މިކްސް ޑަބަލްސްގައި ޒަޔާން އަދި ނަބާ އަށް ރިހި މެޑަލް

ބޮޓްސްވާނާ އިންޓަނޭޝަނަލް ބެޑްމިންޓަން މުބާރާތުގެ މިކްސް ޑަބަލްސް އިވެންޓުގައި ވާދަކޮށް ރާއްޖޭގެ ޙުސެއިން ޒަޔާން ޒަކީ އަދި ފާތިމަތު ނަބާހާ (ނަބާ) ރިހި މެޑަލް ހޯދައިފި އެވެ.

ޒަޔާން އާއި ނަބާގެ ޕެއާ އިން ވަނީ މިކްސް ޑަބަލްސް އިވެންޓުގެ ފައިނަލްގައި ވާދަކޮށްފަ އެވެ. ފައިނަލްގައި އެ ޕެއާ އިން ވާދަކޮށްފައި ވަނީ އަޒަރުބައިޖާންގެ އީރާ މަފުތޫޙު އާއި އަޤީލު ގަބިލޯވުގެ ޕެއާއާ އެވެ.

ފައިނަލްގައި އަޒަރުބައިޖާންގެ ޕެއާ އިން ވަނީ ސީދާ ދެ ސެޓުން ޒަޔާން އާއި ނަބާގެ ޕެއާގެ މައްޗަށް ކުރި ހޯދައިފަ އެވެ. ފުރަތަމަ ސެޓުގައި ވާދަވެރި ކުޅުމެއް ފެނުނުއިރު، ޒަޔާން އާއި ނަބާ ވަނީ ރަނގަޅު ވާދައެއްކޮށްފަ އެވެ. އަޒަރުބައިޖާންގެ ޕެއާ އިން ފުރަތަމަ ސެޓު ކާމިޔާބު ކުރީ 23-21ންނެވެ. އަދި ޖެހިގެން ކުޅުނު ދެ ވަނަ ސެޓު އެ ޕެއާ އިން ކާމިޔާބު ކުރީ 21-18ންނެވެ.

ރާއްޖޭގެ ރިވައިވަލް ސްޕޯޓްސް ކުލަބުގެ ފަރާތުން ބޮޓްސްވާނާ މުބާރާތުގައި ވާދަކުރި ކުޅުންތެރިން ވަނީ ޖުމުލަ ފަސް މެޑަލް ހޯދައިފަ އެވެެ. މުބާރާތުގެ އަންހެން ސިންގަލްސް އިވެންޓުގެ ރަން މެޑަލް ނަބާ ހޯދިއިރު، ޒަޔާން އާއި ނަބާ ވަނީ މިކްސް ޑަބަލްސްގެ ރިހި މެޑަލް ހޯދައިފަ އެވެ. މީގެ އިތުރުން ފިރިހެން ސިންގަލްސް އިވެންޓުގައި ވާދަކޮށް ޒަޔާން އާއި ނިބާލް އަޙުމަދު ވަނީ ލޯ މެޑަލް ހޯދައިފަ އެވެ.