މި އަހަރުގެ ދެވަނަ ކުއާރޓާގައި އިގްތިސާދީ ދުވެލި ދަށަށް ހިނގައްޖެ
ބޭރު ފައިސާގެ ރިޒާވް މިހާރު ހުރީ 371.2 މިލިއަން ޑޮލަރުގައި ކަމަށް ބުނާއިރު، މިއީ ފާއިތުވި އަހަރާ އަޅާބަލާއިރު 37 އިންސައްތައިގެ ދަށްވުމެއްކަން ފާހަގަ ކުރެވެއެވެ.
ރާއްޖޭގެ ރިސޯޓެއްގައި ޓޫރިސްޓުން ހިތްއުފާ ކޮށްލަނީ - އިގްތިސާދު އޮތީ ފަތުރުވެރިކަމަށް ބަރޯސާވެފައި
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން ހޯމަ ދުވަހު ނެރުނު "އިކޮނޮމިކް އަޕްޑޭޓު" ގައި 2024 ވަނަ އަހަރުގެ ދެވަނަ ކުއާޓަރގައި ރާއްޖޭގެ އިޤްތިޞާދީ ދުވެލި 4.5 އިންސައްތައިގައި ހުރިކަމަށް ބުނިއިރު މިއަހަރުގެ ފުރަތަމަ ކުއާޓަރުގައި ފެނުނު 7.7 އިންސައްތައިގެ ކުރިއެރުމާ އަޅާބަލާއިރު އިގްތިސާދީ ދުވެލި ދަށަށް ޖެހިފައިވާކަން ފާހަގަ ވެއްޖެއެވެ.
ދެވަނަ ކުއަރޓާގައި އިގްތިސާދީ ދުވެލި ދަށަށް ދިޔައިރު، އެމްއެމްއޭ އިން ބުނާ ގޮތުގައި 2024 ވަނަ އަހަރު ނިމޭއިރު އިޤްތިޞާދު 5.5 އިންސައްތަ އަށް ކުރިއަރާނެކަމަށް ލަފާކުރެވެއެވެ.
އެމްއެމްއޭގެ ރިޕޯޓުން ދައްކާގޮތުގައި، ފަތުރުވެރިކަމުގެ ދާއިރާއަށް ބަލާއިރު، 2024 ގެ ސެޕްޓެމްބަރު މަހު 132,795 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ ވޭތުވެދިޔަ އަހަރުގެ މިމުއްދަތާ އަޅާބަލާއިރު 1 އިންސައްތައިގެ ކުރިއެރުމެކެވެ. އަދި މިއަހަރުގެ ޖަނަވަރީން ސެޕްޓެމްބަރަށް ޖުމްލަ 10 އިންސައްތައިގެ ގެ ކުރިއެރުމެއް ވަނީ ފެނިފައެވެ.
އެމްއެމްއޭ ގެ ރިޕޯޓު ބުނާގޮތުގައި ބޭރު ފައިސާގެ ރިޒާވް މިހާރު ހުރީ 371.2 މިލިއަން ޑޮލަރުގައި ކަމަށް ބުނާއިރު، މިއީ ފާއިތުވި އަހަރާ އަޅާބަލާއިރު 37 އިންސައްތައިގެ ދަށްވުމެއްކަން ފާހަގަ ކުރެވެއެވެ.
ސަރުކާރުގެ ދަރަނި ޖީޑީޕީގެ ނިސްބަތުން 98 އިންސައްތައިގައި ހުރިކަން ވެސް އެމްއެމްއޭ އިން ފާހަގަ ކުރެއެވެ.
އަގުތަކުގެ މިންގަނޑަށް ބަލާއިރު، 2024 ގެ ސެޕްޓެމްބަރު މަހު އިންފްލޭޝަން ރޭޓް ހުރީ 1.1 އިން ސައްތައިގައެވެ. މިއީ އޮގަސްޓް މަހު ހުރި 1.4 އިންސައްތަ އާ އަޅާބަލާއިރު ދަށް އަދަދެކެވެ.
