ޔުއެފާ ޗެމްޕިއަންސް ލީގުގެ، ލީގު ބުރުގައި ޔަންގު ބޯއީސްއާ ދެކޮޅަށް ކުޅުނު މެޗުން، ބާސެލޯނާ ފަސް ލަނޑުގެ މޮޅެއް ހޯދައިފި އެވެ.
އަންގާރަ ދުވަހުގެ ރޭ ކުޅުނު މެޗުގެ ފުރަތަމަ ހާފުގައި ބާސެލޯނާ އިން ވަނީ ތިން ލަނޑު ޖަހައިފަ އެވެ. އަނެއް ދެ ލަނޑު އެ ޓީމުން ޖެހީ ފަހު ހާފުގަ އެވެ. މި ސީޒަންގެ ޗެމްޕިއަންސް ލީގުގައި ބާސެލޯނާ އިން ކުޅުނު ފުރަތަމަ މެޗުން ބަލިވެފައިވާއިރު، މިއީ ޗެމްޕިއަންސް ލީގުގައި އެ ޓީމުގެ ފުރަތަމަ މޮޅެވެ.
މެޗު ފަށައިގެން އަށް ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕޮލެންޑުގެ ފޯވާޑު ރޮބާޓް ލެވަންޑޯސްކީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބްރެޒިލްްގެ ރަފީނިއާ އެވެ. އޭގެ ފަހުން ފުރަތަމަ ހާފުގެ 34 ވަނަ މިނެޓުގައި ރަފީނިއާ ވަނީ ބާސެލޯނާގެ ދެ ވަނަ ލަނޑު ޖަހައިފަ އެވެ. އޭގެ ތިން މިނެޓު ފަހުން އެ ޓީމުގެ ތިން ވަނަ ލަނޑު ޖެހީ އިނީގޯ މާާޓިނޭޒް އެވެ. އޭނާ އެ ލަނޑު ޖެހީ ޕެޑްރީ ތަނަވަސްކޮށްދިން ފުރުސަތެއްގަ އެވެ.
ދެ ވަނަ ހާފުގައި ބާސެލޯނާގެ ހަތަރު ވަނަ ލަނޑު ޖެހީ ލެވަންޑޯސްކީ އެވެ. ދެ ވަނަ ހާފު ފަށައިގެން ހަ ވަނަ މިނެޓުގައި އޭނާ އެ ލަނޑު ޖެހީ މާޓިނޭޒް ތަނަވަސްކޮށްދިން ފުރުސަތެއްގަ އެވެ. މެޗުގައި ބާސެލޯނާގެ ފަސް ވަނަ ލަނޑަކީ ޔަންގު ބޯއީސްގެ ޑިފެންޑަރު މުޙައްމަދު ކަމަރާ އަތުން ބައި ކޮޅަށް ވަތް ލަނޑެކެވެ.
މޮޅާއެކު ބާސެލޯނާ އޮތީ ދެ މެޗުން ތިން ޕޮއިންޓާ އެކު 10 ވަނައިގަ އެވެ.
