ބްރެސްޓް ބަލިކޮށް، ބާސެލޯނާ ދެ ވަނަ އަށް

ޔުއެފާ ޗެމްޕިއަންސް ލީގުގައި ބްރެސްޓާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން ތާވަލްގެ ދެ ވަނަ އަށް ޖެހިލައިފި އެވެ.

އަންގާރަ ދުވަހުގެ ރޭ ބްރެސްޓާ ދެކޮޅަށް ކުޅުނު މެޗު ބާސެލޯނާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން އެއް ލަނޑު ޖަހައި ލީޑު ނެގިއިރު، އެ ޓީމުގެ އަނެއް ދެ ލަނޑު ވެސް ޖެހީ ފަހު ހާފުގަ އެވެ.

މެޗު ފަށައިގެން ފުރަތަމަ 10 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕޮލެންޑުގެ ފޯވާޑް ރޮބާޓް ލެވަންޑޯސްކީ އެވެ. އެއީ ބާސެލޯނާ އަށް ލިބުނު ޕެނަލްޓީ ކާމިޔާބު ކޮށްގެން ލެވަންޑޯސްކީ ޖެހި ލަނޑެކެވެ. މެޗުގެ ދެ ވަނަ ހާފުގައި ބާސެލޯނާގެ ދެ ވަނަ ލަނޑު ޖަަހައި ލީޑު ފުޅާ ކޮށްދިނީ ޑެނީ އޮލްމޯ އެވެ. މެޗުގެ 66 ވަނަ މިނެޓުގައި އޭނާ އެ ލަނޑު ޖެހީ ޖެރާޑް މާޓިން ތަނަވަސްކޮށްދިން ފުރުސަތެއްގަ އެވެ. މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ބާސެލޯނާގެ ތިން ވަނަ ލަނޑު ޖެހީ ލެވަންޑޯސްކީ އެވެ. އެ ލަނޑު ޖަހަން ލެވަންޑޯސްކީ އަށް ފުރުސަތު ތަނަވަސްކޮށްދިނީ އަލެހާންދްރޯ ބާާލްޑޭ އެވެ.

މޮޅާއެކު ބާސެލޯނާ ދެ ވަނައިގައި އޮތީ މިހާތަނަށް ކުޅުނު ފަސް މެޗުން 12 ޕޮއިންޓާ އެކު އެވެ. ފަސް މެޗުގެ ތެރެއިން ބާސެލޯނާ ވަނީ ހަތަރު މެޗުން މޮޅުވެފަ އެވެ. އެއް މެޗުން އެ ޓީމު ވަނީ ބަލިވެފަ އެވެ. ބާސެލޯނާގެ ފަހަތުން ތިން ވަަނައިގައި ލިވަޕޫލަށް 12 ޕޮއިންޓު ލިބެނީ އެއް މެޗު މަދުން ކުޅެގެންނެވެ. މެޗުގެ އަދަދު ހަމަކުރާއިރު، އަލުން އެއް ވަނަ އަށް ޖެހިލުމުގެ ފުރުސަތު ލިވަޕޫލަށް އޮންނާނެ އެވެ.