ފީފާ އަދި ސަރުކާރުން ވެސް ކުލަބުތަކަށް މާލީ ގޮތުން އެހީތެރިކަން ފޯރު ކޮށްދެނީ
ފީފާ އިން އަންނަނީ އެއް މިލިއަން ރުފިޔާގެ މާލީ އެހީތެރިކަން ދިނުމަށް މަސައްކަތް ކުރަމުންނެވެ. އަދި ސަރުކާރުން އަންނަނީ 1.5 މިލިއަން ރުފިޔާގެ މާލީ އެހީތެރިކަން ދިނުމަށް މަސައްކަތް ކުރަމުންނެވެ.
ކުޅިވަރު ވަޒީރު ރާފިޢުއާ ބައްދަލު ކުރެއްވުމަށްފަހު ފީފާ ވަފުދުގެ ބޭފުޅުން އަދި އެފްއޭއެމް ނޯމަލައިޒިން ކޮމެޓީގެ ބައެއް ބޭފުޅުން
ދުނިޔޭގެ ފުޓުބޯޅައިގެ މައި އިދާރާ (ފީފާ) އާއި ދިވެހި ސަރުކާރުން، ރާއްޖޭގެ ފުރަތަމަ ޑިވިޝަންގެ ކުލަބުތަކަށް މާލީ ގޮތުން އެހީތެރިކަން ފޯރުކޮށްދިނުމަށް މަސައްކަތް ކުރަމުން އަންނަ ކަމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު ވިދާޅުވެއްޖެ އެވެ.
"ރާއްޖެ އެމްވީ"އާ ވާހަކަ ދައްކަވަމުން ޒުހޫރު ވިދާޅުވީ ރާއްޖޭގެ ފުޓުބޯޅަ ސީޒަން އަންނަ އަހަރުގެ ފެބްރުވަރީ މަހުގެ ތެރޭގައި ފެށުމަށް މަސައްކަތް ކުރައްވަމުން އަންނަ ކަމަށެވެ. ނަމަވެސް، އެކަމުގައި ބޮޑެތި ގޮންޖެހުންތަކެއް ކުރިމަތިވާ ކަމަށާއި، އެންމެ ބޮޑު ގޮން ޖެހުމަކީ ކުލަބުތަކަށް އޮތް މާލީ މައްސަލަ ކަމަށް ޒުހޫރު ވަނީ ވިދާޅުވެފަ އެވެ.
ޒުހޫރު ވިދާޅުވީ އަލުން ފުޓުބޯޅަ ފެށުމަށްޓަކައި ކުލަބުތަކަށް މާލީ ގޮތުން އެހީތެރިކަން ފޯރުކޮށްދިނުމަށް ފީފާއާ ކުރި މަޝްވަރާތަކުގައި، އެކަމުގެ މަސައްކަތް ކުރަމުން އަންނަ ކަމަށެވެ. އެގޮތުން ކުރިއަށް އޮތް އަހަރަށް، ފުރަތަމަ ޑިވިޝަންގެ ކޮންމެ ކުލަބަކަށް އެއް މިލިއަން ރުފިޔާގެ އެހީތެރިކަން ހަމަޖެއްސުމަށް ފީފާ އިން މަސައްކަތް ކުރަމުން އަންނަ ކަމަށް ޒުހޫރު ވިދާޅުވި އެވެ. މީގެ ކުރިން އެފްއޭއެމް އިން ކުލަބުތަކަށް ފައިސާ ދެމުން އައި ނަމަވެސް، ފީފާ އިން މާލީ ގޮތުން ވެދޭ އެހީތެރިކަމަކީ ދާއިމީ ކަމެއް ނޫންކަން ފާހަގަ ކުރައްވައި ޒުހޫރު ވިދާޅުވީ، އެއީ އަލުން ފުޓުބޯޅަ ފެށުމަށް ފީފާ އިން ވެދޭ އެހީތެރިކަމެއް ކަމަށެވެ.
ފީފާގެ އިތުރުން، ސަރުކާރުން ވެސް ކުލަބުތަކަށް އެހީތެރިކަން ދިނުމަށް މަސައްކަތް ކުރަމުން އަންނަކަން ޒުހޫރު ވަނީ ފާހަގަ ކުރައްވައިފަ އެވެ. އެގޮތުން ސަރުކާރުން މަސައްކަތް ކުރަމުން އަންނަނީ، ފުރަތަމަ ޑިވިޝަންގެ ކޮންމެ ކުލަބަކަށް 1.5 މިލިއަން ރުފިޔާގެ މާލީ އެހީތެރިކަން ފޯރުކޮށްދިނުމަށް ކަމަށް ޒުހޫރު ވިދާޅުވެފައިވެ އެވެ. ފުރަތަމަ ޑިވިޝަންގެ އިތުރުން، ދެ ވަނަ ޑިވިޝަންގެ ކުލަބުތަކަށް ވެސް ވީވަރަކުން އެހީތެރިކަން ފޯރުކޮށްދިނުމަށް މަސައްކަތް ކުރަމުން އަންނަ ކަމުގައި ޒުހޫރު ވަނީ ވިދާޅުވެފަ އެވެ.
ފީފާ އިން ރާއްޖެ ނޯމަލައިޒް ކޮށްފައިވާއިރު، ނޯމަލައިޒިން ކޮމެޓީން އަންނަނީ އަލުން ފުޓުބޯޅަ ސީޒަން ފެށުމަށް މަސައްކަތް ކުރަމުންނެވެ. މީގެ ކުރިން ޒުހޫރު ވިދާޅުވެފައި ވަނީ، އެފްއޭއެމް އިން ކުލަބުތަކަށް ފައިސާ ދިނުމުގެ ކަންކަން ކޮށްފައި ވަނީ އެކަން ކުރަން އޮންނަ ގޮތަށް ނޫން ކަމަށެވެ. ޚާއްސަކޮށް ކުލަބުތަކަކީ އެފްއޭއެމް އިން ފައިސާ ދީގެން ހިންގަން އޮންނަ ތަނެއް ނޫން ކަމަށާއި، ނަމަވެސް އެފްއޭއެމް އިން ސްޕޮންސާ ހޯދުމުގެ މަސައްކަތް ކުރެވިދާނެ ކަމަށް ވެސް ޒުހޫރު ވިދާޅުވެފައިވެ އެވެ.
