ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ފެހި ސިގްނަލްއަކީ ލޮލަށް ފެންނާނެ އެއްޗެއް ނޫން ކަމަށާއި، ނަތީޖާ ވެސް ނުފެންނާނެ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެމްބަރު ހުސެއިން ސަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެމްބަރު ސަމީރު ވިދާޅުވީ ވަނީ 2025 ވަނަ އަހަރަށް މިސަރުކާރުން ފާސްކޮށްފައިވާ ބަޖެޓަށް ވަރަށް ބޮޑަށް ފާޑު ވިދާޅުވެފައެވެ.
މެމްބަރު ސަމީރު ވިދާޅުވީ 2025 ވަނަ އަހަރުގެ ބަޖެޓަކީ އާދަޔާ ހިލާފު ބަޖެޓެއް ކަމަށާއި، ރާއްޖޭގެ ތާރީހުގައި ވެސް ރާއްޖޭގެ ގާނޫނު އަސާސީގެ ރޫހާއި، ހެދިފައިވާ ގާނޫނުތަކާ ހިލާފަށް ރައްޔިތުންގެ މަޖިލީހުން ބަޖެޓެއް ފާސްކޮށްފައިނުވާ ކަމަށެވެ. އަދި މި ބަޖެޓުގައި ގިނަ މައްސަލަތަކާއި ބޮޑެތި ކަންބޮޑުވުންތައް ހުރި ނަމަވެސް އެއްވެސް ކަމަކަށް ބެލުމެއް ނެތި ބަޖެޓު ފާސްކޮށްފައިވާ ކަމަށް މެމްބަރު ސަމީރު ވިދާޅުވިއެވެ.
މީގެ އިތުރުން މެމްބަރު ސަމީރު ވިދާޅުވީ ސަރުކާރުގެ އަމަލުތަކުގެ ސަބަބުން ރައްޔިތުން އިންތިހާއަށް ނުރުހުންވެ، ސަރުކާރާ ދެކޮޅަށް އަޑު އުފުލަން ފެށުމުން ކަންކަން ރަނގަޅުވާނެ ކަަމަށް އަންގައި ސޯޝަލް މީޑިއާގައި ރައީސް މުއިއްޒު ފެހި ސިގްނަލް ދެއްވާ ކަމަށެވެ. ނަމަވެސް މިފެހި ސިގްނަލްއަކީ މިސަރުކާރުގެ ތަރައްގީއާއި، ކާމިޔާބީ ގޮތަށް ލޮލަށް ފެންނާނެ އެއްޗެއް ނޫން ކަމަށާއި، ނަތީޖާ ވެސް ނުފެންނާނެ ކަމަށް މެމްބަރު ސަމީރު ވިދާޅުވިއެވެ.
އަޅުގަނޑުމެންނަށް އެބަ އިނގޭ ކައުންސިލްތަކަށް ދޭ ބްލަކް ގްރާންޓް އަދަދުގައި ވަރަށް ބައިވަރު މައްސަލަތައް ހުރިކަން. ގާނޫނުގައި އެބަ ބުނޭ ވަކި އަދަދެއް ކައުންސިލްތަކަށް ދޭން އެންމެ މަދުވެގެން. އެއީ ލިބޭ އާމްދަނީގެ 5 ޕަސެންޓް ހިމަނަންވާނެ ކަަމަށް. އެހެންނަމަވެސް ބަޖެޓު ހުށަހަޅާ ނިމިގެން ގޮސް ބަޖެޓު ހުރި ކަންބޮޑުވުންތައް އަޅުގަނޑުމެން އިދިކޮޅު ފަރާތްތަކުންނާއި، އަދި އެކިއެކި ކައުންސިލްތަކާއި، ސިޓީ ކައުންސިލްތަކާއި، ރަށު ކައުންސިލްތަކުން އުފުލަން ހެދީމަ އަޅުގަނޑުމެންނަށް މިފެނުނީ މިސަރުކާރުން އާއްމުކޮށް ކުރައްވާ ކަމެއް. ޓްވީޓެއްގެ ޒަރިއްޔާއިން ރައީސުލްޖުމްހޫރިއްޔާ އެކަން ބަދަލުވެގެންދާނެ ކަމުގެ އެބޭފުޅުން ވިދާޅުވި ފެހި ސިގްނަލް. ދެން އަޅުގަނޑުމެން ވަރަށް އުންމީދު ކޮށްގެން ތިބީ ފެހި ސިގްނަލްއޭ ވިދާޅުވެފައި އާއްމުކޮށް އެބޭފުޅުން ވިދާޅުވާހެން ލޮލަށް ނުފެންނަ އެއްޗެއް ކަމަށް ވަނީ. ދެން އެފެހި ސިގްނަލް އަޅުގަނޑުމެންނާ ހަމައަށް އަރާ ހަމަކުރާނެ ކޮންއިރަކުންތޯ ބަލާލިއިރުގައި ފެހި ސިގްނަލް ފޮތް ޕްރިންޓްވެގެން އައިރުގައި އަދަދުތައް ބޮޑު. އަދިވެސް އެކަމަކު އަޅުގަނޑުމެން ގާނޫނުގައި އެބުނާ އަދަދަށް ނެތް ބްލޮކް ގްރާންޓް ހިމެނިފައި ނެތް.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެމްބަރު ސަމީރު ވިދާޅުވީ 2025 ވަނަ އަހަރުގެ ބަޖެޓުގައި ޕީއެސްއައިޕީ އެއްވެސް ޕްރޮޖެކްޓެއްގެ ތަފްސީލެއް ނެތް ކަމަށާއި، ކަމާގުޅުން ހުރި މިނިސްޓަރުންނަށް ވެސް ވާނުވާ ނޭނގޭ ކަމަށެވެ. އަދި ވަކި އަދަދެއް ޖަހާފައި އޮތް ނަމަވެސް އަންނަ އަހަރު ހޭދަ ކުރަން ނިންމާފައިވަނީ ކޮން ރަށެއްގެ ކޮންކޮން ޕްރޮޖެކްޓަކަށްކަން ނޭނގޭ ކަމަށް މެންބަރު ސަމީރު ވިދާޅުވިއެވެ. ނަމަވެސް މިސަރުކާރުން އަބަދުވެސް ރައްޔިތުންނަށް ފެހި ސިިގްނަލް ދޭނެ ކަމަށް މެމްބަރު ސަމީރު ވިދާޅުވިއެވެ.
