ޑޮލަރު ލިބުން ދަތިވެ، ރާއްޖޭގައި މަސައްކަތް ކުރާ އިންޑިއާ ރައްޔިތުންނަށް ގައުމަށް ފައިސާ ނުފޮނުވޭ މައްސަލަ އެމްއެމްއޭ އަށް

ޑޮލަރު ލިބުން ދަތިވެ، ރާއްޖޭގައި މަސައްކަތްކުރާ އިންޑިއާގެ ރައްޔިތުން އެމީހުންގެ މުސާރައާއި އާމްދަނީ އިންޑިއާއަށް ފޮނުވުމުގައި ދިމާވާ ދަތިތަކާ ގުޅޭގޮތުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ކަންބޮޑުވުން ފާޅުކޮށްފިއެވެ.

މީގެ ކުރިން މިފަދަ ކަންބޮޑުވުމެއް ރަސްމީ އިދާރާ އަކަށް ހުށަހަޅާފައިވާ ކަމުގެ ރެކޯޑެއް ނެތް އިރު، މުއިއްޒުގެ ސަރުކާރުން ބޭރު ފައިސާ އާ ގުޅޭ ގޮތުން ގެންގުޅެމުންދާ ދޯހަޅި ސިޔާސަތުތަކުގެ ތެރެއިން، ރާއްޖޭގެ ބޭންކުތަކުން ޑޮލަރު އިންތިހާ އަށް ކޮންޓްރޯލް ކޮށްފައިވާތީ، ދިވެހި ރުފިޔާއިން މުސާރަ ލިބޭ އިންޑިޔާ ރައްޔިތުންނަށް އެމީހުންގެ ގައުމަށް ފައިސާ ފޮނުވުމަށް ހުރަސްތަކެއް ކުރިމަތިވާ ކަމަށް ބުނެ ދިވެހިރާއްޖޭގައި ހުންނަ އިންޑިއާ ހައި ކޮމިޝަނުން އެންމެ ފަހުން މި ވަނީ އެމްއެމްއޭ އަށް ކަންބޮޑުވުން ހުށަހަޅާފައެވެ.

އިންޑިއާ ސަރުކާރުން ބުނާ ގޮތުގައި، ރާއްޖޭގައި މަސައްކަތް ކުރާ އެމެރިކާ ޑޮލަރުން މުސާރަ ލިބޭ އިންޑިއާގެ ރައްޔިތުންނަށް މައްސަލައެއް ދިމައެއް ނުވެއެވެ. ނަމަވެސް ދިވެހި ރުފިޔާއިން މުސާރަ ލިބޭ މީހުންނަށް އެމްއެމްއޭ ބޭންކު ތަކަށް ޑޮލަރު ދޫކުރުމުގައި ތާށިތައް ކުރިމަތިކޮށްފައި އޮތުމުގެ ސަބަބުން ދަތިތަކެއް ވަނީ ކުރިމަތިވެފައެވެ. ސަރުކާރުން ކުރިމަތިކޮށްފައިވާ ދަތިތަކުގެ ސަބަބުން ރުފިޔާ އިން މުސާރަ ލިބޭ ބިދޭސީންގެ މެދުގައި ނުތަނަވަސްކަމާ ކަންބޮޑުވުން ވަނީ އުފެދިފައެވެ. ބޭރު ގައުމުތަކުގައި މަސައްކަތް ކުރާ މީހުން ފޮނުވާ އާމްދަނީ އަށް ގައުމުގައި ދިރިއުޅޭ އާއިލާ އިން ބަރޯސާ ވާއިރު، އާއިލާތަކަށް ވަގުތުން ވަގުތަށް ފައިސާ ފޮނުވޭ ގޮތް ނުވުމުން އެތައް ދައްޗެއް ކުރިމަތިވަމުންދާ ކަމަށް ވެއެވެ.

މިކަމާ ގުޅިގެން، އިންޑިއާ ހައި ކޮމިޝަނުން ވަނީ ދިވެހި ސަރުކާރާއި އެމްއެމްއޭއާ މަޝްވަރާކޮށް، މި މައްސަލަ ހައްލުކުރުމަށްޓަކައި ރާއްޖޭގެ ބޭންކުތަކަށް ދޫކުރާ އެމެރިކާ ޑޮލަރުގެ އަދަދު އިތުރުކޮށްދިނުމަށް އެދިފައެވެ.

ދިވެހިރާއްޖޭގައި ދިރިއުޅޭ ބިދޭސީންގެ ތެރެއިން ގިނަ އަދަދެއްގެ މީހުންނަކީ އިންޑިއާގެ ރައްޔިތުންނެވެ. އޭގެ ތެރޭގައި ގިނަ އަދަދެއްގެ ޑޮކްޓަރުންނާއި ނަރުހުންނާއި، ޓީޗަރުން ހިމެނެއެވެ.