ނޮވެމްބަރު 3ގެ ޖަލްސާ އަޑު އަހަން އިންދާ އިވުނު ވާހަކަ އަކީ ރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ޕޮލިހަށް ވަންނަން މަޖުބޫރުވާ ޕްރޮގްރާމެއް ފަށަން ހަމަޖެހިފައިވާ ކަމަށް ރައީސް ޑރ.މުހައްމަދު މުއިއްޒު ވިދާޅުވި އަޑެވެ. އެ ދުވަހު ގެ ޖަލްސާގައި ވާހަކަދައްކަވަމުން ވިދާޅުވެފައެވެ. އެގޮތުން ރައީސް ވަނީ ކުރިއަށް އޮތް ހަތަރު އަހަރުގެ ތެރޭގައި ސިފައިންގެއަށް ކޮންމެ އަހަރަކު 1،000 މީހުން އަދި ފުލުހުންގެ ހިދުމަތް ފުޅާކުރަން މި ދައުރުގެ ތެރޭގައި އިތުރު 1000 ފުލުހުން ބޭނުންވާ ކަމަށް ފާހަގަކުރައްވާފައެވެ. ވަޒީފާ ހޯދުމުގެ ފުރުސަތު ނުލިބިފައި، ތައުލީމް އެކަށީގެންވާ ވަރަކަށް ނުލިބި މަގުމައްޗަށް ގިނަވާ ކުދިންނަށް އެ ވަޒީފާތައް ހޯދާދިނުމަށް މަސައްކަތް ކުރައްވާނެ ކަމަށް ރައީސް ވިދާޅުވިއެވެ.

ވިދާޅުވި ވާހަކަ އަކީ އެކަމުގެ ސަބަބުން މުޖުތަމައު އައި ކުދިން އުފުލަން ޖެހޭ ބުރަ ކުޑަވާނެ ކަމަށެވެ. ދެން ފެނުނު މަންޒަރަކީ ޖެހިގެން އައި ދުވަހު ރަނގަޅު ނަތީޖާ ނުލިބޭ ދަރިވަރުން ސިފައިން އަދި ފުލުހުންގެ ހިދުމަތަށް ވަންނަން މަޖުބޫރުކުރުން ދިފާއުކޮށް ތައުލީމީ ވަޒީރު އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވާހަކަދެއްކެވިތަނެވެ. އެ މަނިކުފާނު އެފަދައިން ވިދާޅުވީ މާލެ ސީއެޗްއެސްއީ ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ. ޑރ.ޝަފީއު އަށް ފެނިވަޑައިގަންނަވާ ގޮތުގައި ދަރިވަރުންނަށް އިތުރު ފުރުސަތުތަކެއް ނުވަތަ އިތުރު ގޮތްތަކެއް އެކަމުގެ ސަބަބުން ލިބޭނެއެވެ. އީސްގެ އެ ނިންމުމުގެ ނަތީޖާއަކަށް ވެގެންދާނީ ރައީސްގެ ޒައާމަތާ ހަވާލުވިއިރު ވިދާޅުވި ފަދައިން ފިކުރީ ގޮތުން ގައުމު ތަރައްގީ ކުރުން ކަމަށް ވެސް އެ މަނިކުފާނު ވިދާޅުވިއެވެ. އެކަމުގެ ސަބަބުން ގައުމު އާރާސްތު ކުރުމަށްޓަކައި ގިނަ ޒުވާނުންތަކެއް ބިނާވެގެން ދާނެ ކަމަށް ވަޒީރު ވިދާޅުވިއެވެ. ހަމައެހެންމެ އޭގެ ސަބަބުން އޯލެވެލް ނިންމާ ދަރިވަރުންގެ ތެރެއިން މަގުމަތިވާ އަދަދު މަދުވެގެން ދާނެކަމަށް އެ މަނިކުފާނު ވިދާޅުވިއެވެ.

