ގާނޫނު އަސާސީން ހޯދި ހައްގުތައް އަނބުރާ އިޔާދަކުރުމަށް ނުކުތުމަކީ ކޮންމެ ފަރުދެއްގެ ބޮލުގައި އެޅިފައިވާ ގައުމީ ވާޖިބެއް: އަހުމަދު އަބްދުﷲ

ދިވެހިރާއްޖޭގެ ފެހި ގާނޫނު އަސާސީން ހޯދި ހައްގުތައް އަނބުރާ އިޔާދަކުރުމަށް ނުކުތުމަކީ މިއަދު ދިވެހި ކޮންމެ ފަރުދެއްގެ ބޮލުގައި އެޅިފައިވާ ގައުމީ ވާޖިބެއް ކަމަށް ބާރަށު ދާއިރާގެ ކުރީގެ މެންބަރު އަހުމަދު އަބްދުﷲ ވިދާޅުވެއްޖެއެވެ.

ބުރާސްފަތި ދުވަހުގެ ރޭ ކުރިއަށް ގެންދިޔަ ގާނޫނުއަސާސީގެ ދިފާއުގައި - ބޮޑު ސައްލާގައި ވާހަކަދައްކަވަމުން އަހުމަދު އަބްދުﷲ ވިދާޅުވީ ފެހި ގާނޫނު އަސާސީ ރައްޔިތުން އެދޭ ގޮތަށް ގެނެސް، ތަންފީޒު ކޮށްފައިވަނީ ވަރަށް ދުވަހު ކުރި ބުރަ މަސައްކަތާއެކު، ގިނަ ބައެއްގެ ގުރުބާނީއަކާއެކު ކަމަށެވެ. ނަމަވެސް ގާނޫނު އަސާސީގައިވާ ތިން ބާރު ވަކިކުރެވިފައިވާ ވަކި ކުރުން ހަމައެކަނި އެއްބާރަށް ބަދަލުވެފައިކަން ބުނުމުގެ ޖާގަ މިއަދު އެބަ އޮތް ކަމަށް އޭނާ ވިދާޅުވިއެވެ.

މިސަރުކާރުން ގާނޫނު އަސާސީއަށް ގެނެސްފައިވާ ބަދަލުތަކަށް އިޝާރާތް ކުރައްވައި އަހުމަދު އަބްދުﷲ ވިދާޅުވީ މިއަދު ރައްޔިތުން ނުކުމެ މި ގާނޫނު އަސާސީން ހޯދި ހައްގުތައް އަނބުރާ އިޔާދަ ކުރުމަށް އަދި އެ ހައްގުތައް ކަށަވަރުކުރުމަށް ނުކުތުމަކީ މިއަދު ދިވެހި ކޮންމެ ފަރުދެއްގެ ބޮލުގައި އެޅިފައިވާ ގައުމީ ވާޖިބެއް ކަމަށެވެ. އަދި ވިދާޅުވީ މިހާރު އިސްލާހީ މަސައްކަތް ފެށިފައިވާ ކަމަށާއި، ރައްޔިތުންގެ ހައްގުގައި އަބަދުވެސް އެމްޑީޕީން ނުކުންނާނެ ކަމަށެވެ.

ރައްޔިތުން އިންތިޚާބު ކުރި ވެރިކަމަށް ގައުމު ހިންގުމަށް ފުރުސަތުދިން ފާހަގަކުރައްވައި އަހުމަދު އަބްދުﷲ ވިދާޅުވީ މަގުމަތީގެ އެކިއެކި ހަރަކާތްތައް ނުހިންގި ނަމަވެސް ފާއިތުވި އަހަރު ދުވަހުގެ ތެރޭގައި މިސަރުކާރުން ރައްޔިތުންނަށް ޖެއްސުން ކުރުމާއި، ގޯނާ ކުރުމާއި، ދަތިކުރުމާއި އަދި އެކިއެކި ގޮތް ގޮތަށް ރައްޔިތުން ނިކަމެތި ކުރުން ނޫން އިތުރު ކަމެއް ކޮށްފައިނުވާ ކަމަށެވެ. އެހެންކަމުން މިސަރުކާރާ ދެކޮޅަށް މަގުމައްޗަށް ނުކުންނަން ޖެހިފައިވާ ކަމަށް އޭނާ ވިދާޅުވިއެވެ.

މީގެ އިތުރުން އަހުމަދު އަބްދުﷲ ވިދާޅުވީ މިސަރުކާރުގެ ބީރު ކަންފަތްތަކަށް އަޑު އިއްވުމަށް ޑިސެންބަރު މަހުގެ 10 ވަނަ ދުވަހުގެ ރޭ ބާއްވާ ބޮޑު އެއްވުމަށް ހުރިހާ ރައްޔިތުން އަންނަންޖެހޭ ކަމަށެވެ. އަދި މިސަރުކާރުން ނިކަމެތި ކުރަމުންދާ މަސްވެރިން، ދަނޑުވެރިން، އޮޑިވެރިން، ޓެކްސީ ޑްރައިވަރުން އަދި ރިސޯޓުތަކުގައި މަސައްކަތް ކުރާ މުވައްޒަފުން ނުކުމެ އަޑު އުފުލަންޖެހޭ ކަމަށް އޭނާ ވިދާޅުވިއެވެ.