ފަތުރުވެރިކަމަށް މަޝްހޫރު ދިވެހިރާއްޖެއަކީ ދުނިޔޭގެ އެންމެ އަގުބޮޑު ޗުއްޓީ މަންޒިލުތަކުގެ ތެރެއިން އެއް މަންޒިލް ކަމަށާއި އެކަން އެހެން އޮއްވާ ރާއްޖެއިން ބޭރަށް ފުރުމުގެ އަގު ބޮޑު ތަނުން މައްޗަށް ހިނގައްޖެ ކަމަށް އެމެރިކާގެ މަޝްހޫރު ނިއުސް ޗެނެލް ސީއެންއެން އިން ބުނެފިއެވެ.

ސީއެންއެން ގައި ވާ ރިޕޯޓެއްގައި ބުނެފައިވަނީ، ޑިސެމްބަރު 1 އިން ފެށިގެން، ޤައުމުން ބޭރަށް ވައިގެ މަގުން ފުރާ ފަސިންޖަރުންގެ އަތުން ނަގާ ފީ ހަތަރު ގުނައަށް އިތުރުވާނެ ކަމަށެވެ.

ސަރުކާރުން އިތުރުކުރި ޓެކްސް ތަކަށް އިޝާރާތް ކުރަމުން ސީއެންއެން އިން ބުނީ ޑިޕާޗަރ ޓެކްސް ފަސިންޖަރުންގެ އަތުން ނަގާ ގޮތައް ހަމަ ޖައްސާފައިވަނީ ރާއްޖެއިން ފުރާއިރު އެމީހަކު ދަތުރުކުރާ ކްލާހަށް ބަލައިގެން ކަމަށެވެ.

އިކޮނޮމީ ކްލާހުން ނަމަ ކުރިން ނަގަމުން އައި 30 ޑޮލަރު، 50 ޑޮލަރަށް ބޮޑު ކޮށްފައިވާ ކަމަށާއި، ބިޒްނަސް ކްލާހުގެ ފަސިންޖަރުންގެ އަތުން ކުރިން ނަގަމުން އައި 60 ޑޮލަރު، 120 ޑޮލަރަށް ބޮޑުކޮށްފައިވާ ކަމަށާއި، ފަސްޓް ކްލާހުގެ ފަސިންޖަރުންގެ އަތުން ކުރިން ނަގަމުން އައި 90 ޑޮލަރުގެ ބަދަލުގައި 240 ޑޮލަރަށް ބޮޑު ކޮށްފައިވާ ކަމަށާއި، އަދި އަމިއްލަ ޖެޓުގައި ދަތުރުކުރާ ފަސިންޖަރުންގެ އަތުން ކުރިން ނެގި 120 ޑޮލަރު، މީހަކަށް 480 ޑޮލަރު ދައްކަން ޖެހޭނެ ކަމަށެވެ.

ޑިޕާޗަރ ޓެކްސް ނަގަނީ ދިވެހިން ފިޔަވައި އެހެން ދަތުރުވެރިންގެ އަތުން ކަމަށާއި، ފީ ނެގުމުގައި އުމުރަކަށް ނުވަތަ ޕާސްޕޯޓަކަށް ބެލުމެއް ނޯންނަ ކަމަށް ވެސް ރިޕޯޓުގައި ބުނެފައިވެއެވެ. އަދި މީގެ އިތުރުން ދަތުރުގެ ދިގުމިނަށް ނުބަލާ ކަމަށް ވެސް ސީއެންއެން އިން ބުނެފައިވެއެވެ.

"އެހެންކަމުން، ދިއްލީއަށް ކުރާ ހަތަރު ގަޑިއިރުގެ ދަތުރަކަށް ވެސް އަދި ލަންޑަނަށް ކުރާ 11 ގަޑިއިރުގެ ދަތުރަކަށްވެސް ދައްކަންޖެހޭނީ އެއް އަދަދެކެވެ."

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން މި ޓެކްސް އިތުރުކުރާ ވާހަކަ އިޢުލާނުކުރީ ނޮވެމްބަރު މަހުގައި ކަމަށާއި، މީރާއިން ބުނާ ގޮތުގައި މި ޓެކްސް އިން ލިބޭ އާމްދަނީ ބޭނުން ކުރެވޭނީ ޤައުމުގެ މައި ވައިގެ ބަނދަރު ކަމުގައިވާ ވެލާނާ އިންޓަރނޭޝަނަލް އެއަރޕޯޓް ތަރައްގީ ކޮށް ބެލެހެއްޓުމަށް ކަމަށްވެސް ރިޕޯޓުގައިވެއެވެ.

މި ފީތައް އާންމު ގޮތެއްގައި އެއަރލައިން ޓިކެޓުގެ އަގުގެ ތެރޭގައި ހިމެނިފައި ހުންނާތީ، ޕާސްޕޯޓު ކޮންޓްރޯލް ހުރަސް ކުރާއިރު ދަތުރުވެރިންނަށް ވަކިން ފައިސާ ދައްކަން ނުޖެހޭތީ، ބައެއް ދަތުރުވެރިންނަށް މި އައު ޗާޖުތައް ފާހަގަވެސް ނުވެ ހިނގައިދާނެ ކަމަށް ސީއެންއެން އިން ބުނެފައިވެއެވެ.

އެހެން ނަމަވެސް ބައެއް އެއަރލައިން ތަކުން ބޮޑު ކުރި ފީ ތަކުގެ ވާހަކަ ދަތުރުވެރިންގެ ސަމާލު ކަމަށް ގެންނަމުންދާ ކަމަށް ސީއެންއެން އިން ބުނެފައިވެއެވެ.

މި ގޮތުން ދިވެހިރާއްޖެއަށް އަލަށް ދަތުރުތައް ފަށާ، ހުރިހާ ގޮނޑިތަކެއްވެސް ބިޒްނަސް ކްލާހުގެ އެއަރލައިނެއް ކަމަށްވާ ބިޔޮންޑް އިން ވަނީ އެއަރލައިންގެ ވެބްސައިޓުގައި ޝާއިއު ކޮށްފައިވާ ނޯޓެއް ގައި ޑިޕާޗަރ ފީ ދެއްކުމުން ސަލާމަތް ވުމަށްޓަކައި ނޮވެމްބަރު 30 ގެ ކުރިން ޓިކެޓު ގަތުމަށް ކަސްޓަމަރުންނަށް އިރުޝާދު ދީފައެވެ.