ޤަބޫލުކުރަން ޖެހޭ ހަގީގަތަކީ ސިފައިންގެ އާއި ފުލުހުންގެ ޚިދުމަތަކީ ސަލާމަތީ ޚިދުމަތެއް ކަމެވެ. ސިފައިން ގެއަށް ނުވަތަ ފުލުހަށް ވަނުމުގެ ބިންގަލަކީ ތިމާ މީހާ އަށް ލިބޭ ދަށް ނަތީޖާ ކަމަށް ވެއްޖެއްޔާ އޭނާ އަމިއްލަ ނަފްސަށް ކުރާ އިތުބާރު އުފުލޭނީ ކިހިނެތްތޯއެވެ. އެއީ ތިމާ ސިފައިންގެ އަށް ނޫނީ ފުލުހަށް ވަންނަ ހަމައެކަނި ސަބަބަށް ވެއްޖެ ނަމަ ކަންކަން ރަނގަޅުވާނީ ކިހިނެއްހެއްޔެވެ؟ ބުރަ ބޮޑު ތަމްރީންތައް ހަދާނީ ކިހިނެތްހެއްޔެވެ؟ ލޮތްބާއި އެކު ދޭން ޖެހޭ ސަލާމަތީ ޚިދުމަތަށް ގޮތް ހުސްވެގެން ނުކުންނަ މީހަކު ކުރިމަތިލާނީ ބަރު ހިތަކާއި އެކުގައި ނޫންތޯއެވެ؟ އަޅުގަނޑުގެ ނަޒަރުގައި ސިފައިންގެ އާއި ފުލުހަށް ވުރެ ބޮޑަށް އިޚްތިޔާރުކޮށްގެން ވަޒީފާ އަށް ދާން ޖެހޭ އެހެން ތަނެއް ނެތެވެ. އެހެނީ އެ މީހުން ކުރިމަތި ލަނީ އާއްމުންނާއެވެ. ހަވާލުވަނީ ޤައުމީ ޒިންމާއަކާއެވެ. އެ މީހުންގެ އަތްމަތީގައި ވަނީ ޤާނޫނުތައް ނަގަހައްޓާ، މުޖުތަމައު މަސަލަސްކުރުމާއި، ހިމާޔަތްކުރުމުގެ ޒިންމާއެވެ.

ނޫނީ ބަސްނާހައިގެން، ނޫނީ ނުކިޔަވައިގެން އިސްލާހުކުރަން ވައްދާ ތަނަކަށް ސިފައިންގެ އާއި ފުލުހުންވީ ޒަމާން އަލުން އިއާދަކުރަންވީހެއްޔެވެ؟ އަޅުގަނޑަށް ވިސްނޭ ގޮތުގައި ދަށް ނަތީޖާ ލިބޭ ކުދިންނަށް ވެސް ރަނގަޅު ފުރުސަތުތަކެއް ލިބެންވާނެއެވެ. އެކަމަކު އެ ފުރުސަތު ލިބެންވާނީ އެ ނަތީޖާގެ މަތީގައި ވާ މަޖުބޫރަކުން ނޫނީ އަޅުވާ ޓެގަކުން ނޫނެވެ. މިވަރުން ދަންޏާ ދެން ބުނާނެތާއެވެ. ނުކިޔަވާ ފާސް ނުވެގެން ދެން ޖެހޭނީ ސިފައިންގެއަށް ނޫނީ ފުލުސް އޮފީހުގައި ޚިދުމަތްކުރާކަށް ނޫން ހެއްޔެވެ؟ އެހެން ބުނާ އަޑު އަހަން ބޭނުންވާނެ ފުލުހެއް ވެސް ސިފައިންގެ މީހެއްވެސް ހުންނާނެހެން ހިއެއް ނުވެއެވެ. ސިފައިންގެ އަށް އަދި ފުލުހަށް ވަންނަ މީހުންނަކީ އެއަށް ވުރެ ބޮޑަށް އަމިއްލަ ޤައުމަށް ޚިދުމަތް ކުރުމުގެ އިސްނެގުމެއް ހުންނަން ޖެހޭ ބައެކެވެ. އެއަށް ވުރެ ވަތަނީ ބައެކެވެ. މަޖުބޫރަކުން ފަށާ ޚިދުމަތަކަށް ސަލާމަތީ ޚިދުމަތް ވެގެން ނުވާނެއެވެ.