އިސްލާމް ދީން ނައްތައިލުމަށް ކާފިރުން އަބަދުވެސް މަސައްކަތް ކުރޭ، އެކަމަށް ސަމާލުވާންޖެހޭ: ޚުތުބާ
މައުލޫމާތު ފެތުރުމުގެ ވަސީލަތްތައް ގިނަ މި ޒަމާނުގައި ނޭނގި ތިއްބައި މަޅީގައި ބެދުމަކީ ދުރުކަމެއް ނޫން
ހުކުރު ޚުތުބާ އަޑު އަހަނީ
އިސްލާމް ދީން ނައްތައިލުމަށް ކާފިރުން ކުރާ މަސައްކަތްތައް ބަލައި، އެ ކަމަށް ސަމާލުވުމަށް ހުކުރު ޚުތުބާގައި ގޮވާލައިފި އެވެ.
ކީރިތި ޤުރްއާނާ މެދު، އުފައްދާ ޝުބުހަ މިމައުޟޫއަށް ރާއްޖޭގެ އެކި ކަންކަންކޮޅުތަކަށް އިއްވި ޚުތުބާގައި ބުނީ ކީރިތި ޤުރްއާނަކީ، މާތް اللهގެ ކަލާމްފުޅު ކަމަށާއި، އެއީ ޖިބުރީލުގެފާނު މެދުވެރިކުރައްވައި، އެންމެ ފަހުގެ ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ގެ މައްޗަށް الله تَعَالَى ބާވައިލެއްވި މުއުޖިޒާތް ކަމަށެވެ. އޭގެ ލަފުޒާއި މާނަ އައިސްފައިވަނީ اللهُ سُبْحَانَهُ وَتَعَالَىގެ ހަޟްރަތުން ކަމަށެވެ.
ޚުތުބާގައި ބުނީ ޤުރްއާން އަހަރެންނާ ހަމައަށް އައިސްފައިވާ ގޮތާއި، އަދި އެ ފޮތުގައި ކުށެއް ނެތްކަމާ މެދު ޝައްކެއް ނެތަސް، މި ކަންކަމުގައި ޝައްކުތަކާއި ޝުބުހަތައް އުފައްދަން ބަޔަކު މަސައްކަތްކުރާ ކަމަށެވެ.
އެ ފޮތް ބާވައިލައްވަން ފެއްޓެވުމާހަމައިން، މިއަދާ ހަމައަށް ވެސް އެ ކަން ދެމި އެބަ އޮތްކަން ފާހަގަކޮށް ޚުތުބާގައި ބުނީ އޭގެ ބޭނުމަކީ، މުސްލިމުން اللهއާއި އެކަލާނގެ ފޮތާއި، ނަބީންނާއި ރަސޫލުންގެ މައްޗަށް ވާ އީމާންކަމުގައި، ބައިބައިކޮށްލައި، އީމާންކަމާއި މަތިވެރި އަގީދާއާ ދުރުކުރުން ކަމަށެވެ. މިއީ މުސްލިމުން ފިސާރި ހުޝިޔާރުވެ ހޭލައި ތިބެން ޖެހޭ ކަމެއް ކަމަށާއި، މައުލޫމާތު ފެތުރުމުގެ ވަސީލަތްތައް ގިނަ މި ޒަމާނުގައި، ނޭނގި ތިއްބައި އެ ފަދަ މީހުންގެ ދަލުގައި ޖެހި މަޅީގައި ބެދުމަކީ ދުރުކަމެއް ނޫން ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އިސްލާމް ދީނުގެ އަދާވާތްތެރިން އަބަދާއި އަބަދު މާތް اللهގެ ނޫރުފުޅު ނިއްވައިލުމަށް މަސައްކަތް ކުރަމުންދާ ކަމަށާއި، އިސްލާމް ދީން ނައްތައިލުމަށް ކާފިރުން ކުރާ މަސައްކަތްތައް ބަލައި، އެ ކަމަށް ފަރުވާތެރިވެ، ސަމާލުވާން ޖެހޭ ކަމަށެވެ. އަދި ދީނުގެ ކަންކަން މޮޅަށް އުނގެނި އަދާވާތްތެރިންގެ ރޭވުންތަކަށް ހޭލައި ތިބޭންޖެހޭ ކަމަށާއި، ކާފިރުން މަސައްކަތްކުރަމުން އަންނަނީ މުސްލިމުން އެ މީހުންގެ ދީނާ ދުރުކުރުމަށް ކަމަށް ޚުތުބާގައި ބުނެފައިވެއެވެ.
މީގެ އިތުރުން ޚުތުބާގައި ބުނީ ޤުރްއާނަކީ މާތް ﷲގެ ކަލާމްފުޅުކަން ކަށަވަރުވާ ގިނަގުނަ އިލްމީ ހެކިތައްވާ ކަމަށެވެ. އޭގެ ތެރެއިން އެއް ހެއްކަކީ، މައިމީހާގެ ބަނޑުގައި ދަރިފުޅު ގަރުބަގަތީއްސުރެ، ފުރިހަމަ އިންސާނަކަށް ވުމާ ހަމައަށް އަންނަ ބަދަލުތަކުގެ ވާހަކަ ޤުރްއާނުގައި ތަފުސީލުކޮށް ބަޔާންކުރައްވައިފައިވުމެވެ.
ޚުތުބާގައި ބުނީ ޤުރްއާނާއި ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ ސުންނަތުގައި ހިފުމުން ދެދުނިޔޭގެ އިއްޒަތާއި ޝަރަފު މާތްﷲ ދެއްވާނެ ކަމަށެވެ. އަދި އިސްލާމް ދީން ނައްތައިލުމަށް ކާފިރުން ކުރާ މަސައްކަތްތައް ބަލައި، އެ ކަމަށް ސަމާލުވާނަމަ އެކަންކަން ކާފިރުންނަށް ކާމިޔާބުނުވާނެ ކަމަށް ޚުތުބާގައި ބުނެފައިވެއެވެ.
