އެމެރިކާގެ ރިޔާސީ އިންތިޚާބު ކާމިޔާބު ކުރައްވައިފިކަން ޓްރަމްޕް އިއުލާން ކުރައްވައިފި

ފޮކްސް ނިއުސްގެ ޕްރޮޖެކްޝަންތަކުން ރިޕަބްލިކަން ޕާޓީގެ ޑޮނަލްޑް ޓްރަމްޕް 2024 ވަނަ އަހަރުގެ ރިޔާސީ އިންތިޚާބުގައި ކާމިޔާބު ހޯއްދަވައިފި ކަމަށް ކަމަށް ބުނުމާއެކު، ރިޔާސީ އިންތިޚާބު ކާމިޔާބު ކުރައްވައިފިކަން ޓްރަމްޕް އިއުލާން ކުރައްވައިފިއެވެ.

ހަތަރު އަހަރު ފަހުން ޓްރަމްޕް ވައިޓް ހައުސް އަށް އެނބުރި ވަޑައިގަތުމަށް ވާދަ ކުރެއްވި މި ރޭހުގައި، އެހެން މީޑިއާ ރިޕޯޓުތަކުގައިވެސް ވަނީ އޭނާ ކުރި ހޯއްދަވަމުން ގެންދަވާ ކަމަށެވެ.

"އެމެރިކާއިން އަޅުގަނޑުމެންނަށް މި ދިނީ މިހާތަނަށް ދުވަހަކުވެސް ނުދޭފަދަ ބާރުގަދަ މެންޑޭޓެއް،" ބުދަ ދުވަހުގެ ހެނދުނު ޕާމް ބީޗް ކައުންޓީ ކޮންވެންޝަން ސެންޓަރުގައި އެއްވެފައިވާ ސަޕޯޓަރުންގެ ކުރިމަތީގައި އޭނާ ވިދާޅުވިއެވެ.

އެމެރިކާގެ މަޝްހޫރު އެހެން މީޑިއާ ތަކުން ޓްރަމްޕަށް ރިޔާސީ ރޭސް ކާމިޔާބުވެއްޖެ ކަމަށް ކަނޑައަޅާފައެއް ނުވެއެވެ. ނަމަވެސް އެޑިސަން ރިސާރޗްގެ މަޢުލޫމާތުތަކުން ދައްކާގޮތުގައި "ބެޓްލްގްރައުންޑް ސްޓޭޓް" ތަކުގެ ތެރެއިން ޕެންސިލްވޭނިއާ، ނޯތު ކެރޮލައިނާ އަދި ޖޯޖިއާ ޓްރަމްޕް ކާމިޔާބު ކުރައްވާފައި ވުމާއެކު އަދި އަނެއް ހަތަރު ސްޓޭޓުގައި ޓްރަޕް ކުރީގައި އުޅުއްވާތީ ޓްރަމްޕް އަށް އިންތިޚާބު ކާމިޔާބުވުމުގެ ފުރުސަތު ބޮޑުކަން ފާހަގަ ކޮށްފައިވެއެވެ.

އަނެއްކޮޅުން އެސޯސިއޭޓެޑް ޕްރެސް (އޭޕީ) އިން ލަފާކުރާ ގޮތުގައި އެމެރިކާގެ ސެނެޓުގެ ކޮންޓްރޯލް ރިޕަބްލިކަން ޕާޓީން ހޯދާނެ ކަމަށް ވަނީ ބެލެވިފައެވެ.

ނޮވެމްބަރު 5 ގެ އިންތިޚާބުގައި އެމެރިކާގައި ވޯޓުލުން ކުރިއަށް ދިޔައީ އާންމު ގޮތެއްގައި އޮމާންކަމާއެކު ކަމަށްވެސް ރިޕޯޓްތައް ބުނެއެވެ.

