ރާއްޖެ ބަގުރޫޓުވުމުގެ ހާލަތުން މިހާރު ވަނީ ސަލާމަތް ކުރެވިފައި: މިނިސްޓަރު ޒަމީރު
3 ޑިސެމްބަރު 2024 | އަންގާރަ 07:56މިސަރުކާރު އައިރު ރާއްޖޭގެ ދަރަނި 124 ބިލިއަން ރުފިޔާއަށް އަރާ
ރައްޔިތުންގެ މަޖިލީހުގައި ފިނޭންސް މިނިސްޓަރު މޫސާ ޒަމީރު ވާހަކަދައްކަވަނީ
ދިވެހިރާއްޖެ ބަގުރޫޓުވުމުގެ ހާލަތުން ސަލާމަތް ކުރެވިފައިވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންގާރަ ދުވަހުގެ ރައްޔިތުން މަޖިލީހުގެ ޖަލްސާގައި ފޭދޫ ދެކުނު ދާއިރާގެ މެންބަރު އިބްރާހިމް ދީދީ ވަނީ ރާއްޖޭގެ ދަރަންޏާ ގުޅޭގޮތުން ސުވާލު ކުރައްވާފައެވެ.
މިސުވާލުތަކަށް ޖަވާބު ދެއްވަމުން މިނިސްޓަރު ޒަމީރު ވިދާޅުވީ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވިއިރު، ރާއްޖޭގެ ދަރަނި 124 ބިލިއަން ރުފިޔާއަށް އަރާ ކަމަށެވެ. އޭގެތެރެއިން ގާތްގަނޑަކަށް ދެބައިކުޅަ އެއްބައި އެއީ ވޭތުވެދިޔަ 5 އަހަރު އެމްޑީޕީ ސަރުކާރުގެ ދަރަނި ކަމަށް މިނިސްޓަރު ޒަމީރު ވިދާޅުވިއެވެ. އަދި ވިދާޅުވީ ދަރަންޏާ ގުޅިގެން ޖުމްލަ ރެވެނިއުގެ 24 އިންސައްތަ ހަރަދުކުރަންޖެހޭ ކަމަށެވެ.
ރާއްޖެ ބަގުރޫޓުވުމުން ސަލާމަތް ކުރުމަށް ކުރި މަސައްކަތްތަކަށް އިޝާރަތް ކުރައްވައި މިނިސްޓަރު ޒަމީރު ވިދާޅުވީ ރަހުމަތްތެރި ގައުމުތަކާއެކު މަސައްކަތްކޮށް ދަރަނި ދެއްކުމަށް މުއްދަތު އިތުރުކޮށްފައިވާ ކަމަށެވެ. ރައީސް މުއިއްޒުގެ ހަރުދަނާ ސިޔާސަތާއެކު، ކާމިޔާބު ގިނަ މަސައްކަތްތަކެއް މިދިޔަ އެއް އަހަރުގެ ތެރޭގައި ކުރެވި، ރާއްޖެ ބަގުރޫޓުވުމުގެ ސިނާރިއޯއިން ސަލާމަތް ކުރެވިފައިވާ ކަމަށް މިނިސްޓަރު ޒަމީރު ވިދާޅުވިއެވެ.
މިނިސްޓަރު ޒަމީރު ވިދާޅުވީ ބައިނަލްއަގުވާމީ ރޭޓިންގް އެޖެންސީތަކުން ރާއްޖޭގެ މާލީ ހާލަތާއި ގުޅޭގޮތުން މައުލޫމާތު އާންމުކުރިއިރު ހަރަދުކުޑަކުރުމަށް ލަފާދީފައިވާ ކަމަށެވެ. ނަމަވެސް ބަނގުރޫޓުވެދާނެ ހާލަތާއިމެދު ވާހަކަތައް ދެއްކުން ހުއްޓިފައިވާ ކަމަށް މިނިސްޓަރު ޒަމީރު ވިދާޅުވިއެވެ.
