އީރާނުން ދިން މިސައިލް ހަމަލާއަށް ރައްދު ދޭނީ މަރުގެ ހަމަލާއަކުން ކަމަށާއި އެ ހަމަލާ ސީދާވެފައި، ހައިރާންކުރުވަނިވި ހަމަލާއަކަށް ވާނެ ކަމަށް ބުދަ ދުވަހު އިޒްރޭލުގެ މީޑިއާގައި ޝާއިއުކުރި ވީޑިއޯއެއްގައި އެގައުމުގެ ދިފާއީ ވަޒީރު ޔޯވް ގަލަންޓް ވިދާޅުވެއްޖެއެވެ.

އޮކްޓޯބަރު 1 ގައި އީރާނުން ދިން މިސައިލް ހަމަލާއަކީ "ނާކާމިޔާބު" ހަމަލާއެއް ކަމަށް ސިފަކުރައްވަމުން ގަލަންޓް ވިދާޅުވީ "އަހަރެމެންނަށް ހަމަލާދޭ ފަރާތްތަކަށް ގެއްލުން ލިބި އަގު ދައްކަން ޖެހޭނެ، އަހަރެމެންގެ ހަމަލާ ވާނީ މަރުގެ ހަމަލާއަކަށް، އެ ހަމަލާ ސީދާވާނެ އަދި އެންމެ މުހިންމު ކަމަކީ ހަމަލާދޭނީ ހައިރާންކުރުވަނިވި ގޮތަކަށް، އެމީހުންނަކަށް ނޭނގޭނެ ވީގޮތެއް ނުވަތަ ވީ ކިހިނެއްކަމެއް، އެމީހުންނަށް ފެންނާނީ ނަތީޖާ އެކަނި" ކަމަށެވެ.

އިޒްރޭލް ޑިފެންސް ފޯސް (އައިޑީއެފް) ގެ ޖާސޫސީ ޔުނިޓަކަށް ކުރެއްވި ޒިޔާރަތެއްގައި ވާހަކަފުޅު ދައްކަވަމުން، ގަލަންޓް ވިދާޅުވީ ފާއިތުވި ހަފްތާގައި އީރާނުން އިޒްރޭލާ ދިމާއަށް 200 އާ ގާތްކުރާ ބެލިސްޓިކް މިސައިލް ފޮނުވާލި ހަމަލާ އަކީ "އަނިޔާވެރި ނަމަވެސް ނުސީދާ" ހަމަލާއެއް ކަމަށެވެ.

ގަލަންޓް ވިދާޅުވީ އެ ހަމަލާއަކުން "އެއަރ ފޯސްއަކަށް ގެއްލުމެއް ނުވޭ، ހުރިހާ މަގުތަކެއް މަސައްކަތް ކުރޭ، މެދުނުކެނޑި ކުރިއަށްދޭ، އެއްވެސް މަތިންދާބޯޓަކަށް ގެއްލުމެއް ނުވޭ، އެއްވެސް ސިފައިންގެ މީހަކަށް ގެއްލުމެއް ނުވޭ، އަދި އެއްވެސް އާންމު ރައްޔިތަކަށް ގެއްލުމެއް ނުވޭ."

އީރާނުން ތަކުރާރު ކޮށް ބުނެފައިވަނީ އިޒްރޭލުން ރައްދުގައި އީރާނަށް ހަމަލާއެއް ދީފިނަމަ އޭގެ ބަދަލު ހިފާނެ ކަމަށާއި، އިޒްރޭލު "ފުނޑުފުނޑު" ކޮށްލާނެ ކަމަށެވެ.