ނޫސްތަކާއި، ޓީވީ ތަކާއި، ނޫސްވެރިންނަށް އަދަބު ދޭން ގާނޫނެއް ހަދަނީ
ނޫސްވެރިންނާއި މީޑިއާތައް ޖުރިމަނާ ކުރުމާއި، ސައިޓްތައް އައު ކޮމިޝަނަށް ބްލޮކް ކުރެވޭ
ނޫސްވެރިން ރައީސް އޮފީހުގައި އޮތް ބައްދަލުވުމެއްގައި
ނޫސްތަކާއި ޓީވީ ތަކާއި، ނޫސްވެރިން ޖޫރިމަނާ ކުރެވޭ ގޮތަށް ސަރުކާރުގެ ފަރާތުން، ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރު ރައްޔިތުންގެ މަޖިލީހަށް ބިލެއް ހުށަހަޅުއްވައިފިއެވެ.
ބިލު ގާނޫނަކަށް ވުމުން، ބްރޯޑްކާސްޓިން ކޮމިޝަން (ބްރޯޑްކޮމް) އާއި، މޯލްޑިވްސް މީޑިއާ ކައުންސިލް (އެމްއެމްސީ) އުވޭނެއެވެ.
ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅައި، ބްރޯޑްކާސްޓިން ދާއިރާވެސް ހިމެނޭހެން މީޑިއާގެ ކަންކަން ތަންފީޒުކުރުމަށް ވަކި މުއައްސަސާ އެއް އުފެއްދުމަކީ މިގާނޫގެ މަގްސަދު ކަމަށް ބުނެފައިވާއިރު، މި ގާނޫނުގެ ދަށުން އުފައްދާ ކޮމިޝަނުން އެކުލަވާލާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ނޫސް މަޖައްލާ ޖޫރިމަނާ ކުރެވޭ އިރު، އަދި ވަކިވަކި ނޫސްވެރިން ވެސް 5،000 ރުފިޔާ އާއި 10،000 ރުފިޔާ އާ ދެމެދުން ޖޫރިމަނާ ކުރެވޭނެއެވެ.
އަލަށް ހުށަހެޅި ބިލުގައި ބުނެފައިވަނީ، ސުލޫކީ މިންގަނޑާ ޚިލާފުވީ ބްރޯޑްކާސްޓަރެއް ނަމަ ފާއިތުވި އަހަރުގެ އާމްދަނީގެ 10 އިން ސައްތައިން ޖުރިމަނާ ކުރެވޭނެ ކަމަށެވެ.
މަޖިހަށް ހުށަހަޅާފައިވާ ބިލުގައި އަލަށް އުފައްދާ ކޮމިޝަނުން މީޑިއާގެ މިނިވަންކަން އެންމެ ފުޅާދާއިރާއެއްގައި ކުރިއަރުވައި ތަރައްގީކުރަންޖެހޭ ކަމަށް ބުނާއިރު، ހަތް މެންބަރުންގެ މައްޗަށް އާ ކޮމިޝަން އެކުލަވާލާއިރު، ހަތަރު މެންބަރުން އައްޔަން ކުރުމުގެ ބާރު ލިބެނީ މަޖިލީހުގެ ރުހުމާއެކު ރައީސުލް ޖުމްހޫރިއްޔާ އަށެވެ. މިހާރު ހިނގަމުންދާ މަޖިލީހަކީ ރައީސް މުއިއްޒުގެ ޕާޓީގެ ސުޕަރ މެޖޯރިޓީ އޮތް މަޖިލިހެކެވެ. ކޮމިޝަނުގެ ދެން ހިމެނޭ ތިން މެންބަރުން ހޮވަނީ ހިންގާތާ ފަސް އަހަރު ވެފައިވާ މީޑިއާތަކުގެ މެދުގައި ބާއްވާ އިންތިހާބަކުން ކަމަށް ބުނެފައިވެއެވެ.
ފަސް އަހަރުގެ ދައުރަކަށް އައްޔަން ކުރާ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރުވެސް ލިބެނީ ރައީސުލް ޖުމްހޫރިއްޔާއަށެވެ.
އައު ކޮމިޝަން އުފެދުމުން، މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން ގެ ހުރިހާ މަސްއޫލިއްޔަތުތަކުގެ އިތުރުން މުދަލާއި ފައިސާ އާއި ވަސީލަތްތަކާއި މުވައްޒަފުން އަލަށް އުފެދިގެންދާ މީޑިއާ އެންޑް ބްރޯޑްކާސްޓިން ކޮމިޝަނަށް ބަދަލުވާނެ ކަމަށް ބުނެފައިވެއެވެ. މީޑިއާ އެންޑް ބްރޯޑްކާސްޓިން ކޮމިޝަން އުފެދިގެން އެ ކޮމިޝަނަށް މެންބަރުން އައްޔަން ކުރެވެންދެން ކޮމިޝަން ހިންގާނީ ސިވިލް ސަރވިސް ކޮމިޝަނުން އެކުލަވާލާ 5 މެންބަރުންގެ ވަގުތީ ކޮމިޓީއަކުން ކަމަށް ވެސް ބިލުގައި ބުނެފައިވާއިރު، ބްރޯޑްކޮމް އާއި އެމްއެމްސީ އިން ކުރިން ބަލައި ނިމިފައިވާ މައްސަލަތައް ވެސް އަލަށް އުފައްދާ ކޮމިޝަނަށް ބެލޭނެއެވެ. އަދި ބަލަމުންދާ މައްސަލައެއް ނިމެންދެން ނޫސް ނެރުން ހުއްޓުވުމާއި، ވެބްސައިޓް ބްލޮކް ކުރުމުގެ ބާރުވެސް ލިބިދެއެވެ. ކޮމިޝަންގެ މެންބަރުންގެ މުސާރަ ކަނޑައަޅަނީ ނެޝަނަލް ޕޭ ކޮމިޝަނުންނެވެ.
މީގެ އިތުރުން މި ބިލުގައި ނޫސްވެރިން މަސައްކަތްކުރަންޖެހޭނެ ހަމަތަކެއް ބަޔާންކޮށްފައިވެއެވެ.
މި ގާނޫނަށް އަމަލުކުރަން ފަށާނީ ގާނޫނު ފާސްވެ ތަސްދީގުކުރާ ދުވަހުން ފެށިގެންނެވެ.
