ވައިގެ މަގުން ރާއްޖެއައި އިންޑިއާގެ ދެ މީހެއްގެ ލަގެޖުން މަސްތުވާތަކެތި ކަސްޓަމްސްއިން އަތުލައިގަނެފިއެވެ.

ހޮނިހިރު ދުވަހު ކަސްޓަމްސްއިން ބުނީ މިތަކެތި އަތުލައިގަނެފައިވަނީ 15 އޮކްޓޯބަރު 2024 ވަނަ ދުވަހު، މެލޭޝިއާއިން ރާއްޖެއައި އިންޑިއާގެ ދެފަސިންޖަރުންގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، މިދެފަސިންޖަރުންގެ ލަގެޖް ބަލައިފާސްކުރުމުގެ ތެރޭގައި ކަމަށެވެ. އެއީ އުމުުރުން 41 އަހަރުގެ ފިރިހެނަކާއި، އުމުުރުން 38 އަހަރުގެ އަންހެނެއް ކަމަށް ކަސްޓަމްސްއިން ބުނެއެވެ.

އެގޮތުން ބަލާފާސްކުރުމުގެ ތެރޭގައި މި ދެފަސިންޖަރުގެ ލަގެޖުން މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން، އެ ތަކެތި ފުރަތަމަ މަރުހަލާގައި ތަހުލީލުކުރި އިރު، މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ވަނީ ޕޮޒިޓިވް ވެފައިވާ ކަމަށް ކަސްޓަމްސްއިން ބުނެއެވެ.

މީގެ އިތުރުން ކަސްޓަމްސްއިން ބުނީ މިތަކެތީގެ ބަރުދަނުގައި ޕެކިންއާއި އެކު ޖުމްލަ 2.05 ކިލޯ ހުރިއިރު، މިތަކެތީގެ މަގުމަތީ އަގަކީ 2,050,000.00 (ދެ މިލިއަން ފަންސާސް ހާސް) ދިވެހި ރުފިޔާކަމަށް ލަފާކުރެވޭ ކަމަށެވެ.

މި މައްސަލަ އިތުރަށް ތަހުގީގު ކުރުމަށް މައްސަލައިގައި އަތުލައިގަނެވުނު މަސްތުވާތަކެއްޗާއި ދެފަސިންޖަރުން ފުލުހުންނާ ހަވާލުކޮށްފައިވާ ކަމަށް ކަސްޓަމްސްއިން ބުނެއެވެ.

މައުލޫމާތު ލިބިފައިވާ ގޮތުގައި މިއީ ދެމަފިރިންނެވެ. އެދެމީހުންގެ ބަންދާ މެދު ގޮތެއް ނިންމުމަށް މިމަހުގެ 16 ވަނަ ދުވަހު ކްރިމިނަލް ކޯޓަށް ހާޒިރުކުރުމުން ބަންދަށް ވަނީ 3 ދުވަސް ޖަހާފައެވެ. އަދި ދެ މީހުންނަށް ކުރު މުއްދަތެއް ދިނީ ތަރުޖަމާނަކު ހަމަޖެހިފައިނުވާތީ ކަމަށް ކޯޓު އަމުރުގައި ބުނެފައިވެއެވެ.

މި މައްސަލަ ފުލުހުން އިތުރަށް ތަހުގީގު ކުރަމުންދާއިރު، ދޭތެރެދޭތެރެއިން ވައިގެ މަގުން ރާއްޖެއަށް އެތެރެ ކުރުމަށް މަސައްކަތް ކުރާ މަސްތުވާތަކެތި ކަސްޓަމްސްއިން އަތުލައިގަނެއެވެ. އަދި ރާއްޖޭގައި މަޑު ކުރުމަށްފަހު އެހެން ބޭރުގެ ގައުމުތަކަށް މަސްތުވާތަކެތި އެތެރެ ކުރުމަށް މަސައްކަތް ކޮށްފައިވާ މީހުން ވެސް ރާއްޖޭގެ އެއާޕޯޓުން މަސްތުވާތަކެއްޗާއެކު އަތުލާގަނެފައިވެއެވެ. އެގޮތުން މިމަހުގެ ކުރީކޮޅު ވެސް ރާއްޖެއަށް އައި ބްރެޒިލްއިން އައި 33 އަހަރުގެ އަންހެނެއްގެ ލަގެޖުން ހަ މިލިއަން ރުފިޔާގެ މަސްތުވާތަކެތި އަތުލައިގަނެފައިވެއެވެ.