަދަ ހައްސާސް މައްސަލައެއްގައި ސިޔާސީ ކުލަ ޖައްސާ، މައްސަލައިގެ ފޯކަސް އަނބުރާލަން އުޅޭ ކަމުގެ ނިޝާންތައް ފެނުމުން އެއީ ދެރަ ކަމެކެވެ.
