ބީޑަބްލިއުއެފް ޖޫނިއާ މުބާރާތެއްގައި ރާއްޖޭގެ ޒުވާން ކުޅުންތެރިން ވާދަކުރަނީ

ބެޑްމިންޓަން ވޯލްޑު ފެޑަރޭޝަން (ބީޑަބްލިއުއެފް) އިން އިންތިޒާމު ކޮށްގެން ބާއްވާ ޖޫނިއާ މުބާރާތެއްގައި ވާދަކުރުމަށް ރާއްޖޭގެ ޒުވާން ކުޅުންތެރިންތަކެއް ފުރައިފި އެވެ.

ޑިސެމްބަރު މަހުގެ ނުވަ ވަނަ ދުވަހުން ފެށިގެން، 13 ވަނަ ދުވަހުގެ ނިޔަލަށް ތައިލެންޑުގައި ކުރިއަށްދާ މި މުބާރާތަކީ ބީޑަބްލިއުއެފްގެ ބެޓް ޔޮނެކްސް ޕަތުމްތަނީ އިންޓަނޭޝަނަސް ސީރީސް އެވެ. މި މުބާރާތުގައި ރާއްޖޭގެ ޒުވާން ހަތަރު ކުޅުންތެރިޔަކު ވާދަކުރާނެ އެވެ. އެއީ ލައިބާ އަޙުމަދު މަޚްލޫފް (އެލީ)، އައިޝަތު އަމްރާ މުޙައްމަދު، ކިޔާން އާދިލް މުޙައްމަދު އަދި އައިޝަތު ޔޫމީ އަލީ އަޙުމަދު އެވެ.

މީގެ ތެރެއިން އަމްރާ އަދި ކިޔާން ވާދަކުރުމަށް ހަމަޖެހިފައި ވަނީ 15 އަހަރުން ދަށް، އަދި 17 އަހަރުން ދަށުގެ ކެޓަގަރީގަ އެވެ. ލައިބާ އަދި ޔޫމީ ވާދަކުރަނީ 13 އަހަރުން ދަށުގެ ކެޓަގަރީގަ އެވެ.

މުބާރާތަށް ފުރުމުގެ ކުރިން ލައިބާ ބުނީ މިއީ ބީޑަބްލިއުްއެފްގެ މުބާރާތެއްގައި ލައިބާ ވާދަކުރާ ފުރަތަމަ ފަހަރު ކަމަށްވާއިރު، މުބާރާތާ މެދު ވަރަށް ބޮޑު ޝައުޤުވެރިކަމެއް އޮތް ކަމަށެވެ. އަދި މުބާރާތަކީ ވަރަށް އުނދަގޫ މުބާރާތަކަށް ވާނެ ކަމަށާއި، މުބާރާތުން ރަނގަޅު ތަޖުރިބާއެއް ލިބޭނެ ކަމަށް އުންމީދު ކުރާ ކަމަށް ވެސް ލައިބާ ވަނީ ބުނެފަ އެވެ.