ފޯޅަވައްސަކީ ރާއްޖޭގެ ބައެއް ކަމުގައި ދެކިލައްވާނަމަ މޮރިޝަސްއާއެކު ފޯޅަވައްސާ ރާއްޖެއާމެދު އިން ވަކިކުރުމަށް އެއްބަސްވީ ކީއްވެތޯ ވިދާޅުވެ އިކޮނޮމިކް މިނިސްޓަރު ފައްޔާޒު އިސްމާއިލް ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުޙައްމަދު ނަޝީދުއާ ސުވާލު ކުރައްވައިފިއެވެ.

އަންގާރަ ދުވަހު ކުރެއްވި ޓްވީޓެއްގައި ރައީސް ނަޝީދު ޓެގް ކުރައްވައި ފައްޔާޒު ވިދާޅުވީ 2011 ވަނަ އަހަރު އޭރުގެ ރައީސުލްޖުމަހޫރިއްޔާ ފޯޅަވައްސަކީ ރާއްޖޭގެ ބައެއް ކަމަށް ދެކިލައްވާނަމަ މޮރިޝަސްއާއެކު އިން ކަނޑައަޅަން އެއްބަސްވީ ކީއްވެތޯއެވެ. 2011 ވަނަ އަހަރު ރާއްޖޭގެ ވެރިކަމުގައި ހުންނެވީ ނަޝީދުއެވެ.

ފައްޔާޒު މިގޮތަށް ޓްވީޓް ކުރެއްވީ ފޯޅަވައްސަކީ ރާއްޖޭގެ ތަނެއްކަން އެނގޭކަން ތާރީހުން އެނގެން އެބައޮތް ކަމަށާއި އެތަން ދޫކުރެވެން ނެތް ކަމަށް ނަޝީދު ވިދާޅުވުމުންނެވެ. ނަޝީދު މިފަދައިން ވިދާޅުވެފައިވާއިރު އެމަނިކުފާނު 2011 ވަނަ އަހަރު މޮރިޝަސްގެ މިނިވަން ދުވަހުގެ ރަސްމިއްޔާތަށް އެ ގައުމުގެ އޭރުގެ ބޮޑުވަޒީރުގެ ދައުވަތަކަށް ކުރެއްވި ޒިޔާރަތުގައި ބޮޑުވަޒީރާއި ސަރުކާރުގެ އިސް ބޭފުޅުންނާއެކު ބޭއްވި ބައްދަލުވުންތަކަށްފަހު ނެރުނު ޖޮއިންޓް ކޮމިއުނިކޭގައި ބުނެފައިވަނީ ރާއްޖެ އާއި މޮރިޝަސްގެ އިގްތިސާދީ ސަރަހައްދު ކަނޑައަޅާއިރު ފުށުއަރާ ސަރަހައްދާ މެދު ދެ ގައުމުން ވާހަކަ ދައްކައިގެން އެކަން ހަމަޖައްސަން އެއްބަސްވެވަޑައިގެންފައިވާ ކަމަށެވެ. މި މަސައްކަތަށް ޖޮއިންޓް ކޮމިޝަނެއް ހެދުމަށް ވެސް އެއްބަސްވެވަޑައިގަތް ކަމަށް ވަނީ ބުނެފައެވެ.

ފޯޅަވަހި މޮރިޝަސްއަށް ދިނުމަށް އދ. އިން ނިންމި ނިންމުމަށް ސަރުކާރުން ވޯޓު ދިނުމުން ރައީސް ނަޝީދުގެ އިތުރުން މަޖިލީހުގެ ބައެއް މެމްބަރުންނާއި އިދިކޮޅު ފަރާތްތަކުން ވެސް ދަނީ ނުރުހުން ފާޅު ކުރަމުންނެވެ. އެ ފަރާތްތަކުން ބުނާ ގޮތުގައި ފޯޅަވަހި މޮރިޝަސްގެ ތަނެއްކަމަށް އދ. ގައި ވޯޓު ދިނުމަކީ ރާއްޖޭގެ ބައެއް ދިނުން ކަމަށާއި އެގޮތަށް އެކަން ކުރުމާ ދެކޮޅު ކަމަށެވެ.

ރާއްޖޭގެ ހާއްސަ އިގުތިސާދީ ސަރަހައްދުން ބޮޑު ބައެއް ގެއްލޭ ފަދަ ގޮތަކަށް ދިވެހި ސަރުކާރުގެ ސިޔާސަތާއި ސްޓޭންޑް ބަދަލުނުކުރުމަށް ގޮވާލައި މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވަނީ ރައްޔިތުންގެ މަޖިލީހަށް މައްސަލައެއް ހުށަހަޅާފައެވެ. އެކަމާ ގުޅިގެން ޝަރީފާ ވެސް ފައްޔާޒު ވަނީ ސުވާލެއް ކުރައްވާފައެވެ. ފައްޔާޒު ޝަރީފަށް އަމާޒުކޮށް ކުރެއްވި ސުވާލުގައި ވިދާޅުވެފައިވަނީ 2017 ވަނަ އަހަރު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން މޮރިޝަސްއަށް ފޯޅަވަހި ދޭން ނިންމިއިރު އޭރުގެ ސަުކާރުން ދައުވާ ނުކުރީ ކީއްވެތޯއެވެ. އަދި އޭރުގެ ޑިފެންސް މިނިސްޓަރު ފޯލަވަހި ގެއްލިގެންދިޔައިރު ކުރެއްވީ ކޮންކަމެއްތޯ ވެސް އެއްސެވިއެވެ.

2017 ވަނަ އަހަރު ވެރިކަމުގައި ހުންނެވީ ކުރީގެ ރައީސް އަބްދުﷲ ޔާމީނެވެ. އަދި ޑިފެންސް މިނިސްޓަރުގެ މަގާމުގައި ހުންނެވީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރުއެވެ.