ސަރުކާރާއި އެތައް ވާހަކައެއް ދެއްކި ފަހުން ތާޖުއްދީން ސްކޫލް ހޯލް އަންގާރަ ދުވަހު ލިބޭނެކަމަށް ސަރުކާރުން ވަނީ ބުނެފައި
ރޯވި އިމަރާތުން ސަލާމަތްކުރެވުނު ލިޔެކިޔުންތައް ފޮހެ ރައްކާކުރުމުގައި ކައުންސިލްގެ މުވައްޒަފުން ހަރަކާތްތެރިވަނީ
ހައުސިންގ މިނިސްޓްރީގައި ހިނގި އަލިފާނުގެ ހާދިސާއާއި ގުޅިގެން 3 ދުވަސް ތެރޭގައި މިނިސްޓްރީތައް ހިންގާނެ ތަނެއް ސަރުކާރުން ހަމަޖެއްސި އިރު، މާލެ ރައްޔިތުންނާއި އެންމެ ގުޅުން ބޮޑު އަދި ކޮންމެ ދުވަހަކު ހިދުމަތްދޭ ސިޓީ ކައުންސިލްގެ މަސައްކަތްތައް ކުރާނެ ތަނެއްވެސް އަދި ގެއްލުން ލިބުނު ލިޔުންތައް ރައްކާކޮށް ރިކަވަރކުރާނެ ތަނެއް ނުދެއްކުނު ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
ބުރާސްފަތި ދުވަހު ހައުސިންގ މިނިސްޓްރީގައި ހިނގި އަލިފާނުގެ ހާދިސާގައި، އެ ބްލޮކްގައި ހުންނަ މާލެ ސިޓީ ކައުންސިލްގެ ވައިޓަލް އަދި ލޭންޑް ސެކްޝަންގެ އޮފީހަށް ގެއްލުންލިބި ލިޔުންތައް ވަނީ ހަލާކުވެ އެކިވަރުގެ ގެއްލުން ލިބިފައެވެ. އަދި ލިޔުންތައް ރައްކާކުރުމަށް ސިޓީކައުންސިލުން އަންނަނީ އަމިއްލައަށް މަސައްކަތްތަކެއް ކުރަމުންނެވެ.
ސިޓީ ކައުންސިލުން ކުރަމުން އަންނަ މަސައްކަތްތަކާއި ގުޅޭގޮތުން މީޑިއާއަށް މައުލޫމާތުދެއްވަމުން އާޒިމް ވިދާޅުވީ މިނިސްޓްރީތަކަށް ތަންތަން ހެދި އޮފީސްތައް ހެދިގެން ދިޔަ މަންޒަރު ފެނިގެން ދިޔައިރު، ކޮންމެ ދުވަހަކު ރައްޔިތުންނާ ގުޅުން ހުރި ރައްޔިތުން ޚިދުމަތް ހޯދަންޖެހޭ ކައުންޓަރު ހުއްޓިފައިވާ ކަމަށެވެ. އާޒިމް ވިދާޅުވީ ކައުންސިލަށް ދިމާވި ކަންތަކުގައި ދައުލަތުގެ ސަމާލުކަމަށް ނައުމަކީ ހިތާމަކުރައްވާ ކަމެއް ކަމަށެވެ. އަދި ސަރުކާރާއި ކައުންސިލުން ވާހަކަދައްކާ މަޝްވަރާކޮށް ހާލަތު ކިޔައިދިނުމުން މިހާރުތަނެއް ހަމަޖައްސައިދޭނެކަމަށް ބުނެފައިވާ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ކައުންސިލުންދޭ ހިދުމަތްތައް ތަރުތީބުކޮށް އިންތިޒާމް ކޮށްގެން ނޫނީ އެވަރުގެ ބޮޑު ކަމެއް އަލުން ކުރިއަށް ގެންގޮސްފި ކަމުގައިވާނަމަ އުނދަގޫތައް ދިމާވެދާނެ ކަމަށެވެ. އަދި ވަރަށް ބޮޑަށް ތަރުތީބު ކުރަންޖެހޭ ކަންކަން އެބަހުރި ކަމަށާއި، މަސައްކަތް ފަށައިގަނެގެންދާ އިރުގައި ޑޮކިއުމަންޓުތައް ވަރަށް ބޮޑަށް ތަރުތީބުކޮށްގެން ނޫނީ މުވައްޒަފުންނަށް ޚިދުމަތް ދޭން ދަތިވާނެ ކަމަށެވެ.
އާޒިމް ވިދާޅުވީ ސަރުކާރާއި އެކު މަޝްވަރާކޮށް އެދިގެން ތާޖުއްދީން ސްކޫލް ހޯލް ހަމަޖައްސައިދީފައިވާ ކަމަށާއި، އަންގާރަ ދުވަހުގެ އެ ސްކޫލުގެ އިމްތިހާނު ނިމުމާއެކު ހޯލް ލިބޭނެކަމަށެވެ. އަދި އެއާއެކު ގެއްލުން ލިބުނު ލިޔުންތައް ސަލާމަތްކުރުމުގެ މަސައްކަތް ހަލުވިކަމާއެކު ކުރިއަށްދާނެ ކަމަށެވެ.
