ސްޕެނިޝް ސުޕާކަޕްގެ ދެވަނަ ލެގުގައި 2-0 ގެ ނަތީޖާއަކުން ބާސެލޯނާ ބަލިކުރި މެޗުގައި ރެއާލްއިން ދައްކާފައި ވަނީ ތަފާތު މޮޅު ކުޅުމެއް ކަމަށް އެ ޓީމުގެ ކޯޗު ޒައިނުއްދީން ޒިދާން ބުނެފިއެވެ.

ރެއާލްއިން ސްޕެނިޝް ސުޕާކަޕް ކާމިޔާބުކޮށްފައި ވަނީ 5-1 ގެ އެގްރިގޭޓް ނަތީޖާއަކުންނެވެ.

އަމިއްލަ ދަނޑުގައި ރެއާލްއިން ކުޅުނު މެޗުގައި އެ ޓީމުން ވަނީ ބާސާގެ ގޯލަށް ނުރައްކާކޮށް ބާސާގެ ހަމަލާތައް ހުއްޓުވާފައެވެ.

މެޗަށް ފަހު ވާހަކަ ދައްކަމުން ޒިދާން ބުނެފައި ވަނީ ސީޒަންގެ ފުރަތަމަ ދުވަސްކޮޅަށް ވަރަށް ތައްޔާރުވާންޖެހޭ ކަމަށާއި ވަރުގަދަ ޓީމުތަކާއި ދެކޮޅަށް ކުޅެ ތަށިތަކެއް ކާމިޔާބުކުރެވުމުން ވަރަށް ހިތްހަމަޖެހޭ ކަމަށެވެ. މީގެ އިތުރުން ފުރަތަމަ ހާފުގައި ފެނިގެންދިޔައީ އާދަޔާ ހިލާފް މޮޅު ކުޅުމެއް ކަމަށެވެ.

ރެއާލްއިން ވަނީ މި ސީޒަނުގައި މިހާތަނަށް ސްޕެނިޝް ސުޕަކަޕްގެ އިތުރުން މެންޗެސްޓާ ޔުނައިޓެޑާއި ވާދަކޮށް ޔުއެފާ ޔޫރޯޕާ ލީގު ކާމިޔާބުކޮށްފައެވެ.

ޒިދާން ބުނެފައި ވަނީ މި ދެމެޗުގައި ބާސާއަތުން މޮޅުވެވުނު ކަމުގައިވިޔަސް ސްޕެނިޝް ލަލީގާ ފެށުމާ އެކު ބާސާގެ ފަރާތުން މާ ބޮޑު ތަފާތެއް ނުފެންނާނެ ކަމަށެވެ. އަދި ކުރިޔަށް އޮތީ އުނދަގޫ ސީޒަނެއް ކަމަށާއި ހުރިހާ މެޗެއް ވެސް ކާމިޔާބުކުރަން މަސައްކަތްކުރާނެ ކަމަށެވެ.

މީގެ އިތުރުން ވެސް ޒިދާން ބުނެފައި ވަނީ ފުރަތަމަ 11 ގައި ކުޅޭ ކުޅުންތެރިން ނެގުމަށް ވަރަށް އުނދަގޫ ވާކަށެވެ.

ޒިދާންވަނީ ރެއާލްއާ އެއްކޮށް ކޯޗެއްގެ ގޮތުގައި މިހާތަނަށް ހަތް ތަށި ކާމިޔާބުކޮށްފައެވެ.