އިސްރާއީލްގެ އިސްތިއުނާފު ބަލައި ނުގަންނަން އައިސީސީ އިން ނިންމައިފި

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ހައްޔަރު ކުރުމަށް، އިންޓަނޭޝަނަލް ކްރިމިނަލް ކޯޓު (އައިސީސީ) އިން ނެރެފައިވާ އަމުރު އިސްރާއީލް އިން އިސްތިއުނާފަށް ހުށަހެޅި ނަމަވެސް، އިސްތިއުނާފު ބަލައި ނުގަންނަން އައިސީސީ އިން ނިންމައިފި އެވެ.

އިސްރާއީލްގެ ބޮޑު ވަޒީރު ނަތަންޔާހޫ އާއި، އެ ޤައުމުގެ ކުރީގެ ޑިފެންސް މިނިސްޓަރު ޔޯވް ގަލަންޓު ހައްޔަރު ކުރުމަށް އައިސީސީ އިން އަމުރު ނެރެފައިވާއިރު، އިސްރާއީލް އިން ވަނީ އެ އަމުރު އިސްތިއުނާފަށް ހުށަހަޅައިފަ އެވެ. ނަމަވެސް، އައިސީސީ އިން ވަނީ އިސްރާއީލްގެ އިސްތިއުނާފު ބަަލައި ގަންނަން ޖެހޭ ޙާލަތެއް ނެތް ކަމަށް ކަނޑަ އަޅައިފަ އެވެ.

މިދިޔަ އަހަރުގެ ނޮވެމްބަރު މަހު އައިސީސީ އިން ނެރެފައިވާ އެ އަމުރުގައި ބުނެފައި ވަނީ ނަތަންޔާހޫ އާއި ގަލަންޓް، ޣައްޒާގައި ހިންގި ހަނގުރާމައިގައި އިންސާނިއްޔަތާ ދެކޮޅު ކުށްތަކާއި، ހަނގުރާމައިގެ ކުށްތަކުގެ ޖިނާއީ ޒިންމާ އުފުލަން ޖެހޭ ވަރުގެ އެކަށީގެންވާ ހެކި ހުރި ކަމަަށެވެ.

ނަތަންޔާހޫ އާއި ގަލަންޠް ހައްޔަރު ކުރުމަށް އައިސީސީ އިން އަމުރު ނެރުނުއިރު، ހަމާސްގެ އިސް ލީޑަރެއްގެ މައްޗަށް ވެސް ވަނީ އެ އަމުރު ނެރެފަ އެވެ. ނަމަވެސް، އޭނާ މަރުވުމާ ގުޅިގެން އެ އަމުރު ވަނީ ބާތިލު ކޮށްފަ އެވެ.

ނަތަންޔާހޫ އާއި ގަލަންޓް ހައްޔަރު ކުރުމަށް އައިސީސީ އިން ނެރުނު އަމުރާ ގުޅިގެން، އިސްރާއީލް އާއި އެމެރިކާ އިން ވަނީ އެކަން ވަރަށް ބޮޑަށް ކުށްވެރިކޮށް، އަދި އައިސީސީ އަށް ވަރަށް ބޮޑަށް ފާޑު ވެސް ކިޔައިފަ އެވެ. މީގެ އިތުރުން، ނަތަންޔާހޫ އެ ނިންމުން ސިފަ ކޮށްފައި ވަނީ އެންޓި ސެމިޓިކް ނިންމުމެއްގެ ގޮތުގަ އެވެ.

މެއި މަހު އިސްރާއީލް އިން ވަނީ އައިސީސީގެ އިހުތިޞާސްއާ މެދު ސުވާލު އުފައްދައި މައްސަލައެއް ހުށަހަޅައިފަ އެވެ. އެއީ އައިސީސީ އަށް ނެރެވޭނެ އަމުރެއް ނޫން ކަމަށާއި، އެ އަމުރު ބާތިލު ކޮށްދިނުމަށް ވެސް ވަނީ އެދިފަ އެވެ. ނަމަވެސް، ޖުލައި މަހުގެ 16 ވަނަ ދުވަހު ކޯޓުން ވަނީ އެ މައްސަލަ ބަަލައި ނުގަންނަން ނިންމައިފަ އެވެ. އަދި އިޙުތިޞާސްގެ މައްސަލަ ނުނިމެނީސް، އަމުރު ބާތިލު ކުރުމުގެ ޤާނޫނީ ހަމަައެއް ނެތް ކަމަށް ވަނީ ބުނެފަ އެވެ.

އޭގެ ހަފުތާއެއް ފަހުން އިސްރާއީލް އިން ވަނީ އެ ނިންމުން އިސްތިއުނާފު ކޮށްފަ އެވެ. ނަމަވެސް، ފަނޑިޔާރުން ނެރެފައިވާ 13 ޞަފުހުާގެ މައްޗަށް އޮތް ނިންމުމުގައި ބުނެފައި ވަނީ، އިސްރާއީލް އިން ހުށަހަޅާފައިވާ މައްސަލަ އަކީ އިސްތިއުނާފު ވެސް ކުރެވޭނެ މައްސަލައެއް ނޫން ކަމަށެވެ.

އައިސީސީގެ ފަނޑިޔާރުން މިހާރު ގެންދަނީ، އިސްރާއީލް އިން ހުށަހަޅާފައިވާ އިޙުތިޞާސްގެ މައްސަލަ ތަފްސީލުކޮށް ދިރާސާ ކުރަމުންނެވެ. އެ މައްސަލައިގައި ގޮތެއް ނިންމާނެ ތާރީޚެއް މިހާތަނަށް އިއުލާން ކޮށްފައި ނުވެ އެވެ.