ދަށް ނަތީޖާ ލިބޭ ދަރިވަރުން ސިފައިން އަދި ފުލުހުންގެ ހިދުމަތަށް ވަންނަން މަޖުބޫރުކުރުން ދިފާއުކޮށް ތައުލީމީ ވަޒީރު ވާހަކަދައްކަވައިފި

ރަނގަޅު ނަތީޖާ ނުލިބޭ ދަރިވަރުން ސިފައިން އަދި ފުލުހުންގެ ހިދުމަތަށް ވަންނަން މަޖުބޫރުކުރުން ދިފާއުކޮށް ތައުލީމީ ވަޒީރު އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވާހަކަދައްކަވައިފިއެވެ.

އެ މަނިކުފާނު އެފަދައިން ވިދާޅުވީ މާލެ ސީއެޗްއެސްއީ ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ.

ރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ޕޮލިހަށް ވަންނަން މަޖުބޫރުވާ ޕްރޮގްރާމެއް ފަށަން ހަމަޖެހިފައިވާ ކަމަށް ރައީސް ޑރ.މުހައްމަދު މުއިއްޒު ވަނީ ނަސްރުގެ ދުވަހުގެ ޖަލްސާގައި ވާހަކަދައްކަވަމުން ވިދާޅުވެފައެވެ. އެގޮތުން ރައީސް ވަނީ ކުރިއަށް އޮތް ހަތަރު އަހަރުގެ ތެރޭގައި ސިފައިންގެއަށް ކޮންމެ އަހަރަކު 1،000 މީހުން އަދި ފުލުހުންގެ ހިދުމަތް ފުޅާކުރަން މި ދައުރުގެ ތެރޭގައި އިތުރު 1000 ފުލުހުން ބޭނުންވާ ކަމަށް ފާހަގަކުރައްވާފައެވެ. ވަޒީފާ ހޯދުމުގެ ފުރުސަތު ނުލިބިފައި، ތައުލީމް އެކަށީގެންވާ ވަރަކަށް ނުލިބި މަގުމައްޗަށް ގިނަވާ ކުދިންނަށް އެ ވަޒީފާތައް ހޯދާދިނުމަށް މަސައްކަތް ކުރައްވާނެ ކަމަށް ރައީސް ވިދާޅުވިއެވެ.

އެކަމާއި ގުޅޭގޮތުން އާއްމުންނާއި ސިޔާސީ މީހުންގެ ފާޑުކިޔުން ސަރުކާރަށް އަމާޒުވެފައިވާ މި ދަނޑިވަޅުގައި، ޑރ.ޝަފީއު ވިދާޅުވީ ދަރިވަރުންނަށް އިތުރު ފުރުސަތުތަކެއް ނުވަތަ އިތުރު ގޮތްތަކެއް ފަހިކޮށްދޭން ޖެހޭ ކަމަށެވެ. ރައީސްގެ އެ ނިންމުމުގެ ނަތީޖާއަކަށް ވެގެންދާނީ ރައީސްގެ ޒައާމަތާ ހަވާލުވިއިރު ވިދާޅުވި ފަދައިން ފިކުރީ ގޮތުން ގައުމު ތަރައްގީ ކުރުން ކަމަށް ވެސް އެ މަނިކުފާނު ވިދާޅުވިއެވެ. އެކަމުގެ ސަބަބުން ގައުމު އާރާސްތު ކުރުމަށްޓަކައި ގިނަ ޒުވާނުންތަކެއް ބިނާވެގެން ދާނެ ކަމަށް ވަޒީރު ވިދާޅުވިއެވެ. ހަމައެހެންމެ އޭގެ ސަބަބުން އޯލެވެލް ނިންމާ ދަރިވަރުންގެ ތެރެއިން މަގުމަތިވާ އަދަދު މަދުވެގެން ދާނެކަމަށް އެ މަނިކުފާނު ވިދާޅުވިއެވެ.

އެ ރަސްމިއްޔާތުގައި މާލެ ސީއެޗްއެސްއީ ހުޅުވުމާއި މެދުވެސް އެ މަނިކުފާނު ވާހަކަދެއްކެވިއެވެ. އެގޮތުން މީގެކުރިން އޭލެވަލް ކިޔަވަން ފަށަނީ އަހަރަކު 1،100 ދަރިވަރުން ކަމަށާއި، މި އަހަރު އޭލެވަލް ފަށާފައި ވަނީ 2،000 އާ ގާތްކުރާ އަދަކަކަށް ދަރިވަރުން ތިބެގެން ކަމަށް މިނިސްޓަރ ވިދާޅުވިއެވެ. މާލެ ސީއެޗްއެސްއީ ހުޅުވުމަކީ ގާތުން ތައުލީމް ފޯރުކޮށްދިނުމަށް ލިބުނު ކުރިއެރުމެއް ކަމަށް އެ މަނިކުފާނު ވިދާޅުވިއެވެ.