ރައްޔިތުންގެ ބާރު ކެނޑޭ ގޮތަށް ގާނޫނު އަސާސީ ބަދަލު ކުރުމަކީ ދުސްތޫރީ ވެރިިކަމެއް ހިނގާ ގައުމަކުން ކުރާނެ ކަމެއް ނޫން: ޝަރީފް
ޕީއެންސީގެ ބައެއް މެންބަރުންނަށް ބޮޑެތި ހަދިޔާތައް ލިބިފައިވާ ކަމަށް މައުލޫމާތު ލިބޭ
ކެލާ ދާއިރާގެ ކުރީގެބ މެންބަރު އިބްރާހީމް ޝަރީފް ވާހަކަދައްކަވަނީ
ރައްޔިތުންގެ ބާރު ކެނޑޭ ގޮތަށް ގާނޫނު އަސާސީ ބަދަލު ކުރުމަކީ ދުސްތޫރީ ވެރިިކަމެއް ހިނގާ ގައުމަކުން ކުރާނެ ކަމެއް ނޫން ކަމަށް ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝަރީފް ވިދާޅުވީ މެންބަރުންގެ މިނިވަންކަން ގެއްލޭ ގޮތަށް ގާނޫނު އަސާސީއަށް މިގެނައި ބަދަލަކީ ޕީއެންސީގެ މަޖިލިސް މެންބަރުންނަށް މަޖުބޫރުވެގެން ވަރަށް ނުފޫޒާއެކު ކުރިއަށް ގެންދިޔަ ކަމެއް ކަމަށް އެމެންބަރުން ވިދާޅުވާ ކަމަށެވެ. އަދި މިކަންކަން މިހާރު ގައުމުން ފެންނަމުންދާ ކަމަށް އޭނާ ވިދާޅުވިއެވެ.
ޝަރީފް ވިދާޅުވީ ޕީއެންސީގެ ބައެއް މެންބަރުން ވޯޓު ދެއްވައިގެން ގާނޫނު އަސާސީ ބަދަލުކުރިއިރު، ބައެއް މެންބަރުންނަށް ބޮޑެތި ހަދިޔާތައް ލިބިފައިވާ ކަމަށް ވެސް މައުލޫމާތު ލިބޭ ކަމަށެވެ.
ރައްޔިތުންގެ ބާރު ކެނޑި، މަޖިލިސް މެންބަރުންގެ ބާރު ކެނޑޭގޮތަށް ގާނޫނު އަސާސީއަށް ގެނެސްފައިވާ ބަދަލަށް އިޝާރާތް ކުރައްވައި ޝަރީފް ވިދާޅުވީ ދުސްތޫރީ ވެރިިކަމެއް ހިނގާ އެއްވެސް ގައުމަކުން މިފަދަ ބަދަލެއް ގާނޫނު އަސާސީއަށް ނުގެންނާނެ ކަމަށެވެ. މިފަދަ ބަދަލެއް ގެނައުމަކީ ވެސް ގާނޫނު އަސާސީ ހުއްދަ ދޭ ކަމެއް ނޫން ކަމަށާއި، ގާނޫނު އަސާސީގެ އެކިއެކި ބާބުތަކަށް ތައާރަޒުވާއިރު، މިއީ ގެނެވޭނެ ބަދަލެއް ނޫން ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ އަމަލުކުރަމުންދާ ގާނޫނު އަސާސީ ބަދަލު ކުރުމަކީ ވަރަށް ދުރާލާ ވިސްނައިގެން ވަގުތު އޮވެގެން މަޝްވަރާއެކު ކުރަންޖެހޭ މަސައްކަތެއް ކަމަށެވެ. ނަމަވެސް މިސަރުކާރުން ނުފޫޒާއެކު ގާނޫނު އަސާސީއަށް މިގެނައި ބަދަލަކީ ހެޔޮ ނިޔަތުގައި ކުރިކަމެއް ނޫން ކަމަށް އޭނާ ވިދާޅުވިއެވެ.
