ސިޓީ އަށް ޖެހި ޖެހިގެން ހަތަރު ވަނަ ބަލި

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ބަލިވެ، އެންމެ ފަހުގެ ޗެމްޕިއަން މެންޗެސްޓަރ ސިޓީ އަށް ދަށް ނަތީޖާއަކާ ކުރިމަތިލާން ޖެހިއްޖެ އެވެ.

ބްރައިޓަންގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ސިޓީގެ މައްޗަށް ކުރި ހޯދީ 2-1ންނެވެ. އެއީ މެޗުގައި ސިޓީން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗު ފަށައިގެން 23 ވަނަ މިނެޓުގައި ސިޓީން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ނޯވޭގެ ފޯވާޑު އާލިން ހާލަންޑު އެވެ. މެޗުގައި ބްރައިޓަން އިން އެ ޓީމުގެ ދެ ލަނޑު ވެސް ޖެހީ ފަހު ހާފުގަ އެވެ، އެގޮތުން މެޗުގެ 78 ވަނަ މިނެޓުގައި ބްރައިޓަން އަށް ނަތީޖާ ހަމަހަމަ ކޮށްދިން ލަނޑު ޖެހީ ޖޮއާއޯ ޕެޑްރޯ އެވެ. އޭގެ ފަސް މިނެޓު ފަހުން ބްރައިޓަން އިން ވަނީ ދެ ވަނަ ލަނޑެއް ޖަހައި، އެ ޓީމު ކޮޅަށް މެޗުގެ ނަތީޖާ އަނބުރާލައިފަ އެވެ. ޕެޑްރޯ ތަނަވަސްކޮށްދިން ފުރުސަތެއްގައި ބްރައިޓަން އަށް އެ ލަނޑު ޖަހައިދިނީ މެޓް އޮރައިލީ އެވެ.

ބައްޔާއެކު ސިޓީ މި ވަނީ އެންމެ ފަހުން އެ ޓީމު ކުޅުނު ހަތަރު މެޗުން ވެސް ބަލިވެފަ އެވެ. އެގޮތުން ކަރަބޯ ކަޕްގައި ޓޮޓެންހަމާ ދެކޮޅަށް ކުޅުނު މެޗުން ބަލިވެ މުބާރާތުން ސިޓީ ކެޓިއިރު، އޭގެ ފަހުން ލީގުގައި ބޯންމައުތާ ދެކޮޅަށް ކުޅުނު މެޗުން ވެސް އެ ޓީމު ވަނީ ބަލިވެފަ އެވެ. އަދި އޭގެ ފަހުން ޔުއެފާ ޗެމްޕިއަންސް ލީގުގައި ސްޕޯޓިންއާ ދެކޮޅަށް ކުޅުނު މެޗުން ވެސް ސިޓީ ވަނީ ބަލިވެފަ އެވެ. ބްރައިޓަން އަތުން ވީ ބައްޔާއެކު ސިޓީ އަށް ދަށް ނަތީޖާ އަކާ ކުރިމަތިލާން ޖެހުނުއިރު، މިއީ ސިޓީގެ ކޯޗުކަމާ ޕެޕް ގާޑިއޯލާ ހަވާލުވީ ފަހުން ޖެހި ޖެހިގެން ހަތަރު މެޗުން އެ ޓީމު ބަލިވި ފުރަތަމަ ފަހަރެވެ.

މިހާތަނަށް ލީގުގައި ކުޅުނު 11 މެޗުން 23 ޕޮއިންޓާ އެކު ސިޓީ އޮތީ ދެ ވަނައިގަ އެވެ. މި ސީޒަންގެ ލީގުގައި ސިޓީ ވަނީ ދެ މެޗުން ބަލިވެފަ އެވެ.