ޒެމްބިއާ ބެޑްމިންޓަން މުބާރާތުން ނަބީ އާއި ނަބާ އަށް ރަން މެޑަލް

ޒެމްބިއާގައި ކުރިއަށް ދިޔަ، ޒެމްބިއާ އިންޓަނޭޝަނަލް ބެޑްމިންޓަން މުބާރާތުގައި ވާދަކޮށް ރާއްޖޭގެ އާމިނަތު ނަބީހާ (ނަބީ) އަދި ފާތިމަތު ނަބާހާ (ނަބާ) ރަން މެޑަލް ހޯދައިފި އެވެ.

ރިވައިވަލް ސްޕޯޓްސް ކުލަބުގެ ފަރާތުން އެ މުބާރާތުގައި ވާދަކޮށް، ނަބީ އާއި ނަބާ ރަން މެޑަލް ހޯދާފައި ވަނީ އަންހެން ޑަބަލްސް އިވެންޓުންނެވެ. އެއީ އެ އިވެންޓުގެ ފައިނަލްގައި ސްރީ ލަންކާގެ ހަސާރާ އަދި ހަސީނީގެ ޕެއާއާ ވާދަކޮށެވެ. ނަބީ އާއި ނަބާގެ ޕެއާ އިން ފައިނަލް މެޗު ކާމިޔާބު ކޮށްފައި ވަނީ ސީދާ ދެ ސެޓުންނެވެ. އެއީ ފުރަތަމަ ސެޓު 21-16 އަދި ދެ ވަނަ ސެޓު 21-19 އިންނެވެ.

ނަބީ އާއި ނަބާގެ ޕެއާ އިން ވަނީ މިދިޔަ އަހަރު ކުރިއަށް ދިޔަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ އަންހެން ޑަބަލްސް އިވެންޓުން ވެސް ރަން މެޑަލް ހޯދައިފަ އެވެ.

މީގެ އިތުރުން ޒެމްބިއާ މުބާރާތުގެ ސިންގަލްސް އިވެންޓުގައި ވާދަކޮށް ނަބާ ލޯ މެޑަލް ހޯދިއިރު، މިކްސް ޑަބަލްސް އިވެންޓުގައި ވާދަކޮށް ނަބާ އަދި ޒަޔާން ޒަކީގެ ޕެއާ އިން ވެސް ވަނީ ލޯ މެޑަލް ހޯދައިފަ އެވެ. މި ދެ އިވެންޓުގައި ވެސް ރިވައިވަލްގެ ކުޅުންތެރިން ވަނީ ސެމީ ފައިނަލްގައި ވާދަކޮށްފަ އެވެ.