ސުބާސީ އަށް ސްޕެއިން ޤައުމީ ޓީމުން ފުރުސަތު ދީފި

ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ޑިފެންޑަރު ޕައު ސުބާސީ އަށް ޤައުމީ ޓީމުން ފުރުސަތު ދީފި އެވެ.

އުމުރުން 17 އަހަރުގެ ކުޅުންތެރިޔާ އަށް ސްޕެއިން ޤައުމީ ޓީމުން ފުރުސަތު ދޭން ކޯޗު ލުއިސް ޑި ލާ ފުއެންޓޭ ނިންމީ، ސްޕެއިންގެ ޕައު ޓޮރޭސް އަށް އަނިޔާވުމާ ގުޅިގެން، އޭނާގެ ބަދަލަށެވެ. ބައިނަލްއަޤުވާމީ ބްރޭކުގައި ސްޕެއިން އިން ކުޅޭ ދެ މެޗަށް އެކުލަވާލި ސްކޮޑުގައި ޓޮރޭސް ހިމެނިއިރު ވެސް، އޭނާ ހުރީ ކޮންމެ ވެސް ވަރެއްގެ އަނިޔާއެއްގަ އެވެ. އެންމެ ފަހުން، އަނިޔާގެ ސަބަބުން އޭނާ އަށް ނުކުޅެވޭނެކަން ކަށަވަރުވުމާއެކު އޭނާ ވަނީ ޓީމުން އުނިކޮށްފަ އެވެ.

އޭނާގެ ބަދަލުގައި ސުބާސީ އަށް ޤައުމީ ޓީމުން ފުރުސަތު ދިނުމަށް ކޯޗު ފުއެންޓޭ ވަނީ ނިންމައިފަ އެވެ. މީގެ ކުރިން ވެސް ސުބާސީ އަށް ވަނީ ސްޕެއިންގެ ސްކޮޑުން ފުރުސަތު ދީފަ އެވެ. އެގޮތުން މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތުގެ ކުރިން ސްޕެއިން އިން އެކުލަވާލި ޕްރިލިމިނަރީ ސްކޮޑުން އޭނާ އަށް ފުރުސަތު ދިނެވެ. ނަމަވެސް މުބާރާތަށް އެކުލަވާލި ފައިނަލް ސްކޮޑުން ސުބާސީ އަށް ފުރުސަތެއް ނުލިބެ އެވެ. އޭނާ ވަނީ މިހާތަނަށް ސްޕެއިންގެ ޤައުމީ ޓީމުގައި ހަތަރު މެޗު ކުޅެފަ އެވެ.

ބާސެލޯނާ އަށް ބަދަލުވީ ފަހުން ސުބާސީ އަންނަނީ އެ ކުލަބުގައި ފާހަގަކޮށްލެވޭ ކުޅުމެއް ދަައްކަމުންނެވެ. އޭނާ ވަނީ މިހާތަނަށް ބާސެލޯނާ އަށް ޖުމުލަ 41 މެޗު ކުޅެދީފަ އެވެ. މި ސީޒަންގައި އޭނާ ވަނީ 17 މެޗެއްގައި ބާސެލޯނާ އަށް ކުޅެފަ އެވެ.