ގަވާއިދާ ޚިލާފަށް އުޅޭ ބިދޭސީންގެ އަދަދުވެސް ނޭންގެ، ހައްލު ކުރަން ބޭނުންވަނީ ފުރިހަމަ ވަސީލަތްތައް
މިހާރުވެސް ބަންގްލަދޭޝްގެ އެކަނިވެސް 91،000 މީހުން އެބަތިބި
ޚާރިޖީ ގުޅުންތަކުގެ ކޮމިޓީ
ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމުގައި މިހާރު ދިމާވެގެން އުޅެނީ އިދާރާތައް ނުގުޅުމުގެ މައްސަލަ ނޫން ކަމަށާއި، ދިމާވެގެން އުޅޭ ހަގީގީ މައްސަލަ އަކީ ކަމުގެ ބޮޑު ކަމާއި، ވަސީލަތްތައް ނެތުމުގައި ހުރި މައްސަލަ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
ބިދޭސީންގެ މައްސަލައަށް ހައްލު ގެނެވޭނެ ގޮތަކާ ގުޅޭ ގޮތުން ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީއަށް މައުލޫމާތު ދެއްވަމުން ފައްޔާޒު ވިދާޅުވީ، ވޮލަންޓިއަރކޮށް ރެގިއުލަރައިޒްކުރަން ހުޅުވާލުމުން ވާނެވަރު މިހާރު ވެފައި ކަމަށާއި، ދެން އިތުރަށް ހައްލު ކުރެވޭނީ ގަވާއިދާ ޚިލާފަށް އުޅޭ މީހުން ހައްޔަރުކޮށްގެން ކަމަށެވެ. އެ ނޫން ގޮތަކަށް މިކަމަށް ހައްލު ގެނެވެން ނެތް ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
އެއް ގައުމަކުން އެއްފަހަރާ އެއްލައްކަ މީހުންނަށްވުރެ އިތުރަށް ނުތިބެވޭނެ ކަމަށް ގާނޫނެއްގައި އޮތް ނަމަވެސް މިހާރުވެސް ބަންގްލަދޭޝްގެ އެކަނިވެސް 91،000 މީހުން އެބަތިބި ކަމަށް ފައްޔާޒް ވިދާޅުވިއެވެ. މިއީ ގަވާއިދުން އުޅޭ ލިޔެކިޔުންތައް ހަމަ މީހުން ކަމަށާއި، ގަވާއިދާ ޚިލާފަށް އުޅޭ 23،000ހާ މީހުން އުޅޭ ކަމަށް އަންދާޒާ ކުރެވިފައިވާއިރު، އެއްވެސް މައުލޫމާތެއް ނޭންގޭ މީހުންވެސް އެބަތިބި ކަމަށް މިނިސްޓަރު ފައްޔާޒު ވިދާޅުވިއެވެ. އެހެންކަމުން ފާއިތުވި 3 އަހަރު ލޭބަރުންގެ ގޮތުގައި ބަންގްލަދޭޝްއިން މީހުން އެތެރެކޮށްފައި ނުވާކަމަށް ވިދާޅުވިއެވެ.
މިނިސްޓަރު ވިދާޅުވީ ރާއްޖޭގެ ވިޔަފާރިވެރިންގެ ޑިމާންޑް އޮންނަނީވެސް ކޮންމެވެސް ސަބަބަކާ ހުރެ ބަންގްލަދޭޝް މީހުންނަށް ކަމަށެވެ. އެހެންނަމަވެސް މިހާރު ރާއްޖޭގައި ތިބި ބަންގްލަދޭޝްގެ މަސައްކަތްތެރިންވެސް ގަވާއިދުގެ ތެރެއަށް ވަންނަން ބޭނުން ނުވާކަމަށާއި، އެމީހުންނަށް ލިބޭ މުސާރަށްވުރެ ބޮޑު އެއްޗެއް އެކި މީހުންނަށް މަސައްކަތްކޮށްދީގެން ލިބޭ ކަމަށެވެ.
ފިޔަވަޅު އެޅުމަށްޓަކައި، ފުރަތަމަވެސް ފެސިލިޓީއެއް ގާއިމްކުރަން ޖެހޭކަން ފާހަގަކުރައްވަމުން މިނިސްޓަރު ވިދާޅުވީ، މިވަގުތު ހުރީ 48 މީހުންގެ ފެސިލިޓީއެއް ކަމަށެވެ. ރާއްޖޭގެ ގާނޫނުތަކާއި، ގަވާއިދުތަކުގެ ދަށުން މަދަނީ މައްސަލައެއްގައި ނޫނީ އެންމެ ދިގުމުއްދަތަކަށްވެސް ހައްޔަރުކުރެވެނީ 24 ގަޑިއިރަށް ކަމަށްވާއިރު، ގަވާއިދާ ޚިލާފަށް އުޅޭ ބިދޭސީން ހޯދާ ހައްޔަރުކޮށް ޑީޕޯޓްކުރުމުގެ ބާރު އޮންނަ އިމިގްރޭޝަނަށްވެސް އެކަން ކުރެވޭނީ އެ މީހުން ބައިތިއްބާނެ ތަނެއް ހުރެގެން ކަމަށް މިނިސްޓަރު ވިދާޅުވިއެވެ.
ދޮޅުމަސް ތެރޭގައި ހުޅުމާލޭގައި ހަދާ ޑިޓެންޝަން ފެސިލިޓީ ނިމޭނެ ކަމަށް މިނިސްޓަރު ފައްޔާޒު ވިދާޅުވިއެވެ. އެތަނުގައި 200-300ހާ މީހުން ގެންގުޅެވޭނެ ކަމަށް ވިދާޅުވިއެވެ. ފައްޔާޒު ވިދާޅުވީ، މީހަކު ފޮނުވާލުމަށް އޮންނަ ޕްރޮސެސްއަށް 2-3 މަސް ނަގާއިރު އެތަނުގައި ބައިތިއްބާ މީހުންނަށްވެސް ދައުލަތުން ބޮޑު ޚަރަދެއް ކުރަން ޖެހޭ ކަމަށެވެ. ފެސިލިޓީ ހެދި މީހުން ހައްޔަރުކުރަން ފެށުމުން، ގަވާއިދާ ޚިލާފަށް އުޅޭ ބިދޭސީން ގެންގުޅޭ ދިވެހިންނަށް ފިޔަވަޅު އަޅަން ފައްޓަވާނެ ކަމަށް ފައްޔާޒު ވިދާޅުވިއެވެ.
ޒަމާނުއްސުރެ އޮތް މައްސަލައަކަށް ކުއްލިއަކަށް ބޮޑު ޚަރަދެއް ކުރުން އެއީ އުސޫލެއް ނޫންކަމަށްވެސް ފައްޔާޒް ވިދާޅުވިއެވެ.
މީގެއިތުރުން ގަވާއިދާ ޚިލާފަށް މިހާރު އުޅެނީ ކިތައް މީހުންކަން ދެނެގަނެވޭނެ ނިޒާމެއް ނެތުމަކީ ކަންބޮޑުވުމެއް ކަމަށް މި ކޮމިޓީ ބައްދަލުވުމުގައި އިމިގްރޭޝަނުން ފާހަގަކުރިއެވެ. އަދި ގައުމީ މައްސަލައެއްގެ ގޮތުގައި ބަލައި މިމައްސަލަ ހައްލު ކުރުމަށް މަސައްކަތް ކުރަމުން އަންނަކަމަށްވެސް އިމިގްރޭޝަނުން ފާހަގަކުރިއެވެ.
މިއަދުގެ ކޮމިޓީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ.
