މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ބ.ކެންދޫ އާއި ކ.މާފުށި ބައްދަލު ކުރި މެޗު އެއްވަރުވެއްޖެ އެވެ.
މުބާރާތުގެ ގުރޫޕު ޑީ ގައި ހޮނިހިރު ދުވަހުގެ ރޭ ހަވީރު މި ދެ ޓީމު ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ކެންދޫ އިންނެވެ. ނަމަވެސް މާފުށިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.
މެޗުގެ ފުރަތަމަ ހާފުގައި ކެންދޫ އަށް ލަނޑު ޖަހައި ލީޑު ނަގައިދިނީ ޤާސިމް ސައްމާމު އެވެ. މިއީ ކެންދޫ އަށް ލިބުނު ކޯނަރެއްގައި ހުރަސްވި ބޯޅަ ބޮލުން ގޯލަށް ވައްދާލައިގެން އޭނާ ޖެހި ލަނޑެކެވެ. ލީޑުގައި އޮވެ ކުޅެމުން ދިޔަ ކެންދޫ އަށް މެޗުގައި ލަނޑު ޖަހާނެ އިތުރު ފުރުސަތު ލިބުނުއިރު، މާފުއްޓަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގެ ފުރިހަމަ ވަގުތު ހަމަވާން ކުޑަ ވަގުތު ކޮޅަކަށް ވެފައި ވަނިކޮށް، މާފުއްޓަށް މެޗުގެ ނަތީޖާ ހަމަހަމަ ކޮށްދިނީ އަލީ އުޒައިރު މުޙައްމަދު އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެން އޭނާ ޖެހި ލަނޑެކެވެ.
މި ނަތީޖާ އާއެކު ކެންދޫ އޮތީ މި ގުރޫޕުގެ ހަތަރު ވަނައިގަ އެވެ. އެއީ މިހާތަނަށް އެ ޓީމު ކުޅުނު ދެ މެޗުން އެއް ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އޮތް މާފުއްޓަށް ވެސް ލިބެނީ އެންމެ ޕޮއިންޓެކެވެ.
