އަލް ޞާދު އަތުން އަލް ނަޞްރު ބަލިވެއްޖެ

އޭއެފްސީ ޗެމްޕިއަންސް ލީގުގައި އަލް ޞާދާ ދެކޮޅަށް ކުޅުނު މެޗުން އަލް ނަޞްރު ބަލިވެއްޖެ އެވެ.

ހޯމަ ދުވަހުގެ ރޭ އަލް ޞާދާ ދެކޮޅަށް ކުޅުނު މެޗުން އަލް ނަޞްރު ބަލިވީ 2-1 އިންނެވެ. މެޗުގެ ހުރިހާ ލަނޑުތަކެއް ވެސް ފެނުނީ މެޗުގެ ދެ ވަނަ ހާފުގަ އެވެ. މި މެޗުގައި އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ނުކުޅެ އެވެ.

މެޗުގެ ފުރަތަމަ ހާފުގައި އަލް ނަޞްރުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގައި އަލް ނަޞްރަށް ލީޑު ނަގައިދޭން، ސެނެގާލްގެ ސަޑިއޯ މާނޭ އަށް ވަނީ ފުރުސަތު ލިބިފަ އެވެ. މީގެ އިތުރުން އެ ޓީމަށް ކުޅެމުން އަންނަ ބްރެޒިލްގެ ޓަލިސްކާ އަށް ވެސް ލަނޑު ޖަހާނެ ފުރުސަތު ލިބި، ބޭކާރުވެފައިވެ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި އަލް ޞާދުން ވަނީ އަލް ނަޞްރު ކޮޅަށް ލަނޑު ޖަހަައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ޤަތަރުގެ އަކްރަމް ޢަފީފް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ކްރިސްޓޯ ގޮންޒާލޭޒް އެވެ. އޭގެ ފަހުން މެޗުގެ 80 ވަނަ މިނެޓުގައި އަލް ނަޞްރަށް ނަތީޖާ ހަމަހަމަވީ އަލް ޞާދުގެ ރޮމައިން ސައިސް އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އަލް ޞާދަށް ލިބުނު ޕެނަލްޓީ ކާމިޔާބުކޮށް، މެޗުން އެ ޓީމު މޮޅު ކޮށްދިނީ އާދަމް ޔޫނުސް އެވެ.

މޮޅާއެކު އަލް ޞާދު ވަނީ ތާވަލްގެ ހަތަރު ވަނަ އަށް ޖެހިލައިފަ އެވެ. އެއީ މިހާތަނަށް އެ ޓީމު ކުޅެފައިވާ ހަ މެޗުން 12 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އަލް ނަޞްރު އޮތީ 13 ޕޮއިންޓާ އެކު އެވެ. އެއް ވަަނައިގައި އަލް އަހްލީ އޮތްއިރު، ދެ ވަނައިގައި އޮތް އަލް ޙިލާލް އެވެ.