މާލޭ ސިޓީ ބަލިކޮށް، ގުރޫޕު ބީގެ އެއް ވަނަ އޭދަފުއްޓަށް
2 ޑިސެމްބަރު 2024 | ހޯމަ 01:40މޮޅާއެކު އޭދަފުށި ވަނީ އެ ޓީމު ކުޅުނު ތިން މެޗުން ވެސް މޮޅުވެ، ނުވަ ޕޮއިންޓާ އެކު އެއް ވަނަ ކަށަވަރު ކޮށްފަ އެވެ. ދެ މެޗުން މޮޅުވެ، ހަ ޕޮއިންޓާ އެކު މާލޭ ސިޓީ އަށް ލިބެނީ ދެ ވަނަ އެވެ.
މެޗުގައި ލަނޑު ޖެހުމަށްފަހު އޭދަފުށީގެ ކުޅުންތެރިން އުފާ ފާޅު ކުރަނީ
މިހާރު ކުރިއަށްދާ ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގެ ފަހު މެޗުގައި މާލޭ ސިޓީއާ ދެކޮޅަށް ކުޅުނު މެޗުން މޮޅުވެ، ބ.އޭދަފުށިން ގުރޫޕު ބީގެ އެއް ވަނަ ކަށަވަރު ކޮށްފި އެވެ.
އާދިއްތަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އޭދަފުށިން ކާމިޔާބު ކުރީ 2-0 އިންނެވެ. އެ މެޗާ ކުރިމަތިލީއިރު، ދެ ޓީމު ވެސް ވަނީ ކުރިން ކުޅުނު މެޗުތަކުން މޮޅުވެފަ އެވެ. އެހެންކަމުން މި ގުރޫޕުގެ އެއް ވަނަ ލިބެން އޮތީ އެ މެޗުން މޮޅުވާ ޓީމަކަށެވެ.
މެޗުގައި އޭދަފުށިން މާލޭ ސިޓީ ކޮޅަށް ލަނޑު ޖަހައި ލީޑު ނެގީ އަޙުމަދު އައިހަމް ޖެހި ލަނޑުންނެވެ. އޭނާ އެ ލަނޑު ޖެހީ އެ ޓީމަށް ލިބުނު ހިލޭ ޖެހުމެއްގައި ފޮނުވާލި ބޯޅަ ގޯލަށް ވައްދާލައިގެންނެވެ. މެޗުގައި ލަނޑު ޖަހަން މާލޭ ސިޓީން މަސައްކަތް ކުރަމުން އަންނަނިކޮށް، ދެ ވަނަ ހާފުގައި އޭދަފުށިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ މުޙައްމަދު ފާސިރު (ފާއްޓޭ) އެވެ.
މޮޅާއެކު އޭދަފުށި ވަނީ އެ ޓީމު ކުޅުނު ތިން މެޗުން ވެސް މޮޅުވެ، ނުވަ ޕޮއިންޓާ އެކު އެއް ވަނަ ކަށަވަރު ކޮށްފަ އެވެ. ދެ މެޗުން މޮޅުވެ، ހަ ޕޮއިންޓާ އެކު މާލޭ ސިޓީ އަށް ލިބެނީ ދެ ވަނަ އެވެ. މުބާރާތުގެ ދެ ވަނަ ބުރުގެ ޖާގަ މި ދެ ޓީމަށް ވެސް އޮތީ ކަށަވަރުވެފަ އެވެ. ދެ މި ގުރޫޕުގައި އޮތް ތ.ތިމަރަފުއްޓާއި، ބ.ތުޅާދޫ އަށް އެންމެ ޕޮއިންޓެއް ވެސް ނުލިބެ އެވެ.
