އަމިއްލަ ދަނޑުގައި އިޕްސްވިޗް އަތުން ޓޮޓެންހަމް ބަލިވެއްޖެ

އިނގިރޭސި ޕްރިމިއާ ލީގުގައި އިޕްސްވިޗް ޓައުންއާ ދެކޮޅަށް ކުޅުނު މެޗުން ބަލިވެ، ޓޮޓެންހަމަށް ޕްރެޝަރު ބޮޑުވެއްޖެ އެވެ.

ޓޮޓެންހަމްގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗު އިޕްސްވިޗް ޓައުން އިން ކާމިޔާބު ކުރީ 2-1ންނެވެ. މެޗުގެ ފުރަތަމަ ހާފުގައި ވެސް އިޕްސްވިޗް އިން ވަނީ ދެ ލަނޑު ޖަހައި ކުރި ހޯދައިފަ އެވެ. މެޗުގައި ޓޮޓެންހަމްގެ ހަމައެކަނި ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 31 ވަނަ މިނެޓުގައި އިޕްސްވިޗް އަށް ލީޑު ނަގައިދިނީ ސަމީ މޮޑިކްސް އެވެ. އޭނާ އެ ލަނޑު ޖެހީ ލިއަމް ޑެލަޕް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޑެލަޕް ވަނީ އިޕްސްވިޗްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގައި ޓޮޓެންހަމްގެ ހަމައެކަނި ލަނޑު، 69 ވަނަ މިނެޓުގައި ޖެހީ ރޮޑްރީގޯ ބެންޓަންކޫރް އެވެ. އެއީ ޕެޑްރޯ ޕޮރޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މިއީ މި ސީޒަންގެ ލީގުގައި ޓޮޓެންހަމްގެ ފަސް ވަނަ ބައްޔެވެ. ލީގުގައި ޓޮޓެންހަމް އިން މިހާތަނަށް 11 މެޗު ކުޅެފައިވާއިރު، މޮޅުވެފައި ވަނީ ފަސް މެޗުންނެވެ. އެއް މެޗު އެއްވަރުވެފައިވާއިރު، 11 މެޗުން ލިބުނު 16 ޕޮއިންޓާ އެކު އެ ޓީމު އޮތީ 10 ވަނައިގަ އެވެ. ލީގުގައި ޓޮޓެންހަމްގެ ނަތީޖާތައް ދަށްވަމުން އަންނައިރު، އެ ޓީމުގެ ކޯޗު އަންގޭ ޕޮސްޓެކޮގްލޫ އަށް ޕްރެޝަރު ބޮޑުވަމުން އަންނަ ކަމަށް މީޑިއާ ރިޕޯޓުތައް ބުނެ އެވެ.