ޓެކްސީ ޑްރައިވަރުންގެ މުޒާހަރާގައި ޓޯކުރި ކާރުތަކަށް ފަހިރައިޑް އިން 3 މަސްދުވަހުގެ މަހުފީ ހިލޭ ކޮށްދީފި!
ޑްރައިވަރުން ސުލްހަވެރިކަމާއެކު އިހްތިޖާޖު ކުރަން ނުކުތީ، ސަރުކާރުގެ ސިޔާސަތުތަކުގެ ސަބަބުން ޓެކްސީ ކުރުމުގެ މަސައްކަތައް ބޮޑެތި ހުރަސްތަކެއް ކުރިމަތިވާ ކަމަށް ބުނެ
''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ގިނަ އަދަދެއްގެ ޓެކްސީ ޑްރައިވަރުން ސަރުކާރާ ދެކޮޅަށް ބޭއްވި މުޒާހަރާގެ ތެރެއިން
ބުދަ ދުވަހު ހަވީރު ޓެކްސީ ޑްރައިވަރުން ކުރި ސުލްހަވެރި އިހުތިޖާޖުގައި ޓޯކުރި ކާރުތަކަށް ފަހިރައިޑް އެޕްލިކޭޝަން އިން 3 މަސްދުވަހުގެ މަހުފީ ހިލޭކޮށްދޭން ނިންމައިފިއެވެ.
މިގޮތަށް ނިންމިކަން ހާމަ ކުރީ ބުރާސްފަތި ދުވަހުގެ ރޭ ފަހިރައިޑް މެނޭޖްމަންޓްއިން ސޯޝަލް މީޑިއާ ގައި އާންމު ކުރި ޕޯސްޓެއްގައެވެ.
ޓެކްސީ ޑްރައިވަރުން ކުރިއަށް ގެންދިޔަ އިހްތިޖާޖުގައި 20 އަށްވުރެ ގިނަ ޓެކްސީ ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އަދި އޭގެ އިތުރުން 3 ޑްރައިވަރަކު ހައްޔަރުކޮށް 2 މީހުންނަށް 5 ދުވަހުގެ ބަންދުގެ މުއްދަތު ވަނީ ކޯޓު މެދުވެރިކޮށް އިތުރުކޮށްފައެވެ.
އަދި ހުކުރުވިލޭރެ އާ ހަމައަށް 30 ދުވަހަށް ޓޯކުރި ކާރުތަކުގެ ތެރެއިން 12 ވަރަކަށް ޓެކްސީ ވަނީ ދޫކޮށްލާފައެވެ.
ފުލުހުން ޓެކްސީތައް ޓޯ ކޮށްފައިވަނީ އެއްވެސް އިންޒާރުދިނުމަކާއި ނުލާ އަދި ޓޯކުރުމުގައި ޢަމަލުކުރާ ޤަވާޢިދާވެސް ހިލާފަށް އެއްވެސް އިންޒާރެއް ދިނުމެއް ނެތި ކަމަށް ޑްރައިވަރުން ވަނީ ބުނެފައެވެ.
ޓެކްސީ ކުރާ ފަރާތްތަކުން ސުލްހަވެރިކަމާއެކު އިހްތިޖާޖު ކުރަން ނުކުތީ، ސަރުކާރުގެ ސިޔާސަތުތަކުގެ ސަބަބުން އެމީހުން އާމްދަނީ ހޯދުމަށް ކުރަމުން އައި މަސައްކަތައް ބޮޑެތި ހުރަސްތަކެއް ކުރިމަތިވާ ކަމަށް ބުނެ އެކަން ސަރުކާރުގެ ސަމާލު ކަމަށް ތަކުރާރުކޮށް ގެނެސްފައިވީ ނަމަވެސް އެއްވެސް އެދެވޭ ކުރިއެރުމެއް އެކަމުން ނުލިބުން ކަމަށް އިހްތިޖާޖުގެ ބައިވެރިން ވަނީ ބުނެފައެވެ.
ޓެކްސީ ކުރާ ފަރާތްތަކުން ޑިމާންޑް ކުރާ ކަންތައްތަކުގެ ތެރޭގައި، ސަރުކާރުން ޓެކްސީ ޚިދުމަތް ދިނުމަށް ކުރަމުންދާ މަސައްކަތް ހުއްޓާލުމާއި، ޓްރާންސްޕޯޓް މިނިސްޓަރ އަމީން އިސްތިއުފާ ދިނުން ހިމެނެއެވެ.
