އެމެރިކާ އާއި އިނގިރޭސިވިލާތުގެ ހަމަލާތަކުން ޔަމަނުން އިޒްރޭލާ ދެކޮޅަށް ދޭ ހަމަލާތައް ނުހުއްޓުވޭނެ ކަމަށް ޔަމަނުގެ ސަރުކާރުގެ ތަރުޖަމާނު ހާމަކޮށްފިއެވެ.

ހާޝިމް ޝަރަފުއްދީން ހުކުރު ދުވަހު ވިދާޅުވީ، ޣައްޒާ އާއި ލުބުނާނުގެ ރައްޔިތުންނަށް ތާއީދުކޮށް ޔަމަނުގައި މިލިއަނަކަށް ވުރެ ގިނަ މީހުން ބައިވެރިވި މުޒާހަރާތަކެއް ކުރިއަށް ގޮސްފައިވަނިކޮށް، ހުކުރު ދުވަހު ޔަމަނުގެ އެކި ސަރަހައްދުތަކަށް ދިން ވައިގެ ހަމަލާތަކަކީ "ޔަމަނުގެ ރައްޔިތުން ބިރުގަންނަވާލުމަށް ކުރެވުނު ނާކާމިޔާބު މަސައްކަތެއް" ކަމަށެވެ.

"މިފަދަ ހަމަލާތައް ދިނަސް ދުޝްމަނުންނާ ދެކޮޅަށް ސާބިތުކަމާއެކު ތިބޭނެ، ޔަމަނު ބިރެއް ނުގަންނާނެ،" ކަމަށް އޭނާ ވިދާޅުވިއެވެ.

ޝަރަފުއްދީން ވަޢުދުވެވަޑައިގަތީ ޣައްޒާއާއި ލުބުނާނަށް އިޒްރޭލުން ދޭ އަނިޔާވެރި ހަމަލާތައް ހުއްޓެންދެން ޔަމަނުން އިޒްރޭލާ ދެކޮޅަށްދޭ ހަމަލާތައް ހުއްޓާނުލައި ކުރިއަށް ގެންދާނެ ކަމަށެވެ.

ޔަމަނުގެ ސަރުކާރުގެ ތަރުޖަމާނު މި މޭރުމުން ވާހަކަދެއްކެވީ، ހުކުރު ދުވަހު ޔަމަނުގެ ވެރިރަށް ސަނާއާއި ހުދައިދާ ވައިގެ ބަނދަރު ހިމެނޭގޮތަށް ޔަމަނުގެ އެކި ސަރަހައްދުތަކަށް ވައިގެ ހަމަލާތަކެއް އެމެރިކާ އިން ދިނުމާ ގުޅިގެންނެވެ. ޔަމަނުގެ ދަމާރު ސިޓީގެ ދެކުނަށްވެސް ހަމަލާތައް ދިން ކަމަށް އަލް މަސީރާ ޓީވީން އިތުރަށް ބުނެފައިވެއެވެ.

މި ހަމަލާތައް ދީފައިވަނީ އެމެރިކާއާއި އިނގިރޭސިވިލާތުގެ ބާރުތަކުން ކަމަށް އަލް މަސީރާ ޓީވީން ރިޕޯޓުކުރި ނަމަވެސް، އިނގިރޭސި ސަރުކާރުގެ މަސްދަރަކުން ބުނެފައިވަނީ އިނގިރޭސިން މިހަމަލާތަކުގައި ބައިވެރިވެފައި ނުވާ ކަމަށެވެ.

އެމެރިކާގެ ސިފައިންގެ ފަރާތުން ބުނެފައިވަނީ ހުކުރު ދުވަހު ހޫތީންގެ ބާރުގެ ދަށުގައިވާ ޔަމަނުގެ ސަރަހައްދުތަކުގެ 15 އަމާޒަކަށް އެމެރިކާގެ ބާރުތަކުން ހަމަލާދީފައިވާ ކަމަށެވެ.

ޣައްޒާ ގައި އިޒްރޭލުން ހަނގުރާމަ ފެށީއްސުރެ ޔަމަނުގެބާރުތަކުންގެންދަނީ ޣައްޒާ ރައްޔިތުންނާ އެއްބައިވަންތަކަން ހާމަކޮށް ހިތްވަރު ދިނުމުގެ ގޮތުން އިޒްރޭލާ ދެކޮޅަށް ގިނަ އޮޕަރޭޝަންތަކެއް ހިންގަމުންނެވެ.

މީގެ ތެރޭގައި އިޒްރޭލުން ހިފާފައިވާ ފަލަސްތީނުގެ ސަރަހައްދުތަކުގައިވާ އަމާޒުތަކަށް ހަމަލާދިނުމާއި، އިޒްރޭލުގެ އުޅަނދުފަހަރަށާއި އިޒްރެލުން ހިފާފައިވާ ސަރަހައްދުތަކުގެ ބަނދަރުތަކަށް ދަތުރުކުރާ އުޅަނދުފަހަރަށް އަމާޒުކޮށް ހަމަލާދިނުން ހިމެނެއެވެ.