ކުޑަހުވަދޫ ބަލިކޮށް، ދިއްދޫ ދެ ވަަނައިގައި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ދ.ކުޑަހުވަދޫއާ ދެކޮޅަށް ކުޅުނު މެޗުން މޮޅުވެ، ހއ.ދިއްދޫ އިން ގުރޫޕުގެ ދެ ވަނަ އަށް ޖެހިލައިފި އެވެ.

ގުރޫޕު އޭ ގައި އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ދިއްދޫ އިން ކާމިޔާބު ކުރީ 6-2 އިންނެވެ. މެޗު ފަށައިގެން ދިއްދޫ އިން ވަނީ ރަނގަޅަށް ކުޅެ، ކުޑަހުވަދޫ ކޮޅަށް ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 33 ވަނަ މިނެޓުގައި ދިއްދޫ އަށް ލީޑު ނަގައިިދިނީ އަލީ ފަރީދު އެވެ. އޭގެ ފަހުން ދިއްދޫގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އާދަމް އާޒިމް އެވެ. މެޗުގައި ދިއްދޫގެ އަނެއް ހަތަރު ލަނޑަކީ ވެސް ދެ ވަނަ ހާފުގައި ޖެހި ލަނޑުތަކެވެ. އެގޮތުން ދެ ވަނަ ހާފުގައި ދިއްދޫގެ ތިން ވަނަ ލަނޑު ޖެހީ ފަރީދު އެވެ.

އޭގެ ފަހުން ކުޑަހުވަދޫ އިން ވަނީ ދެ ލަނޑު ޖަހައިފަ އެވެ. އެ ޓީމުގެ ފުރަތަމަ ލަނޑު މުޙައްމަދު ޒިހާން ޙުސެއިން ޖެހިއިރު، ހާރޫން އިބްރާހީމްގެ ލަނޑާ އެކު ކުޑަހުވަދޫ އިން ވަނީ ފަރަގު ކުޑަ ކޮށްފަ އެވެ. ނަމަވެސް މެޗުގައި ދިއްދޫ އިން ވަނީ އިތުރު ތިން ލަނޑު ޖަހައިގެން މޮޅުވެފަ އެވެ. މެޗުގައި ދިއްދޫގެ ފަހު ތިން ލަނޑު ވެސް ޖެހީ އަހުޒަމް ރަޝީދު އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު ދިއްދޫ މި ގުރޫޕުގެ ދެ ވަނައިގައި އޮތީ މިހާތަނަށް ކުޅުނު ދެ މެޗުން ތިން ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަަނައިގައި ދ.މީދޫ އާއި ހަތަރު ވަނައިގައި އޮތް ކުޑަހުވަދޫ އަށް ވެސް ލިބެނީ ތިން ޕޮއިންޓެވެ. މި ގުރޫޕުގެ އެއް ވަނައިގައި ފުވައްމުލައް ސިޓީ ދެ ވަނަ ބުރުން ޖާގަ ހޯދާފައިވާއިރު، ދެ ވަނަ ޖާގައިގެ ވާދަވެރިކަން މިހާރު މި ވަނީ ބޮޑުވެފަ އެވެ.