ރައީސްކަން ކާމިޔާބުކުރުމަށް ކެންޑިޑޭޓަކަށް މަދުވެގެން 270 އިލެކްޓޯރަލް ވޯޓު ބޭނުންވާއިރު، ރާއްޖޭ ގަޑިން މެންދުރުވީ އިރު ޓްރަމްޕް ދެވަނަ ދައުރަކަށް ހޮވިވަޑައިގަތުމަށް ބޭނުންވަނީ އެންމެ 3 އިލެކްޓޯރަލް ވޯޓެވެ.

އިންތިޚާބުގެ ދުވަހަށް ޓްރަމްޕް ނުކުންނެވީ ވައިޓް ހައުސް އަނބުރާ ހޯއްދެވުމުގެ 50-50 ފުރުސަތެއްގައި ކަމަށް ދިރާސާ ކުރާ ފަރާތްތަކުން ބުނެއެވެ.

ޓްރަމްޕް ވަނީ އޭނާ އަށް ތާއިދު ކުރާ ފަރާތްތަކަށް ޝުކުރު އަދާކުރައްވާފައެވެ.

"މި އާދަޔާ ޚިލާފް ސިޔާސީ ހަރަކާތުގައި އަޅުގަނޑުމެންގެ އެތައް ހާސް ރަހުމަތްތެރިން ޝާމިލުވޭ،" ޓްރަމްޕް ވިދާޅުވިއެވެ. "މިއީ މީގެ ކުރިން އެއްވެސް މީހަކު ދެކިފައިނުވާ ފަދަ މޫވްމަންޓެއް، އަދި ތެދުތެދަށް ދަންނަވަންޏާ، މިއީ އަޅުގަނޑު ޤަބޫލުކުރާ ގޮތުގައި ތާރީޚުގައި އެންމެ މަތިވެރި ސިޔާސީ މޫވްމަންޓް."

"އަޅުގަނޑުމެންގެ ޤައުމު ހަމަ މަގަށް އެޅުވުމަށް އެހީތެރިވާނަން. އަޅުގަނޑުމެންގެ ޤައުމު ރަނގަޅު ކުރުމަށް އެހީތެރިވާނަން،" އާންމު ގޮތެއްގައި ބައިބައިވުން އުފެދޭ ގޮތައް ބަސްމަގު ބަހައްޓަވާކަން ފާހަގަ ކުރެވޭ ޓްރަމްޕްގެ ރާގު ބަދަލު ކުރައްވާ ގައުމީ އެއްބައިވަންތަ ކަމުގެ ރޫހުގައި ވިދާޅުވިއެވެ.

"އަޅުގަނޑުމެންގެ ދަރިންނަށާއި އަދި އެންމެންނަށް ޙައްޤުވާ ވަރުގަދަ، ރައްކާތެރި އަދި ކުރިއަރާފައިވާ އެމެރިކާއެއް ގެނެސްދިނުމަށް ޓަކައި އަޅުގަނޑުމެން ހުއްޓުމެއްނެތި މަސައްކަތްކުރާނަން،" އޭނާ ވިދާޅުވިއެވެ. "މިއީ ޙަޤީޤަތުގައިވެސް އެމެރިކާގެ ރަން ޒަމާން ކަމުގައި ވާނެ."

އެމެރިކާގެ ރިޔާސީ އިންތިޚާބުގައި އަދިވެސް ގުނަން ޖެހޭ އެތައް ލައްކަ ވޯޓު ހުރި އިރު އަދި ރަސްމީ ނަތީޖާ އިއުލާނު ކުރަން ދެތިން ދުވަސް ނަގާނެ ކަމަށް ބެލެވޭއިރު، ދުނިޔޭގެ ގައުމުތަކުގެ ވެރިން ގެންދަވަނީ ޓްރަމްޕަށް މަރުހަބާ ވިދާޅުވަމުންނެވެ. އިންޑިއާގެ ބޮޑުވަޒީރު ނަރެންދްރަ މޯދީ އާއި ޔޫކްރެއިންގެ ރައީސް ވުލެޑިމިއަރ ޒެލެންސްކީ ވަނީ އިންތިޚާބުން ހޯއްދެވި ކާމިޔާބީ އަށް ޓްރަމްޕް އަށް މަރުހަބާ ވިދާޅުވެފައެވެ.