ޕައުލީ އަތުން ވެސް ބަޔާން މޮޅުވީ މުސިއާލާ ޖެހި ލަނޑުން

ޖަރުމަނު ލީގުގައި އެސްޓީ ޕައުލީއާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން އެއް ވަނައިގައި ލީޑު ފުޅާ ކޮށްފި އެވެ.

ޕައުލީގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ބަޔާން އިން ކާމިޔާބު ކުރީ 1-0ންނެވެ. އެއީ މެޗިގެ ފުރަތަމަ ހާފުގައި ބަޔާނުން ޖެހި ލަނޑުންނެވެ.

ބަޔާނުން ރަނގަޅު ކުޅުމެއް ދައްކައި، ލަނޑުތަކެއް ޖަހަން ފުރުސަތު ތަނަވަސްކުރި އެ މެޗުގައި އެ ޓީމުން ވަނީ ޕައުލީގެ ގޯލަށް އަމާޒުކޮށް ހަ ހަމަލާއެއް ފޮނުވާލައިފަ އެވެ. މެޗުގެ ފުރަތަމަ ހާފު ފަށައިގެން 22 ވަނަ މިނެޓުގައި ބަޔާނަށް ލީޑު ނަގައިދިނީ ޖަރުމަނުގެ ޒުވާން ކުޅުންތެރިޔާ ޖަމާލް މުސިއާލާ އެވެ. މިއީ ބަޔާންގައި މޮޅު ކުޅުމެއް ދައްކަމުން އަންނަ މުސިއާލާ މި ސީޒަންގައި އެ ޓީމަށް ޖަހައިދިން ނުވަ ވަނަ ލަނޑެވެ. އަދި ޖަރުމަނު ލީގުގައި އޭނާ ޖެހި ފަސް ވަނަ ލަނޑެވެ.

މެޗުގައި ބަޔާނަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. އޭގެ އިތުރުން ކިންގްސްލީ ކޯމަން އަށް ވެސް ލަނޑު ޖަހާނެ ފުރުސަތު ލިބުނުއިރު، ފުރުސަތުގެ ބޭނުން ކުރެވޭ ގޮތެއް ނުވި އެވެ. އެންމެ ފަހުން ޔުއެފާ ޗެމްޕިއަންސް ލީގުގައި ބެންފީކާއާ ދެކޮޅަށް ބަޔާން ކުޅުނު މެޗުން ވެސް އެ ޓީމު މޮޅުވީ މުސިއާލާ ޖެހި ލަނޑުންނެވެ.

މޮޅާއެކު ބަޔާނުން ވަނީ އެއް ވަނައިގައި ފަސް ޕޮއިންޓުގެ ލީޑެއް ނަގައިފަ އެވެ. އެެއީ މިހާތަނަށް ލީގުގައި ކުޅުނު 10 މެޗުން 26 ޕޮއިންޓު ހޯދައިގެންނެވެ. މި ސީޒަންގެ ޖަރުމަނުގައި ލީގުގައި މިހާތަނަށް އެއްވެސް މެޗަކުން ބަޔާން ބަލިވެފައި ނުވާއިރު، އަށް މެޗުން މޮޅުވެ ދެ މެޗުން ވަނީ އެއްވަރުވެފަ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އާރްބީ ލައިޕްޒިގަށް ލިބެނީ 21 ޕޮއިންޓެވެ.