ސިޔާސީ ޕާޓީއެއްގެ ދެތިން މީހެއްގެ މުށުތެރެއަށް ހުރިހާ ބާރެއް ޖަމާކޮށްފައި އޮތީ ހުދުމުހުތާރު ވެރިކަމެއް ރާއްޖޭގައި އިއާދަކުރަން - ޑީޑީ
17 ޑިސެމްބަރު 2024 | އަންގާރަ 14:22ސަރުކާރުން ގެންނަން ރާވާ އަދި ގެންނަމުންދާ ބޮޑެތި ބަދަލުތަކަކީ ރައްޔިތުންގެ ޙައްޤުތަކަށް ވަރަށް ބޮޑު އުނިކަމެއް އަންނަ ކަންކަން
އެމްޑީޕީގެ ކުރީގެ ރައީސް ޑރ. އިބްރާހިމް ދީދީ
ސިޔާސީ ޕާޓީއެއްގެ ދެތިން މީހެއްގެ މުށުތެރެއަށް ހުރިހާ ބާރެއް ޖަމާކޮށްފައި އޮތީ ހުދުމުހުތާރު ވެރިކަމެއް ރާއްޖޭގައި އިއާދަކުރައްވަން ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޑީޑީ ވިދާޅުވީ ފެހި ޤާނޫނުއަސާސީ އަކީ ވަރަށް ގިނަ ރައްޔިތުންގެ ބުރަ މަސައްކަތުން ވުޖޫދުކުރެވުނު އެއްޗެއް ކަމަށެވެ. އަދި ރާއްޖޭގެ ޒަމާނުއްސުރެ އޮތް ޚުދުމުހުތާރު ވެރިކަން ނިމުމަކަށް ގެނެސް ރައްޔިތުންގެ ޙައްޤުތައް ކަށަވަރު ކުރުމަށް ޓަކައި ފެހިގާނޫނުއަސާސީ ގެނެވި ޚިޔާލު ފާޅުކުރުމުގެ މިނިވަން ކަމާއި، އެއްވެއުޅުމުގެ މިނިވަން ކަމާއި، އާސަންދައިގެ ޚިދުމަތާއި، އުމުރުން ދުވަސްވީ ބޭފުޅުންނަށް ކަށަވަރުކޮށްދީފައި ހުރި ޕެންޝަންގެ ޚިދުމަތާއި، ނުކުޅެދޭ ކުދިންގެ ޙައްޤުތަކާއި، އެކަނިވެރި މައިނަށް އެލަވަންސް ދިނުން ގާނޫނަކުން ލާޒިމުކޮށްފައި ހުރި ގާނޫނުއަސާސީން ކަމަށެވެ.
ނަމަވެސް މި ވެރިކަމަށްވީ އެއް އަހަރު ދުވަހުގެ ތެރޭގައި ސަރުކާރުން ގެންނަން ރާވާ އަދި ގެންނަމުންދާ ބޮޑެތި ބަދަލުތަކަކީ ރައްޔިތުންގެ ޙައްޤުތަކަށް ވަރަށް ބޮޑު އުނިކަމެއް އަންނަ ކަންކަން ކަމަށް ޑީޑީ ވިދާޅުވިއެވެ.
ޑީޑީ ވިދާޅުވީ މި ސަރުކާރު ހުދުމުހުތާރުކަން އިންތިހާއަށް ގޮސްފައިވާ ކަމަށެވެ. ދުނިޔޭ ބައެއް އެހެނިހެން ޤައުމުތަކުގެ ވެސް އޮންނަފަދަ، ނޯތް ކޮރެއާ ކަހަލަ ޤައުމުތަކުގައި އޮންނަ ހުދުމުހުތާރު ވެރިކަމެއްގެ ހުރިހާ ސިފަތަކެއް މަންޒަރުތަކެއް މިހާރު ކަށަވަރުވާން ފަށާފައިވާ ކަމަށެވެ. އޭނާ ވިދާޅުވީ މި ވެރިކަން ފެށިގެން އައި ހިސާބުން ފެށިގެން ވެސް އެ މަންޒަރު ފެންނަ ކަމާއި، ކުރީގައި ރައީސް މައުމޫނުގެ ދައުރުގައި އުފެއްދި އެޓޯލްސް މިނިސްޓްރީ ކަހަލަ ވުޒާރައެއް އުފެއްދި ހިސާބުން ފެށިގެން ވެސް އެމަންޒަރު ޔަގީންވާން ފެށިކަމަށް ޑީޑީ ވިދާޅުވިއެވެ.
ޑީޑީ ވިދާޅުވީ 2018 އަދި 2019 ގައި އެމްޑީޕީއަށް ސުޕަރމެޖޯރިޓީ ލިބުނު ކަމަށެވެ. ނަމަވެސް އެމްޑީޕީއަކީ އަބަދުވެސް ރައްޔިތުންގެ ހައްގުތަކަށް އިހްތިރާމްކުރާ ރައްޔިތުންގެ ޙައްޤުތައް ކަށަވަރުކުރުމަށް ޓަކައި މަސައްކަތް ކުރާ ޕާޓީއެއް ކަމަށެވެ. އަދި އެމްޑީޕީގެ ސިޔާސަތު ބައްޓަންކުރެވިފައި އޮންނަނީވެސް އެއްގޮތަށް ކަމަށާއި، އެމްޑީޕީއަށް ސުޕަމެޖޯރިޓީ އޮތް އިރަކު ރައްޔިތުންގެ ޙައްޤުތައް ނިގުޅައިގަނެވޭ ކަހަލަ އެއްވެސް އަމަލެއް ހިނގާފައި ނޯންނާނެ ކަމަށެވެ.
ޑީޑީ ވިދާޅުވީ އެންޓިޑިފެކްޝަން ގާނޫނު އޭގެ ޒާތުގައިދެކޮޅެއް ނޫން ކަމަށާއި، އެކަމަކު އެންޓި ޑިފެކްޝަން ގާނޫނު ވުޖޫދުކުރުމުގައި އެމްޑީޕީން ވެސް އެއަށް ތާއީދުކޮށްގެން ގާނޫނެއް ވެސް ފާސްކުރެވި ކަމަށެވެ. ނަމަވެސް އެ ގާނޫނަކު ވެސް ރައްޔިތުންގެ ހުރިހާ ހައްގުތަކެއް ގެއްލޭ ގޮތަކަށް ނޯންނާނެ ކަމަށެވެ.
ޑީޑީ ވިދާޅުވީ އެ ގާނޫނުގައި އޮންނާނީ އިންތިޚާބު ކުރެވޭ ރައްޔިތުންގެ މަޖިލީހުގެ މެންބަރު ޒިންމާދާރުކުރެވޭ ކަހަލަ ގޮތަކަށް ކަމަށާއި، ބައްޓަންކޮށްފައި އޮންނާނީ އޭނަގެ މޯރަލް ރެސްޕޮންސިބިލިޓީ އޭގައި ނެގޭ ގޮތަށް ކަމަށެވެ. ނަމަވެސް މި ސަރުކާރުން ގާނޫނުއަސާސީއަށް ބަދަލުގެނެސް މެންބަރުންގެ ގޮނޑި ގެއްލޭގޮތަށް ކަންކަން ކޮށްފައިވަނީ ރައްޔިތުންގެ ބާރުކަނޑުވާލަން ކަމަށް ޑީޑީ ވިދާޅުވިއެވެ.
