މި އަހަރުގެ ތެރޭގައި އެސެޓް ރިކަވަރީ ބިލް މަޖިލީހަށް ހުށަ ނޭޅޭނެ ކަމަށާއި، 2025 އަހަރުގެ ފުރަތަމަ ދައުރުގައި ހުށައަޅާނެކަން ބަންޑާރަނައިބު އަހްމަދު އުޝާމް ހާމަކުރައްވައިފިއެވެ.
އެސެޓް ރިކަވަރީގެ ޤާނޫނެއް ހުށައަޅާ، ދައުލަތަށް ލިބެން ޖެހޭ ފައިސާ ނުލިބި އޮތުން ނިމުމަކަށް ގެންނަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވީ މިދިޔަ ޖުލައި މަހުގެ ތެރޭގައެވެ. ޕީއެންސީގެ ހަރުގެ ޖަލްސާގައި ވާހަކަދައްކަވަމުން ރައީސް މުއިއްޒު ވިދާޅުވީ ކޮރަޕްޝަނާއި ހިޔާނާތުގެ ސަބަބުން ދައުލަތަށް ގެއްލޭ ފައިސާ ހޯދުމަށް މިހާރު ހުރި ޤާނޫނުތަކުން އެންމެ ރަނގަޅަށް މަގުފަހި ނުވާ ކަަމަށެވެ.
ދައުލަތަށް ގެއްލިފައި ހުރި ފައިސާ އަކީ ރައްޔިތުންގެ ފައިސާ ކަަމަށާއި އެ ފައިސާ އަނބުރާ ހޯދެން ޖެހޭ ކަމަށް ރައީސް ވަނީ ވިދާޅުވެފައެވެ. އަދި ކޮރަޕްޝަންގެ ނުބައި އަމަލުތައް ހިންގާ މީހުންނާއި އެކަމުގައި ބައިވެރިވާ މީހުން ޖަވާބުދާރީކޮށް އިންސާފުގެ ކުރިމައްޗަށް ގެންނަން ޖެހޭ ކަމަށް ވެސް އެމަނިކުފާނު ވިދާޅުވިއެވެ. އަދި އެފަދަ ކުށްތަކުގައި ޝާމިލްވާ މީހުންނަށް ހައްގު އަދަބު ލިބެންޖެހޭ ކަމަށް ރައީސް ވިދާޅުވިއެވެ.
އެ މަސައްކަތުގެ އަދާހަމަތައް ހިއްސާކުރައްވަމުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ބަންޑާރަނައިބު އަހްމަދު އުޝާމް ވިދާޅުވީ އެންޓި ކޮރަޕްޝަން ކޮމިޝަން، އޭސީސީއާ މަޝްވަރާކޮށްގެން އެސެޓް ރިކަވަރީ ބިލްގެ މަސައްކަތް ކުރައްވާފައިވާނެ ކަމަށެވެ. ކުރިން އުންމީދުކުރެއްވި ގޮތަށް މި އަހަރު އެ ބިލް މަޖިލީހަށް ހުށަނޭޅޭނެ ކަމަށް އުޝާމް ވިދާޅުވިއެވެ. އެ ބިލް ހުށަހެޅުން ލަސްވީ އޭސީސީން އެ ބިލް އަދިވެސް ބަންޑާރައިބުގެ އޮފީހަށް ފޮނުވާފައި ނުވާތީ ކަމަށް އުޝާމް ވިދާޅުވިއެވެ. އެހެންކަމުން ދެން އެޖީ އޮފީހުން ޑްރާފްޓްކޮށްގެން އެސެޓް ރިކަވަރީގެ ބިލް ހުށަހެޅުމަށް ނިންމަވާފައިވާ ކަމަށް އުޝާމް ވިދާޅުވިއެވެ.
އޭސީސީއާއެކު މަސައްކަތް ކޮށްގެން އެސެޓް ރިކަވަރީ ބިލު ހުށަހެޅުމަށް ކުރި މަސައްކަތަށް ކުރިއެރުމެއް ލިބިފައި ނުވާ ކަަމަށް އުޝާމް ވަނީ ވިދާޅުވެފައެވެ. ނުއަގުގައި ދީފައި ހުރި އެސެޓްތަކަށް ހަމައަގު ހޯދަން ސަރުކާރުން ބޭނުންވާ ކަމަށާއި އެ ކަން ހާސިލްކުރުމަށް ބަންޑާރަނައިބުގެ އޮފީހުން ބިލްގެ މަސައްކަތް މިހާރު ފަށާފައިވާ ކަމަށް އޭޖީ ވިދާޅުވިއެވެ. އޭޖީ ވަނީ ކުރީ ސަރުކާރުން އެސެޓްތައް ނު އަގުގައި އެތައް ބަޔަކަށް ދިން ކަމަށް ތުހުމަތުކުރައްވާފައެވެ. އެފަދަ އެއްބަސްވުންތައް ޤާނޫނީ އިޖުރާއަތުގެ ތެރެއިން ބާތިލް ކުރެވޭނެ މަގު ހޯދަން ޖެހޭ ކަމަށް އުޝާމް ވަނީ ވިދާޅުވެފައެވެ. ނަމަވެސް އޭގެ ތަފްސީލެއް ހާމައެއް ނުކުރައްވައެވެ.
ރައީސް މުުއިއްޒު މީގެ ކުރިން ވިދާޅުވީ އެސެޓް ރިކަވަރ ކުރުމުގެ މަސައްކަތް ކުރާނީ ރާއްޖެއިން ބޭރުގައި ރައްކާކޮށްފައި ހުރި ފައިސާ ހޯދަން މަގުފަހިވާ ގޮތަކަށް ކަމަށެވެ. އެކަން އެގޮތަށް ކޮށްގެން ނޫނީ އެސެޓް ރިކަވަރކުރުމުގެ ރަނގަޅު ނަތީޖާ އެއް ހާސިލް ނުވާނެ ކަމަށް އެމަނިކުފާނު ސިފަކުރެއްވިއެވެ. އެގޮތުން އެމްއެމްޕީއާރްސީގެ ހިޔާނާތުން ގެއްލުނު ފައިސާ ހޯދާ އެ ޚިޔާނާތުގެ ބައިވެރިން އިންސާފުގެ ކުރިމައްޗަށް ގެންނާނެ ކަމަށް ރައީސް ވަނީ ވިދާޅުވެފައެވެ. އެސެޓް ރިކަވަރީ ބިލެއް ވުޖޫދަށް ގެނައުމަށް މަސައްކަތް ކުރަމުންދާ ކަމަށް އުޝާމް ވިދާޅުވި އިރު ރައީސް ދެއްކެވި ވާހަކަ އާއި އުޝާމްގެ ވާހަކަ އާއި ދިމާ ނުވާ ކަންކަން ހުރިކަން ފާހަގަކުރެވެއެވެ. އެގޮތުން އްޖެއިން ބޭރުގައި ރައްކާކޮށްފައި ހުރި ފައިސާ ހޯދަން މަގުފަހިވާ ގޮތަށް ކުރާނީ ކޮން މަސައްކަތެއްތޯ އަދި އެކަމަށް ފޯކަސް ކުރައްވާކަން އުޝާމްގެ ވާހަކައިން އެނގޭކަށް ނެތެވެ.
