އެމްއެންޔޫއެސްޔޫ ފުޓްސަލް ފިއެސްޓާ: އެފްއީ ބަލިކޮށް ފިރިހެން ޑިވިޝަންގެ ޗެމްޕިއަންކަން އެމްއައި ކޮލެޖަށް
ހުކުރު ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗުގައި އެމްއައި ކޮލެޖުން ވަނީ 3-0 އިން އެފްއީ ބަލިކޮށް މުބާރާތުގެ ޗެމްޕިއަންކަން ހޯދައިފަ އެވެ.
ފިރިހެން ޑިވިޝަންގެ ޗެމްޕިއަންކަން ހޯދި އެމްބީއެސް އަށް ތަށި ހަވާލު ކުރަނީ
ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމު ކޮށްގެން ކުރިއަށް ގެންދިޔަ، އެމްއެންޔޫއެސްޔޫ ފުޓްސަލް ފިއެސްޓާ 2024ގެ ފިރިހެން ޑިވިޝަންގެ ފައިނަލްގައި ފެކަލްޓީ އޮފް އެޑިއުކޭޝަން (އެފްއީ) ބަލިކޮށް، އެމްއައި ކޮލެޖުން މުބާރާތުގެ ޗެމްޕިއަންކަން ހޯދައިފި އެވެ.
ހުކުރު ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗުގައި އެމްއައި ކޮލެޖުން ވަނީ 3-0 އިން އެފްއީ ބަލިކޮށް މުބާރާތުގެ ޗެމްޕިއަންކަން ހޯދައިފަ އެވެ. މެޗުގައި އެމްއައި ކޮލެޖުގެ ލަނޑުތައް ޖެހީ މުޙައްމަދު މިންވާލް އަދި އިބްރާހީމް ނޫރައްދީން އެވެ. މެޗުގައި މޮޅު ކުޅުމެއް ދެއްކި މިންވާލް ވަނީ ދެ ލަނޑު ޖަހައިފަ އެވެ.
މުބާރާތުގެ ފިރިހެން ޑިވިޝަންގެ އެންމެ މޮޅު ފަސް ކުޅުންތެރިންްގެ ތެރޭގައި ހިމެނުނީ ޗެމްޕިއަން އެމްއައިގެ މުޙައްމަދު އަބާން އިމްރާންގެ އިތުރުން، އެފްއީގެ ރައުހާާން ރިފްއަތު، މުޙައްމަދު ސާއިޙް އަޙުމަދު ޝިހާމް، އަޒުހަރު އާދަމް އަދި ވިލާ ކޮލެޖުގެ މުޙައްމަދު އައިހަމް އެވެ. ފިރިހެން ޑިވިޝަންގެ އެންމެ އުންމީދީ ކުޅުންތެރިޔަކަށް ހޮވުނީ ވެސް ވިލާ ކޮލެޖުގެ އަޙުމަދު އައުޝަމް ޙުސެއިން އެވެ.
ފިރިހެން ޑިވިޝަންގެ އެންމެ މޮޅު ކޯޗަކަށް ހޮވުނީ ޗެމްޕިއަން އެމްއައި ކޮލެޖުގެ ކޯޗު މުޙައްމަދު ހައިދަރު އެވެ. އެންމެ ގިނަ ލަނޑު ޖެހި ކުޅުންތެރިޔަކަށް އެމްއައި ކޮލެޖުގެ މިންވާލް ހޮވުނުއިރު، އޭނާ ވަނީ މުބާރާތުގައި ޖުމުލަ 22 ލަނޑު ޖަހައިފަ އެވެ. އަދި މުބާރާތުގެ ފިރިހެން ޑިވިޝަންގެ އެންމެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.
މިއަހަރުގެ ފިރިހެން ޑިވިޝަންގައި ވަނީ ޖުމުލަ 18 ޓީމަކުން ބައިވެރިވެފަ އެވެ. މުބާރާތުގެ ޗެމްޕިއަން ޓީމަށް ފައިސާގެ އިނާމުގެ ގޮތުގައި 10،000 (ދިހަ ހާސް) ރުފިޔާ ދިނުމަށް ހަމަޖެހިފައިވާއިރު، ރަނަރަޕް ޓީމަކަށް 5000 (ފަސް ހާސް) ރުފިޔާ ދިނުމަށް ވަނީ ހަމަޖެހިފަ އެވެ. 2012 ވަނަ އަހަރުން ފެށިގެން ބާއްވަމުން އަންނަ މި މުބާރާތަކީ ރާއްޖޭގެ މަތީ ތައުލީމު ދޭ ކޮލެޖު/ޔުނިވާސިޓީތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތެކެވެ.
މިއަހަރުގެ މުބާރާތުގެ ފައިނަލް މެޗު ޝަރަފުވެރި ކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް އަދި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
