ދެވަނަ މެޗުވެސް ޔުނައިޓެޑުން ކާމިޔާބު ކޮށްފި

އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑު ކުޅުނު ދެވަނަ މެޗު ވެސް އެ ޓީމުން ކާމިޔާބު ކޮށްފިއެވެ.

ހޮނިހިރު ދުވަހު ސްވަންސީއާއި ދެކޮޅަށް ކުޅުނު މެޗު އެ ޓީމުން ކާމިޔާބު ކޮށްފައިވަނީ 4-0 ގެ ނަތީޖާއަކުންނެވެ.

މި މެޗުގެ ފުރަތަމަ ހަމަލާ އުފައްދާފައި ވަނީ ސްވަންސީއިންނެވެ. އެ ޓީމުގެ ފޯވާޑް ޖޯޑަން އަޔޫ ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއާއިއެވެ. މި ހަމަލާއަށް ފަހު މެޗުގެ ކޮންޓްރޯލް ޔުނައިޓެޑުން ވަނީ ނަގާފައެވެ. ފުރަތަމަ ހާފު އެއްވަރުވެގެން ނިމެން ދަނިކޮށް މެޗުގެ 45 ވަނަ މިނުޓުގައި ޔުނައިޓެޑަށް ލީޑު ނަގައިދިނީ އެ ޓީމުގެ ޑިފެންޑާ އެރިކް ބެއިލީއެވެ.

ދެވަނަ ހާފުގައި ވެސް ޔުނައިޓެޑުން ވަނީ ތަފާތު މޮޅު ކުޅުމެއް ދައްކާފައެވެ. އެގޮތުން އެ ޓީމުން ވަނީ ފުލުފުލުގައި އެތަކެއް ހަމަލާތަކެއް ސްވަންސީގެ ގޯލަށް އަމާޒު ކޮށްފައެވެ. އެ ޓީމުން ވަނީ ހަތަރު މިނިޓުތެރޭގައި ތިން ގޯލު ކާމިޔާބު ކޮށްފައެވެ.

އެގޮތުން 80 ވަނަ މިނެޓުގައި ހެންރިކް މިޙްތަރިޔާން ތަނަވަސްކޮށްދިން ފުރުސަތަކުން ޔުނައިޓެޑުގެ ލީޑު ފުޅާ ކޮށްދިނީ އެ ޓީމާއި އަލަށް ގުޅުނު ފޯވާޑް ރޮމެލޫ ލުކާކޫއެވެ. އޭގެ ދެ މިނުޓު ފަހުން ޕޮގްބާވަނީ ޔުނައިޓެޑުގެ ތިންވަނަ ލަނޑު ކާމިޔާބު ކޮށްދީފައެވެ. މެޗުގެ 84 ވަނަ މިނެޓުގައި ޔުނައިޓެޑަށް އެ ޓީމުގެ ހަތަރު ވަނަ ގޯލު ކާމިޔާބު ކޮށްދިނީ އެންތަނީ މާޝިއާލްއެވެ.

މި މޮޅާއިއެކު ޔުނައިޓެޑު އޮތީ ކުޅުނު ތިން މެޗުން ލިބުނު ހަ ޕޮއިންޓާއިއެކު ތާވަލުގެ އެއްވަނައިގައެވެ. އެ ޓީމުގެ މެޗެއް ދެން އޮންނާނީ އޮގަސްޓް މަހުގެ 26 ވަނަ ދުވަހުއެވެ.