ޓޮރިނޯ ބަލިކޮށް، ޔުވެންޓަސް ތިން ވަނައިގައި

އިޓާލިއަން ލީގުގައި ޓޮރިނޯއާ ދެކޮޅަށް ކުޅުނު މެޗުން މޮޅުވެ، ޔުވެންޓަސް އިން ތިން ވަނަ އަށް ޖެހިލައިފި އެވެ.

ޔުވެންޓަސްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0ންނެވެ. އެއީ މެޗުގެ ފުރަތަމަ ހާފުގައި އެއް ލަނޑު، އަދި ފަހު ހާފުގައި އަނެއް ލަނޑު ޖަހައިގެންނެވެ.

މެޗު ފަށައިގެން 18 ވަނަ މިނެޓުގައި ޔުވެންޓަސް އިން ވަނީ ޓޮރިނޯ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޓިމޯތީ ވީހް އެވެ. އޭގެ ފަހުން ވެސް ޔުވެންޓަސް އަށް މެޗުގައި ލަނޑު ޖަހައި ލީޑު ފުޅާ ކުރާނެ އިތުރު ފުރުސަތު ވަނީ ލިބިފަ އެވެ. މެޗުގައި ޔުވެންޓަސްގެ ދެ ވަނަ ލަނޑު، 84 ވަނަ މިނެޓުގައި ޖެހީ ކެނާން ޔިލްޑިޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ފްރެންސިސްކޯ ކޮންސެއިސާއޯ އެވެ.

މޮޅާއެކު ޔުވެންޓަސް ތިން ވަނައިގައި އޮތީ މިހާތަނަށް ކުޅުނު 12 މެޗުން 24 ޕޮއިންޓު ހޯދައިގެންނެވެ. މި ސީޒަންގެ ލީގުގައި ޔުވެންޓަސް ވަނީ ހަ މެޗުން މޮޅުވެ، އަނެއް ހަ މެޗުން އެއްވަރުވެފަ އެވެ. ޔުވެންޓަސް އަށް ވުރެ އެއް މެޗު މަދުން ކުޅެގެން ދެ ވަނައިގައި އޮތް އެޓަލަންޓާ އަށް ލިބެނީ 22 ޕޮއިންޓެވެ. އެހެންކަމުން މެޗުގެ އަދަދު ހަމަކުރާއިރު، ތިން ވަނަ އަށް ޖެހިލުމުގެ ފުރުސަތު އެޓަލަންޓާ އަށް އޮންނާނެ އެވެ.