ރައީސް މުއިއްޒަށް އެނގިވަޑައިގަންނަވަނީ އިތުރުފުޅު ހައްދަވަން، ވެރިކަން ކުރައްވަން އެނގިވަޑައިނުގަންނަވާ: މާރިޔާ

ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އެނގިވަޑައިގަންނަވަނީ އިތުރުފުޅު ހައްދަވަން ކަމަށާއި، ވެރިކަން ކުރައްވަން އެނގިވަޑައިނުގަންނަވާ ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި މާރިޔާ ވިދާޅުވީ ރިޔާސީ އިންތިޚާބުގެ ތެރޭގައި ރައީސް މުއިއްޒު ހެއްދެވި އިތުރުފުޅުތަކާއެކު، ދިވެހި ރައްޔިތުންނަށް ބޮޑު ގޯހެއް ހެދިފައިވާ ކަމަށެވެ.

މިއަދު ގައުމުގެ ކަންކަންދާ ގޮތުން ރައީސް މުއިއްޒަކީ ވެރިކަން ހިންގުމަށް ވެސް ދަސްކުރާ ބޯޑު ޖަހައިގެން އުޅުއްވާ ބޭފުޅެއް ކަމަށާއި، އިތުރުފުޅު ހެއްދެވުން ފިޔަވައި އިތުރުކަމެއް ކުރައްވަން އެމަނިކުފާނަށް އެނގިވަޑައިނުގަންނަވާކަން ރައްޔިތުން ގަބޫލުކުރާ ކަމަށް މާރިޔާ ވިދާޅުވިއެވެ.

މީގެ އިތުރުން މާރިޔާ ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ދޫކޮށްފައިވާ ގޯއްޗާއި، ފްލެޓުތައް ދޭނެކަމުގެ ފުރިހަމަ ޔަގީންކަން ރައީސް މުއިއްޒު ދެއްވި ނަމަވެސް މިއަދު ދިވެހި ރައްޔިތުން ފްލެޓާއި ގޯތި ހޯދުމަށް މުޒާހަރާ ކުރަމުންދާ ކަމަށެވެ. އަދި މި ސަރުކާރަށް 11 މަހަށް ވުރެ ގިނަ ދުވަސްވެފައިވާއިރު، ރައްޔިތުންގެ ހައްގުތައް ނިގުޅައިގަނެފައިވާ ކަމަށާއި، އެކި ހުއްޖަތު ދައްކައި، ގޯއްޗާއި، ފްލެޓުތައް ހިފަހައްޓަމުންދާ ކަމަށް މާރިޔާ ވިދާޅުވިއެވެ.

މިސަރުކާރުން އިންޑިއާއާ ގުޅޭގޮތުން ހަގީގާތާއި ހިލާފު އެތައް ވާހަކަތަކެއް ދައްކައި، މުޅި ރާއްޖޭގައި ބިރުވެރިކަން އުފެއްދިކަން ފާހަގަކުރައްވައި މާރިޔާ ވިދާޅުވީ ރައީސް ސާލިހުގެ ސަރުކާރަށް ތާއީދުކުރާ ހުރިހާ އެންމެންނަކީ އަދި އެމްޑީޕީ މީހުންނަކީ ރާއްޖެ އަޅުވެތި ކުރުމަށް މަސައްކަތް ކުރާ ބައެއްގެ ގޮތުގައި ސިފަ ކުރި ކަމަށެވެ.

މާރިޔާ ވިދާޅުވީ ރައީސް މުއިއްޒު އިންޑިއާ އައުޓް ޓީޝާޓް ތުރުކުރައްވައިގެން އެ ހަރަކާތުގައި އިސްކޮށް އުޅުއްވި ނަމަވެސް މިއަދު މިކަންކަން ނުކުރާކަން ހާމަކޮށް ދިނުމަށް މަސައްކަތް ކުރާ ކަމަށެވެ.