ބުދަ ދުވަހު އާންމުންނާ ހަމަ އަށް ތިލަވި އެޗްޑީސީ އިން ހިންގި ބިމުގެ ބޮޑު ވައްކަން ހިނގާފައިވަނީ މީގެ އެތައް މަހެއް ކުރިން ކަމާއި އެކަން އޮތީ ސަރުކާރުން ފަސްއަޅާ ފޮރުވާފައިކަން ހާމަ ވެއްޖެއެވެ.
ސޯޝަލް މީޑިއާ ފަޅާ އަރުވާލި ލިޔެކިޔުންތަކަށް ބަލާއިރު، ހުޅުމާލޭގެ 20821 އަދި 20768 ނަންބަރު ގޯތި ތަކަކީ ހައުސިންގ މިނިސްޓްރީން އެއްވެސް ފަރާތަކާ ހަވާލު ކޮށްފައި ނުވާ ގޯތި ތަކެއް ކަމަށް ހައުސިން މިނިސްޓްރީގެ 66 ނަންބަރު ސިޓީން 15 އޮގަސްޓް 2024 ގައި އެޗްޑީސީ އަށް އޮތީ އަންގާފައެވެ.
އެޗްޑީސީ އަށް ހައުސިންގ މިނިސްޓްރީން ފޮނުވި 66 ނަންބަރު ސިޓީ އަކީ އެ ކޯޕަރޭޝަނުން 24 ޖުލައި 2024 ގައި ފޮނުވި ސިޓީ އަކަށް ޖަވާބު ދިނުމުގެ ގޮތުން ފޮނުވާފައިވާ ސިޓީއެކެވެ.
ސިޓީގެ ޖަވާބުގައި ހައުސިންގ މިނިސްޓްރީން ބުނެފައި އޮތީ، ސަރުކާރުން ކުރިއަށް ގެންދާ ގެދޮރުވެރިން ޕްރޮގްރާމްގެ ދަށުން މާލެ ސަރަހައްދަށް އަމާޒުކޮށް ކުރިއަށް ގެންދާ "ބިންވެރިޔާ" ގޯތި ލިބިފައިވާ ފަރާތްތަކުގެ ތެރެއިން ހަވާލާ ދެވުނު އެޗްޑީސީގެ ސިޓީގައި ބަޔާން ކޮށްފައިވާ ފަރާތްތަކަކީ އެ ސްކީމުން ގޯއްޗަށް އެދި އެޕްލިކޭޝަން ހުށަހަޅާފައިވާ ފަރާތްތަކެއް ނޫންކަން އެ ސްކީމްގެ ޑޭޓާބޭސް އިން ދައްކާ ކަމަށެވެ.
އޮގަސްޓް މަހުގެ 15 ގައި ހައުސިންގ މިނިސްޓްރީން ފޮނުވި ސިޓީން "ބިންވެރިޔާ" ސްކީމުން ބޭރުން ބަޔަކަށް ގޯތި ދީފައިވާ ކަން ސަރުކާރަށް ސާފުކޮށް އެނގެން އޮތް ނަމަވެސް މިހާތަނަށް އެއްވެސް ތަހުގީގެއް މިކަމާ ގުޅިގެން ހިންގި ކަމުގެ މައުލޫމާތެއް ސަރުކާރުން ހަމާ ކޮށްފައެއް ނުވެއެވެ.
އެހެން ނަމަވެސް ޑިސެމްބަރު 18 ވީ ބުދަ ދުވަހު ގަވައިދާ ޚިލާފަށް ލިޔެކިޔުންތައް އޮޅުވާލައިގެން ބަޔަކަށް ގޯތި ދިން ކަމުގެ ލިޔެކިޔުންތައް ސޯޝަލް މީޑއާ ގައި ފަޅާ އަރުވާލުމާއެކު އެކަމުގެ ތަހުގީގު ފެށި ކަމަށް ފުލުހުން ވަނީ ހާމަ ކޮށްފައެވެ.
މިކަމާ ބެހޭ ގޮތުން ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް އެކްސް ގައި ކުރެއްވި ޕޯސްޓެއްގައި “ސަރުކާރުގެ ވުޒާރާ އަކުން ސަރުކާރުގެ ކުންފުންޏަކަށް، މާސިންގާ ހިޔާނާތެއްގެ ވާހަކަ ބަޔާންކޮށް ‘15 އޮގަސްޓު 2024’ ގައި ފޮނުވި ސިޓީއެއް، އޭގެ 5 މަސް ފަހުން އާއްމުންނަށް ތިލަވެގެން އެކަމާއި ތެޅިފޮޅިގަތް އިރު، މިކަހަލަ ކިތައް ކަންތައް ފަސްއަޅާ ފޮރުވާފައި ހުންނާނެތޯ؛" އައްސަވާ ސުވާލު އުފައްދަވާފައިވެއެވެ.
