މި ސަރުކާރުން މަސައްކަތް ކުރަމުން ދަނީ ކޮރަޕްޝަނާއި، ރިޝްވަތަކީ މާބޮޑު ކަމެއް ނޫން ކަމަށާއި އެފަދަ ކަންކަމަކީ އާންމު ކަމެއްގެ ގޮތުގައި ހެދުމަށް ކަމަށް، އަދާލަތު ޕާޓީގެ ނައިބު ރައީސް އަލީ ޒާހިރު ވިދާޅުވެއްޖެއެވެ.
ރާއްޖެޓީވީގެ "މިރައީސް" ޕްރޮގްރާމްގައި ވާހަކަ ދައްކަވަމުން އަލީ ޒާހިރު ވިދާޅުވީ ރައީސް ޔާމިން ރައްޔިތުންނަށް ދޭން ބޭނުންވާ މެސެޖަކީ ކޮރަޕްޝަނާއި، ރިޝްވަތުގެ ފާއިސާއަކީ އެހާވަރުގެ ކަމެއް ނޫން ކަމަށާއި ހުރިހާ އެންމެންވެސް ރިޝަވަތުދީ އެ ރިޝްވަތުގައި ހިފަންވާނެ ކަމަށެވެ.
މީހަކު ވަޒިފާއެއްގައި ހުރުމުގެ ސަބަބުން އޭނާއަށް ނާޖާއިޒު ގޮތުގައި ލިބޭ ފާއިސާއަކީ ރިޝްވަތު ކަމަށް އިސްލާމްދީނުގައި ވެސް ކަނޑައަޅުއްވާފައިވާ ކަމަށާއި އަޙްމަދު އަދީބާ ހަމައިން ނިމޭނެއޭ ބުނި ކިތަންމެ ކަމެއް މިހާރުވެސް ހިނގަމުންދާ ކަމަށް އޭނާ ވިދާޅުވިއެވެ.
އެމްއެމްޕީއާރްސީގެ ފާއިސާއަކީ ކޮރަޕްޝަން ކަމަށް ވިދާޅުވާއިރު މިހާތަނަށް އެކަމާއި ގުޅިގެން އަދީބާ ސުވާލެއް ވެސް ކޮށްފައިނުވާ ކަމަށް ފާހަގަކުރަމުން އަލީ ޒާހިރު ވިދާޅުވީ އެކަމާ ގުޅިގެން ޝަރުއީ ހުކުމެއް ވެސް އައިސްފައިނުވާ ކަމަށެވެ.
އެއްގޮތަކުން ނުވެއްޖެ ނަމަ އަނެއް ގޮތަކުންވެސް މަސައްކަތްކުރައްވަނީ އަދީބު އަތުންވެސް އެފާއިސާ ހޯއްދަވަން ކަމަށް އޭނާ ވިދާޅުވިއެވެ. ރައްޔިތުންގެ މަޖިލީހުގެ މެމްބަރުން އިންތިހާބު ކުރުމަށް އަދީބު ފާއިސާ ދެއްވި ކަމަށް ވިދާޅުވާއިރު ރައްޔިތުންގެ ފާއިސާ ނަހަމަ ގޮތުގައި ބޭނުން ކުރާ ފަރާތްތަކަށް އެކަން އިނގޭނެ ކަމަށާއި މިކަމުގެ ތެރެއަށް އޮޓިޑަރ ޖެނެރަލް، އެންޓި ކަރޮޕްޝަން ކޮމިޝަން، އަދި އިލެކްޝަންސް ކޮމިޝަނަށް ވަންނަން ޖެހޭ ކަމަށް ދެކެވަޑައިގަންނަވާ ކަމަށް އަލީ ޒާހިރު ވިދާޅުވިއެވެ.
