ދޮޅިޔަދޫ އާއި ގަސްވެލި ވިއްކާލަން އެސްބީއައި އިން އިއުލާނުކޮށްފި
އެސްބީއައި އިން މި ދެ ރަށުގެ ހައްގުތައް ވިއްކާލުމަށް ހުޅުވާލީ، މި ރަށްތަކުގެ ވެރިވަފަރާތްތަކުން ބޭންކަށް ދައްކަންޖެހޭ ފައިސާގެ ތެރެއިން ނުދައްކާ ހުރި ފައިސާ ހޯދުމަށް ބޭންކަށް ކޯޓުން ހުއްދަ ދިނުމާ ގުޅިގެން ކަމަށް އެސްބީއައި އިން ވަނީ ބުނެފައެވެ.
ދޮޅިޔަދޫ
ރާއްޖޭގެ މަޝްހޫރު ދެ ރިސޯޓެއް ވިއްކާލުމަށް ސްޓޭޓް ބޭންކް އޮފް އިންޑިއާ (އެސްބީއައި) ގެ މާލޭ ގޮފިން ހުޅުވާލައިފިއެވެ.
މިއީ ށ. އަތޮޅުގެ ދޮޅިޔަދޫ އައިލެންޑް ރިސޯޓާއި މ. ގަސްވެލި، (ދެކުނުބޮޑުވެލި އަދި ކުޑަފުށި) ރިސޯޓެވެ. އެސްބީއައި އިން މި ދެ ރަށުގެ ހައްގުތައް ވިއްކާލުމަށް ހުޅުވާލީ، މި ރަށްތަކުގެ ވެރިވަފަރާތްތަކުން ބޭންކަށް ދައްކަންޖެހޭ ފައިސާގެ ތެރެއިން ނުދައްކާ ހުރި ފައިސާ ހޯދުމަށް ބޭންކަށް ކޯޓުން ހުއްދަ ދިނުމާ ގުޅިގެން ކަމަށް އެސްބީއައި އިން ވަނީ ބުނެފައެވެ.
ދޮޅިޔަދޫގެ ވެރިފަރާތަކީ ދޮޅިޔަދޫ އިންވެސްޓްމަންޓް ޕްރައިވެޓް ލިމިޓެޑެވެ. މި ރިސޯޓުގެ އެންމެ ދަށް އަގެއް ކަމަށް ކަނޑައަޅާފައިވަނީ 12 މިލިއަން އެމެރިކާ ޑޮލަރެވެ. ދޮޅިޔަދޫ ކުއްޔަށް ދިނުމުގެ އެއްބަސްވުމުގައި ސަރުކާރާއެކު ސޮއިކޮށްފައިވަނީ 5 މެއި 2005 ގައެވެ. މި އެއްބަސްވުމުގެ ދަށުން 4 މެއި 2040 އާ ހަމައަށް ރިސޯޓް ހިންގުމުގެ ޙައްޤުތައް ލިބިދެއެވެ.
އެސްބީއައި އިން ވިއްކާލަން އިއުލާނު ކުރި ގަސްވެލި ރިސޯޓު (ދެކުނުބޮޑުވެލި އަދި ކުޑަފުށި) ގެ ވެރިފަރާތަކީ ގަސްވެލި އައިލެންޑް ޕްރައިވެޓް ލިމިޓެޑެވެ. މި ރަށުގެ އެންމެ ދަށް އަގު ކަމަށް ކަނޑައަޅާފައިވަނީ 1 މިލިއަން އެމެރިކާ ޑޮލަރެވެ. ރިސޯޓު ހިންގުމުގެ އެއްބަސްވުމުގައި ސޮއި ކޮށްފައިވަނީ 3 ސެޕްޓެމްބަރ 2006 ގައެވެ. އެއްބަސްވުމުގެ މުއްދަތު ހަމަވާނީ 2 ސެޕްޓެމްބަރ 2031 ގައެވެ.
އެސްބީއައި އިން ކޮށްފައިވާ އިއުލާނުގައި ބުނެފައިވާ ގޮތުގައި މި ރަށްތައް ގަތުމަށް ޝައުޤުވެރިވާ ފަރާތްތަކަށް 22 އޮކްޓޯބަރު އިން 2 ޑިސެމްބަރު 2024 އާ ހަމައަށް ބިޑް ހުށަހެޅުމުގެ ދަޢުވަތު ވަނީ ހުޅުވާލެވިފައެވެ. ބިޑް ހުޅުވުން އޮންނާނީ 2 ޑިސެމްބަރު 2024 ގައި އެސްބީއައިގެ މާލޭ ގޮފީގައި ކަމަށް ބުނެފައިވެއެވެ.
އެސްބީއައިން ބަޔާންކޮށްފައިވާ ގޮތުގައި ކަނޑައެޅިފައިވާ އެންމެ ދަށް އަގަށްވުރެ ދަށުން އަގު ހުށަހަޅާ ބިޑްތައް ބާޠިލްކުރެވޭނެއެވެ.
ބީލަމުގައި ބައިވެރިވުމަށްށްޓަކައި، ބިޑް ހުށަހަޅާ ފަރާތްތަކުން 15,000 އެމެރިކާ ޑޮލަރުގެ އަރނެސްޓް މަނީ ޑިޕޮސިޓެއް (އީއެމްޑީ) ބަހައްޓަން ޖެހެއެވެ.
ފައިސާ ދެއްކުމުގެ ތާވަލުގައިވާ ގޮތުން، ބިޑު ކާމިޔާބުކުރާ ފަރާތުން އެވޯޑް ލެޓަރ ލިބޭތާ 7 ދުވަހުގެ ތެރޭގައި ދޮޅިޔަދޫއަށް 1 މިލިއަން އެމެރިކާ ޑޮލަރު އަދި ގަސްވެލި ގްރޫޕްގެ ރަށްތަކަށް 300,000 އެމެރިކާ ޑޮލަރު ޑިޕޮސިޓް ކުރަން ޖެހެއެވެ. ބާކީ ފައިސާ ދެއްކުމަށް ކޮންމެ ޕްރޮޕަޓީއަކަށް 30 ދުވަހާއި 60 ދުވަހުގެ މުއްދަތެއް ވަނީ ކަނޑައަޅާފައެވެ.
