އެސްޕަންޔޯލް އަތުން މޮޅުވެ، ބާސެލޯނާ އަށް ނުވަ ޕޮއިންޓުގެ ލީޑެއް

ސްޕެނިޝް ލީގުގައި އެސްޕަންޔޯލާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން އެއް ވަނައިގައި ނުވަ ޕޮއިންޓުގެ ލީޑެއް ނަގައިފި އެވެ.

އާދީއްތަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ވަނީ ތިން ލަނޑު ޖަހައިފަ އެވެ. ދެ ވަނަ ހާފުގައި އެސްޕަންޔޯލް އިން ލަނޑެއް ޖެހިއިރު، މެޗުގައި އެ ޓީމުން ޖެހި ދެ ލަނޑެއް ވީޑިއޯ އެސިސްޓެންޓު ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.

މެޗު ފަށައިގެން 12 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ސްޕެއިންގެ ޑެނީ އޮލްމޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ލަމީން ޔަމާލް އެވެ. އޭގެ ފަހުން މެޗުގެ 23 ވަނަ މިނެޓުގައި ރަފީނިއާ ވަނީ ބާސެލޯނާގެ ދެ ވަނަ ލަނޑު ޖަހައި، އެ ޓީމުގެ ލީޑު ފުޅާ ކޮށްފަ އެވެ. ބާސެލޯނާގެ ތިން ވަނަ ލަނޑު މެޗުގެ 31 ވަނަ މިނެޓުގައި ޖެހީ އޮލްމޯ އެވެ. ފުރަތަމަ ހާފުގައި ޖޮފްރޭ ސަރޭރާސް ޖެހި ލަނޑު ވީއޭއާރުން ވަނީ ބަލައި ނުގަންނަން ނިންމައިފަ އެވެ.

މެޗުގެ ދެ ވަނަ ހާފު ފަށައިގެން 13 ވަނަ މިނެޓުގައި އެސްޕަންޔޯލްގެ އަލްވާރޯ ތެހޭރޯ ޖެހި ލަނޑު ވެސް، ވީއޭއާރުން ވަނީ ބަލައި ނުގަންނަން ނިންމައިފަ އެވެ. އޭގެ ފަހުން މެޗުގެ 63 ވަނަ މިނެޓުގައި ޖަވީ ޕުއާޑޯ ވަނީ އެސްޕަންޔޯލްގެ ފުރަތަމަ ލަނޑު ޖަހައިފަ އެވެ.

މޮޅާއެކު ބާސެލޯނާ އިން އެއް ވަނައިގައި އޮތީ މިހާތަނަށް ކުޅުނު 12 މެޗުން 33 ޕޮއިންޓު ހޯދައިފަ އެވެ. ދެ ވަނައިގައި އޮތް އެންމެ ފަހުގެ ޗެމްޕިއަން ވާދަވެރި ރެއާލް މެޑްރިޑަށް ލިބެނީ 24 ޕޮއިންޓެވެ. މި ސީޒަންގެ ލީގުގައި މިހާތަނަށް ކުޅުނު 11 މެޗުން ބާސެލޯނާ ވަނީ މޮޅުވެފަ އެވެ. އެއް މެޗުން އެ ޓީމު ވަނީ ބަލިވެފަ އެވެ. އައު ކޯޗު ހަންސީ ފްލިކްގެ އިރުޝާދުގެ ދަށުން ބާސެލޯނާ އިން އަންނަނީ މި ސީޒަންގައި ރަނގަޅު ނަތީޖާތަކެއް ނެރެމުންނެވެ.